athātaḥ kiyantaḥśirasīyamadhyāyaṁ vyākhyāsyāmaḥ||1||
iti ha smāha bhagavānātrēyaḥ||2||

pūrvacatuṣkacatuṣṭayēna bhēṣajamabhihitaṁ, samprati tadviṣayarōgābhidhānārthaṁ rōgacatuṣkō’bhidhātavyaḥ, cikitsā ca vidhēyatvēnaiva pradhānamataḥ prathamamuktā, kiñca darśitaścāyaṁ prathamādhyāya ēva sambandhaḥ, ēvaṁ cāṅgēṣu marmasu ca pradhānabhūtaśirōhr̥dayarōgābhidhāyakatvēna kiyantaḥ śirasīyō’bhidhīyatē||1-2||

kiyantaḥ śirasi prōktā rōgā hr̥di ca dēhinām|
kati cāpyanilādīnāṁ rōgā mānavikalpajāḥ||3||
kṣayāḥ kati samākhyātāḥ piḍakāḥ kati cānagha!|
gatiḥ katividhā cōktā dōṣāṇāṁ dōṣasūdana!||4||
hutāśavēśasya vacastacchrutvā [1] gururabravīt|
pr̥ṣṭavānasi yat saumya! tanmē śr̥ṇu savistaram||5||
dr̥ṣṭāḥ pañca śirōrōgāḥ pañcaiva hr̥dayāmayāḥ|
vyādhīnāṁ hyadhikā ṣaṣṭirdōṣamānavikalpajā||6||
daśāṣṭau ca kṣayāḥ sapta piḍakā mādhumēhikāḥ|
dōṣāṇāṁ trividhā cōktā gatirvistarataḥ [2] śr̥ṇu||7||

kṣayasthānavr̥ddhayō dōṣamānaṁ, tasya vikalpō dōṣāntarasambandhāsambandhakr̥tō bhēdaḥ| mādhumēhikā ityatra madhumēhaśabdaḥ sāmānyēna pramēhavacanaḥ| yatō’traiva sāmānyēna brūtē- “vinā pramēhamapyētā jāyantē duṣṭamēdasaḥ” iti; anyathā hi ‘vinā madhumēhaṁ’ iti kr̥taṁ syāt; tathā cikitsitē vakṣyati sāmānyēnaiva yat- “pramēhiṇāṁ yāḥ piḍakā mayōktā rōgādhikārē pr̥thagēva sapta” (ci. 6) ityādi| tathā madhumēhapiḍakānāṁ cikitsitōpadēśācca sarvamēhabhavatvaṁ piḍakānāṁ, madhumēhabhavatvē hi madhumēhasyaivāsādhyatvānna tadbhavapiḍakānāmupakramaṇīyatvamasti; kiñca pradēśāntarē’pi madhumēhaśabdēnāyaṁ sarvapramēhānuktavān, yathā- “gulmī ca madhumēhī ca rājayakṣmī ca yō naraḥ| acikitsyā bhavantyētē balamāṁsaparikṣayē” (iṁ. 9) iti| atra hi yadi vātikō madhumēhō’bhiprētaḥ syāttadā tasya svarūpata ēvāsādhyatvēna ‘balamāṁsaparikṣayē sati’ iti viśēṣaṇamanarthakaṁ syāt| suśrutēnāpi ca sāmānyēna pramēhē ēvaitāḥ piḍakā darśitāḥ, yaduktaṁ- “tatra vasāmēdōbhyāmabhipannaśarīrasya tribhirdōṣaiścānugatadhātōḥ pramēhiṇō daśa piḍakā jāyantē” (su. ni. 6) ityādi| sarva ēva pramēhā yasmāddēhaṁ madhurīkr̥tya jāyantē tasmānmadhumēhā ityucyantē, vacanaṁ hi- “ṣaṭpadapippīlikābhiśca śarīramūtrābhisaraṇam” (ni. 4) iti, tathā ca vāgbhaṭaḥ- “madhuraṁ yacca sarvēṣu prāyō madhviva mēhati| sarvē hi madhumēhākhyā mādhuryācca tanōrataḥ” (vā. ni. 10) iti| vistarata iti śr̥ṇvityanēna sambadhyatē||3-7||

sandhāraṇāddivāsvapnādrātrau jāgaraṇānmadāt|
uccairbhāṣyādavaśyāyāt prāgvātādatimaithunāt||8||
gandhādasātmyādāghrātādrajōdhūmahimātapāt|
gurvamlaharitādānādati śītāmbusēvanāt||9||
śirō’bhighātādduṣṭāmādrōdanādbāṣpanigrahāt [3] |
mēghāgamānmanastāpāddēśakālaviparyayāt||10||
vātādayaḥ prakupyanti śirasyasraṁ ca duṣyati|
tataḥ śirasi jāyantē rōgā vividhalakṣaṇāḥ||11||

sandhāraṇāditi vēgasandhāraṇāt| haritam ārdrakādi| atīti pūrvēṇa parēṇa ca śītāmbusēvanādityanēna sambadhyatē| duṣṭādāmāt duṣṭāmāt; kiṁvā ‘uṣṇāmāt’ iti pāṭhaḥ, tatrōṣṇāccāmāccētyarthaḥ| dēśakālaviparyayādityatra dēśaviparyaya upasargagr̥hītatvaṁ dēśasya| asraṁ ca praduṣyatītyabhidadhānaḥ sarvaśirōrōgēṣu raktaduṣṭiṁ darśayati||8-11||

prāṇāḥ prāṇabhr̥tāṁ yatra śritāḥ sarvēndriyāṇi ca|
yaduttamāṅgamāṅgānāṁ śirastadabhidhīyatē||12||

prāṇā ityādinā’ṅgēṣu śiraḥprādhānyaṁ darśayan prakr̥taśirōrōgāṇāmēvātyahitatvaṁ [4] darśayati; tēna nōtsūtraṁ śiraḥprādhānyābhidhānam| śritā iva śritāḥ, śira-upaghātē upaghātāt| upariṣṭādaṅgamuttamāṅgam||12||

ardhāvabhēdakō vā syāt sarvaṁ vā rujyatē śiraḥ|
pratiśyāmukhanāsākṣikarṇarōgaśirōbhramāḥ||13||
arditaṁ śirasaḥ kampō galamanyāhanugrahaḥ|
vividhāścāparē rōgā vātādikrimisambhavāḥ||14||

prakr̥tāñchirōrōgānāha- ardhētyādinā krimisambhavā ityantēna| ētacca ‘jāyantē rōgā vividhalakṣaṇāḥ’ ityasya vivaraṇam||13-14||

pr̥thagdiṣṭāstu yē pañca saṅgrahē paramarṣibhiḥ|
śirōgadāṁstāñchr̥ṇu mē yathāsvairhētulakṣaṇaiḥ||15||
uccairbhāṣyātibhāṣyābhyāṁ tīkṣṇapānāt [5] prajāgarāt|
śītamārutasaṁsparśādvyavāyādvēganigrahāt||16||
upavāsādabhīghātādvirēkādvamanādati|
bāṣpaśōkabhayatrāsādbhāramārgātikarśanāt||17||
śirōgatāḥ [6] sirā vr̥ddhō vāyurāviśya kupyati|
tataḥ śūlaṁ mahattasya vātāt samupajāyatē||18||
nistudyētē bhr̥śaṁ śaṅkau ghāṭā [7] sambhidyatē tathā|
sabhrūmadhyaṁ [8] lalāṭaṁ ca tapatīvātivēdanam||19||
vadhyētē [9] svanataḥ śrōtrē niṣkr̥ṣyētē ivākṣiṇī|
ghūrṇatīva śiraḥ sarvaṁ sandhibhya iva mucyatē||20||
sphuratyati sirājālaṁ stabhyatē ca śirōdharā|
snigdhōṣṇamupaśētē ca śirōrōgē’nilātmakē||21||

