athātaḥ snēhādhyāyaṁ vyākhyāsyāmaḥ||1||
iti ha smāha bhagavānātrēyaḥ||2||

nirdēśavātakalākalīyē vātādayō’bhihitāḥ, tēṣāṁ bhēṣajaṁ yathā kalpanīyaṁ tadupadēṣṭuṁ kalpanācatuṣkō’bhidhīyatē| bhēṣajānāṁ kalpanā bhēṣajakalpanā, sā ca kalpanā āśrayadravyābhidhānaṁ vinā na pāryatē kalpayitum [1] ; ataḥ snēhādidravyagōcarā snēha-svēda-vamana-virēcanakalpanēhābhidhīyatē, bastikalpanā tviha bahuvaktavyatvānnōktā| atrāpi vamanādipravr̥ttau snēhasyaiva prathamaṁ vidhīyamānatayā tathā dōṣapradhānasya vātasya pradhānabhēṣajatvācca tatpratipādaka ēva snēhādhyāyō’bhidhīyatē| snēhasya pratipādakō’dhyāyaḥ snēhādhyāyaḥ||1-2||

sāṅkhyaiḥ saṅkhyātasaṅkhyēyaiḥ sahāsīnaṁ punarvasum|
jagaddhitārthaṁ papraccha vahnivēśaḥ svasaṁśayam||3||

saṅkhyā samyagjñānaṁ, tēna vyavaharantīti sāṅkhyāḥ| saṅkhyātaṁ jñātaṁ saṅkhyēyaṁ jñēyaṁ yaistē tathā; yadi vā ‘saṅkhyātasaṅkhyēyam’ iti pāṭhaḥ, tadā punarvasuviśēṣaṇamētat; arthastu samānaḥ| sāṅkhyaiḥ sahāvasthānōpadarśanamātrēyasya kartavyapraśnānuguṇamanaḥsamādhānōpadarśanārtham| saṁśayamiti saṁśayēna [2] viṣayiṇā viṣayaṁ lakṣayati, tēna saṁśayamiti saṁśayaviṣayamityarthaḥ||3||

kiṁyōnayaḥ kati snēhāḥ kē ca snēhaguṇāḥ pr̥thak|
kālānupānē kē kasya kati kāśca vicāraṇāḥ||4||
kati mātrāḥ kathammānāḥ kā ca kēṣūpadiśyatē|
kaśca kēbhyō hitaḥ snēhaḥ prakarṣaḥ snēhanē ca kaḥ||5||
snēhyāḥ kē kē na ca snigdhāsnigdhātisnigdhalakṣaṇam|
kiṁ pānāt prathamaṁ pītē jīrṇē kiñca hitāhitam||6||
kē mr̥dukrūrakōṣṭhāḥ kā vyāpadaḥ siddhayaśca kāḥ|
acchē saṁśōdhanē caiva snēhē kā vr̥ttiriṣyatē||7||
vicāraṇāḥ kēṣu yōjyā vidhinā kēna tat prabhō!|
snēhasyāmitavijñāna jñānamicchāmi vēditum||8||

kō’sau saṁśaya ityāha- kiṁyōnaya ityādi| kiṁyōnayaḥ kimādhārakāraṇāḥ| kālaścānupānaṁ ca kālānupānē| vicāraṇā dravyāntarāsaṁyuktasnēhapānaṁ varjayitvā snēhōpayōgaḥ| kathammānā kīdr̥ṅmānā| kā cēti mātrā| prakarṣaḥ kālaprakarṣaḥ| snēhanē snēhayuktikriyāyām| kē nacēti kē na ca snēhyāḥ  kiṁ pānāt snēhapānāt prathamaṁ pūrvaṁ hitāhitaṁ; kiñca pītē snēhē tathā jīrṇē ca snēhē hitāhitamiti yōjyam| siddhayō vyāpatsādhanāni bhēṣajāni| acchē iti saṁśōdhanapr̥thaṅnirdēśādgōbalīvardanyāyēna saṁśamana iti bhavati| vr̥ttiriti vr̥ttiḥ upacāravidhānam| jñānaṁ śāstram||4-8||

atha tatsaṁśayacchēttā pratyuvāca punarvasuḥ|
snēhānāṁ dvividhā saumya yōniḥ sthāvarajaṅgamā||9||
tilaḥ priyālābhiṣukau bibhītakaścitrābhayairaṇḍamadhūkasarṣapāḥ|
kusumbhabilvārukamūlakātasīnikōcakākṣōḍakarañjaśigrukāḥ||10||
snēhāśayāḥ sthāvarasañjñitāstathā syurjaṅgamā matsyamr̥gāḥ sapakṣiṇaḥ|
tēṣāṁ dadhikṣīraghr̥tāmiṣaṁ vasā snēhēṣu majjā ca tathōpadiśyatē||11||

abhiṣuka auttarāpathikaḥ| citrā gōrakṣakarkaṭī, tadbījamiha; yadi vā citrā lōhitairaṇḍaḥ| atasī ‘umā’ iti khyātā [3] | ārukanikōcakākṣōḍā auttarāpathikāḥ| snēhāśayāḥ snēhasthānāni| ētē cāviṣkr̥tatamatvēnōktāḥ, tēna nimbatailādayō bōddhavyāḥ| āmiṣaṁ māṁsam||9-11||