śirōgatatvēna nāsādirōgēṣvapi prāptēṣu tān vihāyaivāṣṭōdarīyē prōktāṁstānēva śiraḥśūlalakṣaṇān rōgān prapañcēna vaktumāha- pr̥thagityādi| saṅgrahē aṣṭōdarīyē; tēna nārūṁṣikādayō’traprakaraṇē śirōrōgaśabdēnōcyantē; śirōrōgaśabdasya śūla ēva rujākarē vr̥ttatvāt [10] | tīkṣṇapānaṁ tīkṣṇamadyapānaṁ; kiṁvā, tīkṣṇaṁ maricādi| vadhyētē iva vadhyētē, atyarthapīḍāyuktatvēna||15-21||

kaṭvamlalavaṇakṣāramadyakrōdhātapānalaiḥ|
pittaṁ śirasi sanduṣṭaṁ śirōrōgāya kalpatē||22||
dahyatē rujyatē tēna śiraḥ śītaṁ suṣūyatē [11] |
dahyētē cakṣuṣī tr̥ṣṇā bhramaḥ svēdaśca jāyatē||23||

śītaṁ suṣūyatē śītamicchati||22-23||

āsyāsukhaiḥ svapnasukhairgurusnigdhātibhōjanaiḥ|
ślēṣmā śirasi sanduṣṭaḥ śirōrōgāya kalpatē||24||
śirō mandarujaṁ tēna suptaṁ stimitabhārikam|
bhavatyutpadyatē tandrā tathā”lasyamarōcakaḥ||25||
vātācchūlaṁ bhramaḥ kampaḥ pitāddāhō madastr̥ṣā|
kaphādgurutvaṁ tandrā ca śirōrōgē tridōṣajē||26||

svapnasukhamanucitadivāsvapnēna jñēyam| suptamiva suptaṁ, prabōdharahitatvēna| bhārākrāntamiva bhārikam||24-26||

tilakṣīraguḍājīrṇapūtisaṅkīrṇabhōjanāt|
klēdō’sr̥kkaphamāṁsānāṁ dōṣalasyōpajāyatē||27||
tataḥ śirasi saṅklēdāt krimayaḥ pāpakarmaṇaḥ|
janayanti śirōrōgaṁ jātā bībhatsalakṣaṇam||28||
vyadhacchēdarujākaṇḍūśōphadaurgatyaduḥkhitam [12] |
krimirōgāturaṁ vidyāt krimīṇāṁ darśanēna [13] ca||29||

saṅkīrṇabhōjanaṁ viruddhāharaḥ| dōṣalasya bahudōṣasya| pāpakarmaṇa ityanēnādharmavata ēvāyamatiduḥkhakrimirōgō bhavatīti darśayati| bībhatsalakṣaṇamiti ghrāṇādibhyaḥ pūyādipravr̥ttēḥ||27-29||

śōkōpavāsavyāyāmarūkṣaśuṣkālpabhōjanaiḥ [14] |
vāyurāviśya hr̥dayaṁ janayatyuttamāṁ rujam||30||
vēpathurvēṣṭanaṁ stambhaḥ pramōhaḥ śūnyatā daraḥ [15] |
hr̥di vātāturē rūpaṁ jīrṇē cātyarthavēdanā||31||
uṣṇāmlalavaṇakṣārakaṭukājīrṇabhōjanaiḥ|
madyakrōdhātapaiścāśu hr̥di pittṁ prakupyati||32||
hr̥ddāhastiktatā vakrē tiktāmlōdgiraṇaṁ klamaḥ|
tr̥ṣṇā mūrcchā bhramaḥ svēdaḥ pittahr̥drōgalakṣaṇam||33||
atyādānaṁ gurusnigdhamacintanamacēṣṭanam|
nidrāsukhaṁ cābhyadhikaṁ kaphahr̥drōgakāraṇam||34||
hr̥dayaṁ kaphahr̥drōgē suptaṁ stimitabhārikam|
tandrāruciparītasya bhavatyaśmāvr̥taṁ yathā||35||
hētulakṣaṇasaṁsargāducyatē sānnipātikaḥ|
(hr̥drōgaḥ kaṣṭadaḥ kaṣṭasādhya uktō maharṣibhiḥ)
tridōṣajē tu hr̥drōgē yō durātmā niṣēvatē||36||
tilakṣīraguḍādīni granthistasyōpajāyatē|
marmaikadēśē saṅklēdaṁ rasaścāsyōpagacchati||37||
saṅklēdāt krimayaścāsya bhavantyupahatātmanaḥ|
marmaikadēśē tē jātāḥ sarpantō bhakṣayanti ca||38||
tudyamānaṁ sa hr̥dayaṁ sūcībhiriva manyatē|
chidyamānaṁ yathā śastrairjātakaṇḍūṁ mahārujam||39||
hr̥drōgaṁ krimijaṁ tvētairliṅgairbuddhvā sudāruṇam|
tvarēta jētuṁ taṁ vidvān vikāraṁ śīghrakāriṇam||40||

śōkōpavāsētyādi hr̥drōgalakṣaṇam| vēṣṭanam udvēṣṭanamiva| daraḥ daradarikā| acintanam alpacintanam| aśmāvr̥tam aśmākrāntam| granthiriva granthiḥ, sa ca rasadōṣakr̥taḥ| marmaikadēśē hr̥dayaikadēśē| dvitīyaṁ marmētipadaṁ karmatāpannam||30-40||

dvyulbaṇaikōlbaṇaiḥ ṣaṭ syurhīnamadhyādhikaiśca ṣaṭ|
samaiścaikō vikārāstē sannipātāstrayōdaśa||41||
saṁsargē nava ṣaṭ tēbhya [16] ēkavr̥ddhyā samaistrayaḥ|
pr̥thak trayaśca tairvr̥ddhairvyādhayaḥ pañcaviṁśatiḥ||42||
yathā vr̥ddhaistathā kṣīṇairdōṣēḥ syuḥ pañcaviṁśatiḥ|
vr̥ddhikṣayakr̥taścānyō vikalpa upadēkṣyatē||43||
vr̥ddhirēkasya samatā caikasyaikasya saṅkṣayaḥ|
dvandvavr̥ddhiḥ kṣayaścaikasyaikavr̥ddhirdvayōḥ kṣayaḥ [17] ||44||

‘kati cāpyanilādīnām’ ityādyuktasyōttaraṁ- dvyulbaṇairityādi| hīnamadhyādhikairiti vr̥ddhavr̥ddhataravr̥ddhatamaiḥ| saṁsargē navēti cchēdaḥ| asyaiva vivaraṇaṁ- ṣaṭ tēbhya ityādi| samaisraya iti vr̥ddhaiḥ samaiḥ| vr̥ddhikṣayakr̥ta ityasya vivaraṇaṁ- vr̥ddhirēkasyētyādi| atra ca yadyapi samatā’pi vr̥ddhikṣayavikalpē paṭhyatē, tathā’pi samatāyāḥ svātantryēṇa vikārākartr̥tvāt ‘vr̥ddhikṣayakr̥ta’ ityuktam| vr̥ddhirēkasya samatā caikasyaikasya saṅkṣaya ityanēna ṣaḍvikārāḥ| dvandvavr̥ddhiḥ kṣayaścaikasyētyanēna trayaḥ| ēkavr̥ddhirdvayōḥ kṣayaḥ [18] , tēna trayaḥ| ēvaṁ dviṣaṣṭiprakārā bhavanti||41-44||

prakr̥tisthaṁ yadā pittaṁ mārutaḥ ślēṣmaṇaḥ kṣayē|
sthānādādāya gātrēṣu yatra yatra visarpati||45||
tadā bhēdaśca dāhaśca tatra tatrānavasthitaḥ|
gātradēśē bhavatyasya śramō daurbalyamēva ca||46||
prakr̥tisthaṁ [19] kaphaṁ vāyuḥ kṣīṇē pittē yadā balī|
karṣēt kuryāttadā śūlaṁ saśaityastambhagauravam||47||
yadā’nilaṁ [20] prakr̥tigaṁ pittaṁ kaphaparikṣayē|
saṁruṇaddhi tadā dāhaḥ śūlaṁ cāsyōpajāyatē||48||
ślēṣmāṇaṁ [21] hi samaṁ pittaṁ yadā vātaparikṣayē|
sannirundhyāttadā kuryāt satandrāgauravaṁ jvaram||49||
pravr̥ddhō hi yadā ślēṣmā pittē kṣīṇē samīraṇam|
rundhyāttadā prakurvīta śītakaṁ gauravaṁ rujam [22] ||50||
samīraṇē parikṣīṇē kaphaḥ pittaṁ samatvagam|
kurvīta sannirundhānō mr̥dvagnitvaṁ śirōgraham [23] ||51||
nidrāṁ tandrāṁ pralāpaṁ ca hr̥drōgaṁ gātragauravam|
nakhādīnāṁ ca pītatvaṁ ṣṭhīvanaṁ kaphapittayōḥ||52||
hīnavātasya tu ślēṣmā pittēna sahitaścaran|
karōtyarōcakāpākau sadanaṁ gauravaṁ tathā||53||
hr̥llāsamāsyasravaṇaṁ pāṇḍutāṁ dūyanaṁ madam|
virēkasya ca vaiṣamyaṁ vaiṣamyamanalasya ca||54||
hīnapittasya tu ślēṣmā mārutēnōpasaṁhitaḥ|
stambhaṁ śaityaṁ ca tōdaṁ ca janayatyanavasthitam||55||
gauravaṁ mr̥dutāmagnērbhaktāśraddhāṁ pravēpanam|
nakhādīnāṁ ca śuklatvaṁ gātrapāruṣyamēva ca||56||
mārutastu kaphē hīnē pittaṁ ca kupitaṁ dvayam|
karōti yāni liṅgāni śr̥ṇu tāni samāsataḥ||57||
bhramamudvēṣṭanaṁ tōdaṁ dāhaṁ sphuṭanavēpanē|
aṅgamardaṁ parīśōṣṁ dūyanaṁ dhūpanaṁ tathā||58||
vātapittakṣayē ślēṣmā srōtāṁsyapidadhadbhr̥śam|
cēṣṭāpraṇāśaṁ mūrcchāṁ ca vāksaṅgaṁ ca karōti hi||59||
vātaślēṣmakṣayē pittaṁ dēhaujaḥ sraṁsayaccarēt|
glānimindriyadaurbalyaṁ tr̥ṣṇāṁ mūrcchāṁ kriyākṣayam||60||
pittaślēṣmakṣayē vāyurmarmāṇyatinipīḍayan|
praṇāśayati sañjñāṁ ca vēpayatyathavā [24] naram||61||

vr̥ddhirēkasyētyādērudāharaṇam- prakr̥tisthaṁ yadā pittamityādi| atra kēcidētadēva paramudāharaṇaṁ dr̥ṣṭāntārthaṁ paṭhanti, śēṣōdāharaṇaṁ tu kr̥tsnē tantrē bōddhavyaṁ; kēcittu vr̥ddhikṣayavikalpasya durbōdhatvēna sarvēṣāmēva dvādaśānāmapi vikalpānāmācāryēṇa lakṣaṇaṁ kr̥tamiti kr̥tvā sarvamēva paṭhanti| nanu prakr̥tisthē pittē kathaṁ tadā dāhaścēti saṅgataṁ bhavati, na hi prakr̥tisthō dōṣō vikārakārī, na ca vāyōrdāhaḥ sambhavati| ucyatē- yatra yatrēti [25] vacanād yatra kupitēna vāyunā pittaṁ nītaṁ, tatra śarīrāvayavē prakr̥timānasthitamapi pittaṁ vr̥ddhamēva, yatastasmin pradēśē tāvān pittasambandha ucitō na bhavatyēvētyadhikēna tatra pittēna dāha upapanna ēva, ēvamanyatrāpi prakr̥tisthasyāpi dōṣasya vikārē vyākhyēyam| anyē tu bruvatē- prakr̥tisthānāmapi dōṣāṇāṁ duṣṭadōṣasambandhādvikārakāritvaṁ bhavati; yathā- raktādīnām| hīnavātasyētyādi ‘dvandvavr̥ddhiḥ kṣayaścaikasya’ ityasyōdāharaṇam| dēhaujō dēhasāraḥ; kiṁvā dēhaśca ōjaśca dēhaujaḥ||45-61||

dōṣāḥ pravr̥ddhāḥ svaṁ liṅgaṁ darśayanti yathābalam|
kṣīṇā jahati liṅgaṁ svaṁ, samāḥ svaṁ karma kuvētē||62||

dōṣāṇāṁ vr̥ddhisāmyakṣayalakṣaṇāni pr̥thagāha- dōṣā ityādi| svaṁ liṅgamiti vaikārikam| yathābalamiti ativr̥ddhairativr̥ddhaṁ, madhyavr̥ddhairmadhyavr̥ddhamityādi| liṅgaṁ svaṁ jahatītyanēna kṣīṇānāṁ prakr̥tiliṅgakṣayavyatiriktaṁ vikārakartr̥tvaṁ nāstīti darśayati; yatō vr̥ddhā unmārgagāminō dōṣā dūṣyaṁ dūṣayantō jvarādīn kurvanti na kṣīṇāḥ, svayamēva duḥsthitatvāt| svaṁ karmēti prākr̥taṁ karma| ētē ca dviṣaṣṭirbhēdā āviṣkr̥tatamatvēnōktāḥ; tēnaikadōṣakṣayē dvidōṣavr̥ddhau ca vr̥ddhavr̥ddhatarabhēdādibhyō’dhikatvamudbhāvanīyam [26] | nanu bhavatvēvaṁ saṅkhyā yadi sannipātō dōṣāṇāṁ syāt, sa tu na bhavitumarhati, yatō vātādīnāṁ parasparaṁ viruddhāḥ santi guṇāḥ, viruddhaguṇānāṁ tu parasparōpaghātō bhavati, yathā- vahnitōyayōḥ| naivaṁ, virōdhō hi bhāvānāṁ kāryōnnēyaḥ, nānyatō dr̥ṣṭamātrēṇa kalpayituṁ pāryatē; yatō’nyatra tōyadahanayōrbhēda [27] upalabdhaḥ, tat kiṁ pāñcabhautikadravyārambhē’pi tayōrvirōdhāt pāñcabhautikaṁ dravyaṁ na syāt, tōyāgniguṇātirēkādvā’mlarasō na syāt [28] , tasmādanupalabdhatvāddōṣasaṁsargē virōdhasya svabhāvaparyanuyōgō na yujyatē| atha manyasē- ēvaṁ viruddhaguṇānāmapi dōṣāṇāmavirōdhē “viruddhaguṇasannipātē bhūyasā’lpamavajīyatē” (vi. 1) iti, tathā “hrāsahēturviśēṣastu” (sū. 1) iti vacanē tarhi nirarthakē| na, anayōḥ prabhāvāt pratipāditaviṣayavyatirēkē [29] caritārthatvāt| prabhāvastu tayōrvirōdhakō bhavatyēva; yathā- tridōṣakaranikucagatā guṇāḥ samān dōṣān kurvanti paraṁ, na tu viruddhatvēna dōṣaharaṇaṁ kurvatē tridōṣakartr̥tvaprabhāvāt; tathā āmalakē’mlatvaṁ vātaṁ hanti, mādhuryaśaityē tu pittaṁ, ślēṣmāṇaṁ ca kaṭutvatiktatvē; nikucē tvamlatvaṁ kaṣāyaśaityābhibhūtaṁ vātaṁ na nihanti, mādhuryaśaityē cāmlatvābhibhūtē pittaṁ na jayata ēvamādi| tasmāddōṣāṇāṁ prabhāvō’yaṁ dr̥ṣṭatvādavadhāryatē- yat- na tē parasparamupaghnanti| ēvambhūtaprabhāvatvē tu tēṣāmadr̥ṣṭamēva kāraṇaṁ, prāṇināṁ duḥkhajanakēna hyadr̥ṣṭēna tē’virōdhēna nivēśyantē, ata ēva vakṣyati- “viruddhairapi na tvētē guṇairghnanti parasparam| dōṣāḥ sahajasātmyatvāddhōraṁ viṣamahīniva” (ci. 26) iti| sahajaṁ daivavaśāt svābhāvikaṁ sātmyatvaṁ sahajasātmyatvam| anēna ca vyākhyānēna ‘yathā dōṣā anyōnyaṁ nōpaghnanti, tathā rasaraktādīnapi nōpahanyuḥ’ ityādi yaducyatē kaiścit, tat sarvaṁ nirastam| nanu, “kāladūṣyaprakr̥tibhirdōṣastulyō hi santatam| niṣpratyanīkaḥ kurutē” (ci. 3) iti cikitsitē vakṣyati, tēna prakr̥tirdōṣasya pratipakṣā bhavatītyuktaṁ, prakr̥tiśca janmaprabhr̥tivr̥ddhō vātādirucyatē, “dōṣānuśayitā hyēṣāṁ dēhaprakr̥tirucyatē” (sū. 7) ityādivacanāt; tadayaṁ prākr̥tēna dōṣēṇa dōṣasya virōdhaḥ kathaṁ tarhyupapannaḥ? ucyatē- tatra prakr̥tēḥ pratyanīkatā ananuguṇatvēna mantavyā, samānāṁ hi prakr̥tiṁ prāpya dōṣaḥ pravr̥ddhabalō bhavati, asamānāṁ tu prāpya tathā balavānna bhavati, nāsamānayā prakr̥tyā hanyatē; ēvamanyatrāpyunnēyam| ativr̥ddhēna vāyunāślēṣmaṇō durbalasya duṣṭatvādvirōdhō bhavatyēva kvacit, naitāvatā saṁsargasannipātāsambhavaḥ||62||

vātādīnāṁ rasādīnāṁ malānāmōjasastathā|
kṣayāstatrānilādīnāmuktaṁ saṅkṣīṇalakṣaṇam [30] ||63||
ghaṭṭatē sahatē śabdaṁ nōccairdravati [31] śūlyatē|
hr̥dayaṁ tāmyati svalpacēṣṭasyāpi rasakṣayē||64||
paruṣā sphuṭitā mlānā tvagrūkṣā raktasaṅkṣayē|
māṁsakṣayē viśēṣēṇa sphiggrīvōdaraśuṣkatā||65||
sandhīnāṁ sphuṭanaṁ glānirakṣṇōrāyāsa ēva ca|
lakṣaṇaṁ mēdasi kṣīṇē tanutvaṁ [32] cōdarasya ca||66||
kēśalōmanakhaśmaśrudvijaprapatanaṁ śramaḥ|
jñēyamasthikṣayē liṅgaṁ sandhiśaithilyamēva ca||67||
śīryanta iva cāsthīni durbalāni laghūni ca|
pratataṁ [33] vātarōgīṇi kṣīṇē majjani dēhinām||68||
daurbalyaṁ mukhaśōṣaśca pāṇḍutvaṁ sadanaṁ śramaḥ|
klaibyaṁ śukrāvisargaśca kṣīṇaśukrasya lakṣaṇam||69||
kṣīṇē śakr̥ti cāntrāṇi pīḍayanniva mārutaḥ|
rūkṣasyōnnamayan kukṣiṁ tiryagūrdhvaṁ ca gacchati||70||
mūtrakṣayē mūtrakr̥cchraṁ mūtravaivarṇyamēva ca|
pipāsā bādhatē cāsya mukhaṁ ca pariśuṣyati||71||
malāyanāni cānyāni śūnyāni ca laghūni ca|
viśuṣkāṇi ca lakṣyantē yathāsvaṁ malasaṅkṣayē||72||

sampratyaṣṭādaśakṣayānāha- vātādīnāmityādi| atra malānāmityanēna mūtrapurīṣayōḥ pañcēndriyamalānāṁ ca grahaṇam| viśēṣēṇētivacanādanyagātrāṇāmapi śuṣkatā labhyatē| sandhīnāmityādi bhēdaḥ- kṣayalakṣaṇam, kēśētyādi asthikṣayasya| bādhatē cāsyēti karmaṇi śēṣalakṣaṇā ṣaṣṭhī| malāyanānītyanēna pañcēndriyādhiṣṭhānānāṁ mukhanāsikācakṣuḥkarṇānāṁ tvagindriyādhiṣṭhānabhūtānāṁ ca lōmakūpaprajananānāṁ yathāsvaṁ malāyanāni gr̥hyantē| yaduktaṁ jatūkarṇē- “dōṣāṇāṁ dhātūnāmōjōmūtraśakr̥dindriyamalānām| aṣṭādaśakṣayāstē lakṣyāḥ svaguṇakriyānāśāt” iti||63-72||

bibhēti durbalō’bhīkṣṇaṁ dhyāyati vyathitēndriyaḥ|
duśchāyō durmanā rūkṣaḥ kṣāmaścaivaujasaḥ kṣayē||73||
hr̥di tiṣṭhati yacchuddhaṁ raktamīṣatsapītakam|
ōjaḥ śarīrē saṅkhyātaṁ tannāśānnā vinaśyati||74||
prathamaṁ jāyatē hyōjaḥ śarīrē’smiñcharīriṇām|
sarpirvarṇaṁ madhurasaṁ lājagandhi prajāyatē||75||
(bhramaraiḥ phalapuṣpēbhyō yathā sambhriyatē madhu|
tadvadōjaḥ svakarmabhyō guṇaiḥ sambhriyatē nr̥ṇām||1||)|

ōjaḥkṣayalakṣaṇamāha- bibhētītyādi| durmanā manōbalavihīnaḥ| ōjasō durjñēyatvēna lakṣaṇamāha- hr̥dītyādi| śuddhamiti śuklaṁ, raktamīṣaditi kiñcidraktaṁ, sapītakamiti īṣatpītakaṁ; tēna śuklavarṇamōjaḥ, raktapītau tu varṇāvatrānugatau; kiṁvā, īṣadityalpapramāṇaṁ, tēnāṣṭabindukamōja iti darśayati| yaduktaṁ tantrāntarē- “prāṇāśrayasyaujasō’ṣṭau bindavō hr̥dayāśrayāḥ” iti| ētaccāṣṭabindukaṁ paramōjō jñēyam, ardhāñjaliparimāṇaṁ tu yadōjastadapradhānaṁ; yacchārīrē vakṣyati- “tāvaccaiva ślaiṣmikasyaujasaḥ pramāṇam” (śā. 7) ityanēna; tasmāddvividhamihaujaḥ| ata ēvārthē daśamahāmūlīyē vakṣyati- “tat parasyaujasaḥ sthānaṁ” (sū. 30) iti; parasya śrēṣṭhasyāṣṭabindukasyētyarthaḥ| iha ca kṣayalakṣaṇamardhāñjalimānasyaiva jñaiyam, aṣṭabindukasya tvavayavanāśē’pi mr̥tyurbhavatīti hr̥dītyādinā granthēna darśayati| ētaccaujaḥ sarvadhātusamudāyarūpaṁ, tēna saptadhātuṣvēvāvaruddhamiti nāṣṭamadhātutvātiprasaktiḥ [34] ; ata ēva suśrutē’pyuktaṁ- “rasādīnāṁ śukrāntānāṁ dhātūnāṁ yat paraṁ tējastat khalvōjaḥ” (su. sū. 15) iti| anyatrāpyuktaṁ- “bhramaraiḥ phalapuṣpēbhyō yathā saṁhriyatē madhu| tadvadōjaḥ śarīrēbhyō guṇaiḥ saṁhriyatē nr̥ṇām” iti| ‘prathamaṁ jāyatē’ ityādipāṭhastu nātiprasiddhaḥ| ētē cāṣṭādaśa kṣayā āviṣkr̥tatamatvēnōktāḥ; tēna udakakṣayasvarakṣayādyanabhidhānaṁ nōdbhāvanīyam; uktaṁ hi- “svarakṣayamurōrōgaṁ” iti; tathōdakakṣayalakṣaṇaṁ yathā- “jihvātālvōṣṭhakaṇṭhaklōmasaṁśōṣaṁ pipāsāṁ cātivr̥ddhāṁ dr̥ṣṭvā udakavahānyasya srōtāṁsi praduṣṭānīti jānīyāt” (vi. 5) iti||73-75||

vyāyāmō’naśanaṁ cintā rūkṣālpapramitāśanam|
vātātapau bhayaṁ śōkō rūkṣapānaṁ prajāgaraḥ||76||
kaphaśōṇitaśukrāṇāṁ malānāṁ cātivartanam|
kālō bhūtōpaghātaśca jñātavyāḥ kṣayahētavaḥ||77||

sāmānyēna kṣayāṇāṁ hētumāha- vyāyāma ityādi| pramitāśanam ēkarasābhyāsaḥ| ativartanam atipravr̥ttiḥ, bahirgamanamiti yāvat| kālō vārdhakyamādānaṁ ca| bhūtōpaghātaḥ piśācādyupaghātaḥ| atra vātakṣayahēturnōktō vilakṣaṇatvāt, sa cācintanadivāsvapanādirjñēyaḥ; kiṁvā, anaśanāt kiṭṭābhāvaḥ, tataśca kiṭṭarūpasya vātasyāpyanutpādāt kṣayō jñēyaḥ||76-77||

gurusnigdhāmlalavaṇānyatimātraṁ samaśnatām|
navamannaṁ ca pānaṁ ca nidrāmāsyāsukhāni ca||78||
tyaktavyāyāmacintānāṁ saṁśōdhanamakurvatām|
ślēṣmā pittaṁ ca mēdaśca māṁsaṁ cātipravardhatē||79||
tairāvr̥tagatirvāyurōja [35] ādāya gacchati|
yadā bastiṁ tadā kr̥cchrō madhumēhaḥ pravartatē||80||
sa mārutasya pittasya kaphasya ca muhurmuhuḥ|
darśayatyākr̥tiṁ gatvā kṣayamāpyāyatē punaḥ||81||
upēkṣayā’sya jāyantē [36] piḍakāḥ sapta dāruṇāḥ|
māṁsalēṣvavakāśēṣu marmasvapi ca sandhiṣu||82||
śarāvikā kacchapikā jālinī sarṣapī tathā|
alajī vinatākhyā ca vidradhī cēti saptamī||83||
antōnnatā madhyanimnā śyāvā klēdaruganvitā|
śarāvikā syāt piḍakā śarāvākr̥tisaṁsthitā||84||
avagāḍhārtinistōdā mahāvāstuparigrahā|
ślakṣṇā kacchapapr̥ṣṭhābhā piḍakā kacchapī matā||85||
stabdhā sirājālavatī snigdhāsrāvā mahāśayā|
rujānistōdabahulā sūkṣmacchidrā ca jālinī||86||
piḍakā nātimahatī kṣiprapākā mahārujā|
sarṣapī sarṣapābhābhiḥ piḍakābhiścitā bhavēt||87||
dahati tvacamutthānē tr̥ṣṇāmōhajvarapradā|
visarpatyaniśaṁ duḥkhāddahatyagnirivālajī||88||
avagāḍharujāklēdā pr̥ṣṭhē vā’pyudarē’pi vā|
mahatī vinatā nīlā piḍakā vinatā matā||89||

samprati saptapiḍakā vaktavyāḥ, atastāsāṁ pradhānahētutvēna pramēhānēva tāvannidānādikramēṇāha- gurvityādi| navaṁ pānamiti navaṁ madyam| nidrāmāsyāsukhāni cētyatrāntē ‘bhajatāṁ’ iti śēṣaḥ| ōjaḥ prasādō dhātūnāmiti yāvat| kr̥cchr iti kr̥cchrasādhyaḥ| upēkṣayā acikitsayā| śarāvikādisañjñānvayō [37] vivaraṇē sphuṭaḥ| alajīsañjñā rūḍhā| ētāśca prādhānyāduktāḥ| tēna suśrutē’pi piḍakādhikyamuktaṁ yat, tanna virōdhi| sirājālaṁ sirāsamūhaḥ| citā adhiṣṭhitā||78-89||

vidradhiṁ dvividhāmāhurbāhyāmābhyantarīṁ tathā|
bāhyā tvaksnāyumāṁsōtthā kaṇḍarābhā mahārujā||90||
śītakānnavidāhyuṣṇarūkṣaśuṣkātibhōjanāt|
viruddhājīrṇasaṅkliṣṭaviṣamāsātmyabhōjanāt||91||
vyāpannabahumadyatvādvēgasandhāraṇācchramāt|
jihmavyāyāmaśayanādatibhārādhvamaithunāt||92||
antaḥśarīrē māṁsāsr̥gāviśanti [38] yadā malāḥ|
tadā sañjāyatē granthirgambhīrasthaḥ sudāruṇaḥ||93||
hr̥dayē klōmni yakr̥ti plīhni kukṣau ca vr̥kkayōḥ|
nābhyāṁ vaṅkṣaṇayōrvā’pi bastau vā tīvravēdanaḥ||94||
duṣṭaraktātimātratvāt sa vai śīghraṁ vidahyatē|
tataḥ śīghravidāhitvādvidradhītyabhidhīyatē||95||
vyadhacchēdabhramānāhaśabdasphuraṇasarpaṇaiḥ|
vātikīṁ, paittikīṁ tr̥ṣṇādāhamōhamadajvaraiḥ||96||
jr̥mbhōtklēśārucistambhaśītakaiḥ ślaiṣmikīṁ viduḥ|
sarvāsu ca [39] mahacchūlaṁ vidradhīṣūpajāyatē||97||
śastrāstrairbhidyata [40] iva cōlmukairiva dahyatē|
vidradhī vyamlatā yātā vr̥ścikairiva daśyatē||98||
tanu rūkṣāruṇaṁ śyāvaṁ phēnilaṁ vātavidradhī|
tilamāṣakulatthōdasannibhaṁ pittavidradhī||99||
ślaiṣmikī sravati śvētaṁ picchilaṁ bahalaṁ bahu|
lakṣaṇaṁ sarvamēvaitadbhajatē sānnipātikī||100||

vidradhiṁ dvividhāmityanēnābhyantaravidradhērapi vidradhitvēna piḍakānāṁ saptatvē’virōdha iti darśayati| kaṇḍarābhā sthūlasnāyvākārā| antarvidradhērgarīyastvēna nidānānyāha- śītakētyādi| saṅkliṣṭaṁ dōṣalam| vyāpannaṁ [41] ca bahu ca madyamupayuṅktē yaḥ sa vyāpannabahumadyaḥ| antaḥśarīra iti kōṣṭhē| malā dōṣāḥ| granthiriva granthiḥ| sa iti granthiḥ| vyadhādayō vyathāprakārāḥ [42] | śītamēva śītakam| vyamlatāṁ yātā vidāhaṁ prāptā| tamakaḥ śvāsabhēdaḥ||90-100||

athāsāṁ vidradhīnāṁ sādhyāsādhyatvaviśēṣajñānārthaṁ sthānakr̥taṁ liṅgaviśēṣamupadēkṣyāmaḥ- tatra pradhānamarmajāyāṁ vidradhyāṁ hr̥ddhaṭṭanatamakapramōhakāsaśvāsāḥ, klōmajāyāṁ pipāsāmukhaśōṣagalagrahāḥ, yakr̥jjāyāṁ śvāsaḥ, plīhajāyāmucchvāsōparōdhaḥ, kukṣijāyāṁ kukṣipārśvāntarāṁsaśūlaṁ, vr̥kkajāyāṁ pr̥ṣṭhakaṭigrahaḥ, nābhijāyāṁ hikkā, vaṅkṣaṇajāyāṁ sakthisādaḥ, bastijāyāṁ kr̥cchrapūtimūtravarcasatvaṁ [43] cēti||101||
pakvaprabhinnāsūrdhvajāsu mukhāt srāvaḥ sravati, adhōjāsu gudāt, ubhayatastu nābhijāsu||102||
āsāṁ hr̥nnābhibastijāḥ paripakvāḥ sānnipātikī ca maraṇāya; śēṣāḥ punaḥ kuśalamāśupratikāriṇaṁ cikitsakamāsādyōpaśāmyanti|
tasmādacirōtthitāṁ vidradhīṁ śastrasarpavidyudagnitulyāṁ snēhavirēcanairāśvēvōpakramēt sarvaśō gulmavaccēti||103||

kukṣipārśvāntarāṁsaśūlamiti kukṣipārśvāntarāṁsēṣu śūlam [44] | hr̥nnābhibastijāsu sānnipātikīṁ pr̥thak paṭhan sānnipātikīṁ pakvāmapakvāṁ cāsādhyāṁ darśayati| śastrādidr̥ṣṭāntatrayācchastravanmarmacchēdakatvaṁ, sarpavadāśusañjñāhāritvaṁ, vidyudagnivadāśumārakatvaṁ jñēyam||101-103||

bhavanti cātra-
vinā pramēhamapyētā jāyantē duṣṭamēdasaḥ|
tāvaccaitā na lakṣyantē yāvadvāstuparigrahaḥ||104||
śarāvikā kacchapikā jālinī cēti duḥsahāḥ|
jāyantē tā hyatibalāḥ prabhūtaślēṣmamēdasaḥ||105||
sarṣapī cālajī caiva vinatā vidradhī ca yāḥ|
sādhyaḥ pittōlbaṇāstāstu sambhavantyalpamēdasaḥ||106||
marmasvaṁsē gudē pāṇyōḥ stanē sandhiṣu pādayōḥ|
jāyantē yasya piḍikāḥ sa pramēhī na jīvati||107||

pramēhaṁ vinā’pyuktapiḍakāsambhavaṁ darśayati- vinētyādi| ētēna ca piḍakānāṁ mādhumēhikatvaṁ yat pūrvamuktaṁ tat prāyikatvēna jñēyam| vāstu sthānam| vidradhī cēti bāhyavidradhī||104-107||

tathā’nyāḥ piḍakāḥ santi raktapītāsitāruṇāḥ|
pāṇḍurāḥ pāṇḍuvarṇāśca bhasmābhā mēcakaprabhāḥ||108||
mr̥dvyaśca kaṭhināścānyāḥ sthūlāḥ sūkṣmāstathā’parāḥ|
mandavēgā mahāvēgāḥ svalpaśūlā mahārujaḥ||109||
tā buddhvā mārutādīnāṁ yathāsvairhētulakṣaṇaiḥ|
brūyādupacarēccāśu prāgupadravadarśanāt||110||
tr̥ṭśvāsamāṁsasaṅkōthamōhahikkāmadajvarāḥ|
vīsarpamarmasaṁrōdhāḥ piḍakānāmupadravāḥ||111||

pramēhapiḍakāprasaṅgēnānyāsāmapi piḍakānāmāviṣkr̥tānāṁ lakṣaṇaṁ brūtē- tathā’nyā ityādi| pāṇḍurā dhūsarāḥ, pāṇḍuvarṇāstu rūkṣapāṇḍuvarṇā jñēyāḥ| mēcakaprabhāḥ snigdhakr̥ṣṇavarṇāḥ| upacarēccēti mārutādīnāṁ bhēṣajairityarthādbhavati| prāgupadravadarśanādityanēna upadravayuktā piḍakā asādhyēti darśayati| saṅkōthaḥ pūtibhāvaḥ||108-111||

kṣayaḥ sthānaṁ ca vr̥ddhiśca dōṣāṇāṁ trividhā gatiḥ|
ūrdhvaṁ cādhaśca tiryakca vijñēyā trividhā’parā||112||
trividhā cāparā kōṣṭhaśākhāmarmāsthisandhiṣu|
ityuktā vidhibhēdēna dōṣāṇāṁ trividhā gatiḥ||113||

samprati dōṣāṇāṁ gatiṁ vivr̥ṇōti- kṣaya ityādi| sthānaṁ svamānavasthānam| gatiḥ prakārō’vasthā vā| caya ityatra praśabdō luptanirdiṣṭaḥ, tēna prakr̥ṣṭacayaḥ; ēvaṁ prakr̥ṣṭaḥ kōpaḥ prakōpaḥ; ēvaṁ praśamō’pi| ētēna varṣādiṣu pittādīnāṁ prakr̥ṣṭaścayō bhavatīti darśyatē, itaradōṣasyāpi ca stōkamātrēṇa cayō yathāsambhavaṁ sūcyatē; tēna śaradyanubalatvēna kaphaprakōpō bhavatītyādi gr̥hītaṁ bhavati||112-113||

cayaprakōpapraśamāḥ pittādīnāṁ yathākramam|
bhavantyēkaikaśaḥ ṣaṭsu kālēṣvabhrāgamādiṣu||114||
gatiḥ kālakr̥tā caiṣā cayādyā punarucyatē|115|

yathākramamiti varṣāśaraddhēmantavasantagrīṣmaprāvr̥ṭkramēṇa; kiṁvā yathākramamiti yathāyōgyatayā| pittādīnāmiti pittaślēṣmavātānām| ēkaikaśa iti ayaugapadyēna| ētacca prādhānyēnaiva jñēyaṁ, tēna prāvr̥ṣi ślēṣmapittakōpēnāpradhānēna na vyabhicāraḥ| yaduktaṁ- “varṣāsvagnibalē hīnē kupyanti pavanādayaḥ” (sū.a.6) iti| atra hi pavanādaya iti pavanapradhānāḥ; ēvaṁ vasantē vātapittaprakōpē vyākhyēyam| atra ca ṣaṭsu r̥tuṣu pittaślēṣmavātānāṁ prabalacayādayō vibhajyamānatvēna; tēna pittacayakālē vātasya kōpaḥ, śaradi pittasya prakōpakālē vātapraśamaḥ, hēmantē pittapraśamaḥ kaphasya cayaḥ, vasantē tu kaphaprakōpa ēva paraṁ, tathā kaphapraśamakē grīṣmē vātacaya iti ca syāt| vātaṁ parityajya pittādīnāmityabhidhānāṁ visargasyābhiprētatvēnāgrē vaktavyatvāt kr̥taṁ, visargē ca pittacaya ēva bhavatīti kr̥tvā||114||-

gatiśca dvividhā dr̥ṣṭā prākr̥tī vaikr̥tī ca yā||115||
pittādēvōṣmaṇaḥ paktirnarāṇāmupajāyatē|
tacca pittaṁ [45] prakupitaṁ vikārān kurutē bahūn||116||
prākr̥tastu balaṁ ślēṣmā vikr̥tō mala ucyatē|
sa caivaujaḥ smr̥taḥ kāyē sa ca pāpmōpadiśyatē||117||
sarvā hi cēṣṭā vātēna sa prāṇaḥ prāṇīnāṁ smr̥taḥ|
tēnaiva rōgā jāyantē tēna caivōparudhyatē||118||

gatibhēdāntaramāha- gatiścētyādi| atra pittamādau [46] kr̥taṁ śarīrasthitihētvagnikartr̥tvēna| paktiḥ pākaḥ| balamiti balahētutvēna| mala iti śarīramalinīkaraṇāt| ōja iti sārabhūtaṁ; yadi vā dvitīyaślaiṣmikaujōhētutvēnaujaḥ| vakṣyati hi śārīrē- “tāvaccaiva ślaiṣmikasyaujasaśca pramāṇam” (śā.a.7) iti| duḥkhahētutvāt pāpmā| sarvā hi cēṣṭā iti avikr̥tagamanādyāḥ| uparudhyatē mriyatē||115-118||

nityaṁ sannihitāmitraṁ samīkṣyātmānamātmavān|
nityaṁ yuktaḥ paricarēdicchannāyuranitvaram||119||

ātmavāniti praśaṁsāyāṁ matuppratyayaḥ| yukta ityudyuktaḥ| anitvaram agatvaram||119||

tatra ślōkau-
śirōrōgāḥ sahr̥drōgā rōgā mānavikalpajāḥ|
kṣayāḥ sapiḍakāścōktā dōṣāṇāṁ gatirēva ca||120||
kiyantaḥśirasīyē’sminnadhyāyē tattvadarśinā|
jñānārthaṁ bhiṣajāṁ caiva prajānāṁ ca hitaiṣiṇā||121||

tatra ślōkāvityādi||120-121||

ityagnivēśakr̥tē tantrē carakapratisaṁskr̥tē ślōkasthānē kiyantaḥśirasīyō nāma saptadaśō’dhyāyaḥ||17||

iti śrīcakrapāṇidattaviracitāyāṁ carakatātparyaṭīkāyāmāyurvēdadīpikāyāṁ sūtrasthānē rōgacatuṣkē kiyantaḥśirasīyō nāma saptadaśō’dhyāyaḥ||17||

1. ‘hutāśavēśavacanaṁ’ iti pā.|
2. ‘gatirvakṣyāmi vistaram’ iti pā.|
3. ‘śirōbhitāpāt’ iti pā.|
4. ‘abhyarhitatvaṁ’ iti pā.|
5. ‘tīkṣṇāghrāṇāt’ iti pā.|
6. ‘śirōgatā vai dhamanīrvāyurāviśya kupyati’ iti pā.|
7. ‘ghāṭā grīvāyāḥ paścādbhāgaḥ, ‘ghāḍa’ iti yasyāpabhraṁśaḥ’|
8. ‘bhruvōrmadhyaṁ’ iti pā.|
9. ‘bādhyētē’ iti pā.|
10. ‘vr̥ttatvāt prasiddhatvāt’|
11. ‘sukhāyatē’ iti pā.|
12. ‘chēdavyadhanarukkaṇḍūśōphadaurgandhyaduḥkhitam’ iti pā.|
13. ‘lakṣaṇēna ca’ iti pā.|
14. ‘…śītarūkṣālpabhōjanaiḥ’ iti pā.|
15. yōgīndranāthasēnastu ‘dravaḥ’ iti paṭhati, ‘dravaḥ drutatvaṁ’ iti ca vyākhyānayati|
16. ‘saṁsargēṇa navaitē ṣaḍēkavr̥ddhyā’ iti pā.|
17. ‘vyādhīnāṁ dvyadhikā ṣaṣṭirityuktaṁ vivr̥ṇōti- dvyulbaṇaikōlbaṇairiti| vr̥ddhairdōṣaiḥ pañcaviṁśatirvyādhayō bhavanti| tadyathā- sannipātē trayōdaśa, saṁsargē nava, pr̥thak trayaścēti| dvyulbaṇaikōlbaṇairdōṣaiḥ ṣaṭḥ, sannipatitānāṁ dōṣāṇāṁ madhyē dvayōratiśayē trayaḥ, ēkasyātiśayē trayaḥ, iti dvyulbaṇaikōlbaṇaiḥ ṣaṭ| hīnamadhyādhikaiḥ sannipatitaiḥ ṣaṭ| samaiḥ tulyavr̥ddhairdōṣaiścaikaḥ, iti sannipātāḥ trayōdaśa| tathāca- kaphaḥ vr̥ddhaḥ vātapittē adhikavr̥ddhē 1, pittaṁ vr̥ddhaṁ vātakaphāvadhikavr̥ddhau 2, vātō vr̥ddhaḥ pittakaphāvadhikavr̥ddhau 3, iti dvyulbaṇaistrayaḥ| pittakaphau vr̥ddhau vātō’dhikavr̥ddhaḥ 1, vātakaphau vr̥ddhau pittamadhikavr̥ddhaṁ 2, vātapittē vr̥ddhē kaphau’dhikavr̥ddhaḥ 3, iti ēkōlbaṇaistrayaḥ| vātō vr̥ddhaḥ pittaṁ vr̥ddhataraṁ ślēṣmā vr̥ddhatamaḥ 1, vātō vr̥ddhaḥ ślēṣmā vr̥ddhataraḥ pittaṁ vr̥ddhatamaṁ 2, pittaṁ vr̥ddhaṁ ślēṣmā vr̥ddhataraḥ vātō vr̥ddhatamaḥ 3, pittaṁ vr̥ddhaṁ vātō vr̥ddhataraḥ ślēṣmā vr̥ddhatamaḥ 4, ślēṣmā vr̥ddhō vātō vr̥ddhataraḥ pittaṁ vr̥ddhatamaṁ 5, ślēṣmā vr̥ddhaḥ pittaṁ vr̥ddhataraṁ vātō vr̥ddhatamaḥ 6, iti hīnamadhyādhikaiḥ ṣaṭ| tulyavr̥ddhā vātapittaślēṣmāṇa iti samairēkaḥ| saṁsargēṇa nava| tatra ēkavr̥ddhyā ṣaṭ, samaiśca trayaḥ| saṁsr̥ṣṭayōrdōṣayōrmadhyē ēkasya vr̥ddhyā atiśayēna ṣaṭ| tadyathā- vātō vr̥ddhaḥ pittaṁ vr̥ddhataraṁ 1, pittaṁ vr̥ddhaṁ vātō vr̥ddhataraḥ 2, ślēṣmā vr̥ddhaḥ pittaṁ vr̥ddhataraṁ 3, pittaṁ vr̥ddhaṁ ślēṣmā vr̥ddhataraḥ 4, vātō vr̥ddhaḥ ślēṣmā vr̥ddhataraḥ 5, ślēṣmā vr̥ddhō vātō vr̥ddhataraḥ 6, iti ēkavr̥ddhyā ṣaṭ| samairdōṣayōḥ samānavr̥ddhyā trayaḥ| tadyathā- vātapittābhyāṁ vr̥ddhābhyāmēkaḥ, vātaślēṣmabhyāṁ vr̥ddhābhyāṁ dvitīyaḥ, pittaślēṣmabhyāṁ vr̥ddhābhyāṁ tr̥tīyaḥ, iti saṁsargēṇa nava| pr̥thak vyastairvr̥ddhaistrayaḥ| tadyathā- vātō vr̥ddhaḥ, pittaṁ vr̥ddhaṁ, ślēṣmā vr̥ddhaḥ, ēvaṁ vr̥ddhaiḥ pañcaviṁśatiḥ| vr̥ddhyā pañcaviṁśatimuktvā kṣayē’pi pañcaviṁśatiṁ darśayati- yathētyādi| yathā vr̥ddhairdōṣaiḥ pañcaviṁśatistathā kṣīṇairapi pañcaviṁśatirvikārāḥ syuḥ| sannipātē trayōdaśaḥ, saṁsargē nava, pr̥thak trayaścēti| tadyathā- vātaḥ kṣīṇaḥ pittaślēṣmāṇāvatikṣīṇau 1, pittaṁ kṣīṇaṁ vātaślēṣmāṇāvatikṣīṇau 2, ślēṣmā kṣīṇaḥ, vātapittē atikṣīṇē 3, iti kṣīṇānāṁ sannipatitānāṁ madhyē dvayōratiśayē trayaḥ| vātapittē kṣīṇē ślēṣmā atikṣīṇaḥ 1, pittaślēṣmāṇau kṣīṇau vātō’tikṣīṇaḥ 2, vātaślēṣmāṇau kṣīṇau pittamatikṣīṇam 3, iti ēkasyātiśayē trayaḥ| ślēṣmā kṣīṇaḥ pittaṁ kṣīṇataraṁ vātaḥ kṣīṇatamaḥ 1, vātaḥ kṣīṇaḥ ślēṣmā kṣīṇataraḥ pittaṁ kṣīṇatamaṁ 2, pittaṁ kṣīṇaṁ ślēṣmā kṣīṇatarō vātaḥ kṣīṇatamaḥ 3, ślēṣmā kṣīṇō vātaḥ kṣīṇataraḥ pittaṁ kṣīṇatamaṁ 4, vātaḥ kṣīṇaḥ pittaṁ kṣīṇataraṁ ślēṣmā kṣīṇatamaḥ 5, pittaṁ kṣīṇaṁ vātaḥ kṣīṇataraḥ ślēṣmā kṣīṇatamaḥ 6, iti hīnamadhyādhikaiḥ ṣaṭ| kṣīṇā vātapittaślēṣmāṇa iti samaiḥ kṣīṇarēkaḥ| ētē trayōdaśa sannipātāḥ| saṁsargēṇa nava| tatra kṣīṇayōrēkasyātiśayē ṣaṭ| tadyathā- vātaḥ kṣīṇaḥ pittaṁ kṣīṇataraṁ 1, pittaṁ kṣīṇaṁ vātaḥ kṣīṇataraḥ 2, vātaḥ kṣīṇaḥ ślēṣmā kṣīṇataraḥ 3, ślēṣmā kṣīṇaḥ vātaḥ kṣīṇataraḥ 4, ślēṣmā kṣīṇaḥ pittaṁ kṣīṇataraṁ 5, pittaṁ kṣīṇaṁ ślēṣmā kṣīṇataraḥ 6| tulyakṣīṇābhyāṁ trayaḥ| tadyathā- kṣīṇē vātapittē 1, kṣīṇau pittaślēṣmāṇau 2, kṣīṇau vātaślēṣmāṇau 3, iti saṁsargēṇa nava| pr̥thak trayaḥ- vātaḥ kṣīṇaḥ 1, pittaṁ kṣīṇaṁ 2, ślēṣmā kṣīṇaḥ 3, ēvaṁ kṣīṇaiḥ pañcaviṁśatiḥ| sannipatitānāṁ dōṣāṇāṁ yugapadvr̥ddhikṣayakr̥tō’nyō vikalpō bhēda upadiśyatē| tamēva vikalpaṁ darśayati- vr̥ddhiriti| ēkasya vr̥ddhiḥ, ēkasya samatā, ēkasya ca saṅkṣayaḥ| vātō vr̥ddhaḥ pittaṁ samaṁ ślēṣmā kṣīṇaḥ 1, vātō vr̥ddhaḥ ślēṣmā samaḥ pittaṁ kṣīṇaṁ 2, pittaṁ vr̥ddhaṁ vātaḥ samaḥ ślēṣmā kṣīṇaḥ 3, pittaṁ vr̥ddhaṁ ślēṣmā samaḥ vātaḥ kṣīṇāḥ 4, ślēṣmā vr̥ddhaḥ vātaḥ samaḥ pittaṁ kṣīṇaṁ 5, ślēṣmā vr̥ddhaḥ pittaṁ samaṁ vātaḥ kṣīṇaḥ 6| dvandvavr̥ddhiḥ dvayōrvr̥ddhiḥ, ēkasya ca kṣayaḥ, ēkasya vr̥ddhirdvayōśca kṣayaḥ, atrāpi ṣaṭ| tadyathā- ślēṣmapittē vr̥ddhē vātaḥ kṣīṇaḥ 1, ślēṣmavātau vr̥ddhau pittaṁ kṣīṇaṁ 2, vātapittē vr̥ddhē ślēṣmā kṣīṇaḥ 3, iti dvandvavr̥ddhyā ēkasya kṣayēṇa trayaḥ| ślēṣmā vr̥ddhaḥ vātapittē kṣīṇē 1, pittaṁ vr̥ddhaṁ ślēṣmavātau kṣīṇau 2, vāyurvr̥ddhaḥ pittaślēṣmāṇau kṣīṇau 3, iti ēkavr̥ddhyā dvayōḥ kṣayēṇa trayaḥ| vr̥ddhaiḥ pañcaviṁśatiḥ kṣīṇaiḥ pañcaviṁśatiriti pañcāśat, vr̥ddhikṣayasamatākr̥tāḥ ṣaṭ, vr̥ddhikṣayakr̥tāśca ṣaṭ, ēvaṁ dviṣaṣṭiḥ’| iti carakōpaskārē yōgīndranāthasēnaḥ|
18. ‘ēkavr̥ddhirityādinā’pi trayaḥ’ iti pā.|
19. ‘sāmyē sthitaṁ’ iti pā.|
20. ‘prakr̥tisthaṁ yadā vātaṁ’ iti pā.|
21. ‘prakr̥tisthaṁ kaphaṁ’ iti pā.|
22. ‘prakr̥tisthaṁ yadā vātaṁ ślēṣmā pittaparikṣayē| sannirundhyāttadā kuryācchītakaṁ gauravaṁ jvaram’ iti pā.|
23. ‘prakr̥tisthaṁ yadā pittaṁ ślēṣmā mārutasaṅkṣayē| sannirundhyāttadā kuryānmr̥dvagnitvaṁ śirōgraham’ iti pā.|
24. ‘vēpayatyatha mānavam’ iti pā.|
25. ‘tatra tatrēti’ iti pā.|
26. ‘nōdbhāvanīyamiti pāṭhastu na samīcīnaḥ ‘tēnaitēṣāṁ taratamādibhēdēna rasarudhirādisaṁsargabhēdēna agaṇyatvamēva jñēyaṁ, uktaṁhi- “saṁsargādrasarudhirādibhistathaiṣāṁ dōṣāṁstu kṣayasamatāvivr̥ddhibhēdāt| ānantyaṁ taratamayōgataśca yātāñjānīyādavahitamānasō yathāsvam” (vā. sū. 12)’ iti śivadāsasēnēna vyākhyātatvāt|
27. ‘virōdhaḥ’ iti pā.|
28. ‘bhavati’ iti pā.|
29. ‘prabhāvōtpāditaviṣayavyatirēkē’ iti pā.|
30. ‘ca kṣīṇalakṣaṇam’ iti pā.|
31. ‘dravati iti hr̥dayaṁ dhugadhugiti karōti’ iti śivadāsasēnaḥ|
32. ‘tanutvaṁ tōdanaṁ tvacaḥ’ iti pā.|
33. ‘viśuṣkāṇi ca lakṣyantē’ iti pā.|
34. ‘nāṣṭadhātutvādiprasaktiḥ’ iti pā.|
35. ‘tairāvr̥taḥ prasādaṁ ca gr̥hītvā yāti mārutaḥ’ iti pā.|
36. ‘bhavantyupēkṣayā tasya’ iti pā.|
37. ‘śarāvikādisañjñā svayōnivivaraṇē sphuṭā’ iti pā.|
38. ‘māṁsāsr̥k praviśanti’ iti pā.|
39. ‘sarvāsvāsu’ iti pā.|
40. ‘taptaiḥ śastrairyathā mathyētōlmukairiva dahyatē’ iti pā.| ulmukamaṅgāram|
41. ‘vyāpannam asamyaksandhānādinā vikr̥timāpannam’|
42. ‘vyathāviśēṣāḥ’ iti pā.|
43. ‘kr̥cchramūtratā, pūtivarcastvaṁ ca’ iti pā.|
44. ‘kukṣipārśvamadhyēṁ’sē śūlaṁ’ iti pā.|
45. ‘pittaṁ caigha’ iti pā.|
46. ‘pittamagrē’ iti pā.|