sarvēṣāṁ tailajātānāṁ tilatailaṁ viśiṣyatē|
balārthē snēhanē cāgryamairaṇḍaṁ tu virēcanē||12||
(kaṭūṣṇaṁ tailamairaṇḍaṁ vātaślēṣmaharaṁ guru |
kaṣāyasvādutiktaiśca yōjitaṁ pittahantrapi ||1||)|

tailajātānāmiti jātaśabdaḥ prakāravacanaḥ; yathā- “yadāhārajātamagnivēśa” (sū.a.25) ityādi| atra yadyapi yōgāttilabhavamēva tailaṁ, tathā’pi rūḍhyēha sarva ēva sthāvarasnēhāstailamityucyantē| yaduktaṁ suśrutē- “niṣpattēstadguṇatvācca tailatvamitarēṣvapi” (su.sū.a.45) iti| viśiṣyatē atiricyatē| agryamityairaṇḍēna sambadhyatē||12||

sarpistailaṁ vasā majjā sarvasnēhōttamā matāḥ|
ēṣu caivōttamaṁ sarpiḥ saṁskārasyānuvartanāt||13||

sarvasnēhōttamā ityatra sarvaśabdēna dadhikṣīrādayō gr̥hyantē; sarvasnēhōttamatvaṁ ca sarpirādīnāṁ snēhaguṇaprakarṣavattvēna saṁskārō guṇāntarārōpaṇaṁ, tasyānuvartanamanuvidhānaṁ svīkaraṇamiti yāvat| ētaduktaṁ bhavati- yat- na tathā tailādayō dravyāntarasaṁskr̥tāḥ saṁskāraguṇān vahanti yathā sarpiriti| ata ēvōktaṁ- “nānyaḥ snēhastathā kaścit saṁskāramanuvartatē| yathā sarpirataḥ sarpiḥ sarvasnēhōttamaṁ matam” (ni. a.1)| ata ēva saṁskārakadravyacitrakādiguṇānuvidhānē’pi sarpirna svaguṇān snēhaśaityādīn jahāti, kiñca svaguṇān tadguṇāṁśca vahati, yatō’nuśabdēna paścādvācinā svaguṇavartanasya paścāt saṁskārakaguṇavartanamucyatē| ata ēvōktaṁ- “snēhādvātaṁ śamayati pittaṁ mādhuryaśaityataḥ| ghr̥taṁ tulyaguṇaṁ dōṣaṁ saṁskārāttu jayēt kapham” (ni. a.1) iti| na ca vācyaṁ rūkṣōṣṇacitrakādisaṁskārādrūkṣōṣṇaṁ sarpirbhūtaṁ, tataśca sarpiṣaḥ snēhaśaityē tadviruddhē kathaṁ tiṣṭhataḥ? iti; yataḥ sarpiḥsambaddhacitrakāvayavānugataṁ hi rūkṣōṣṇatvaṁ, sarpirgatē ca snēhaśaityē iti bhinnāśrayatvānna virōdhaḥ; idamēva ca sarpiṣaḥ saṁskārānuvartanaṁ yat- svaguṇaviruddhasyāpi tasyānupaghātēna dhāraṇaṁ; saṁskārakacitrakādiguṇavahanē’pi sarpiṣaḥ śaityādayaḥ kadācidabhibhūyantē saṁskārakaguṇairuṣṇādibhirna punaḥ snēhaguṇaḥ, tasya snēhēṣu sarvātmanā vyavasthitasya prabalatvāt; ata ēva sarpirādayaḥ snēhapradhānatvāt ‘snēhā’ ityucyantē| anyē tu saṁskārānuvartanaṁ svaguṇōpaghātēna saṁskārakaguṇavahanaṁ bruvatē, ētacca tailē tiṣṭhati na sarpiṣīti vadanti; sarpiṣi tu saṁskārānuvartanamuktaṁ yat tat sarpiṣi sarvathā kasyacidguṇasya saṁskāraguṇēnānupaghātādbhavati [4] ; tathāhi- dāhapraśamanārthaṁ jvarē candanādiśītadravyasādhitatailamuktaṁ, yataḥ śītēna sādhitaṁ tailamuṣṇamapi svabhāvācchītamēva bhavatīti||13||

ghr̥taṁ pittānilaharaṁ rasaśukraujasāṁ hitam|
nirvāpaṇaṁ mr̥dukaraṁ svaravarṇaprasādanam||14||
mārutaghnaṁ na ca ślēṣmavardhanaṁ balavardhanam|
tvacyamuṣṇaṁ sthirakaraṁ tailaṁ yōniviśōdhanam||15||
viddhabhagnāhatabhraṣṭayōnikarṇaśirōruji|
pauruṣōpacayē snēhē vyāyāmē cēṣyatē vasā||16||
balaśukrarasaślēṣmamēdōmajjavivardhanaḥ|
majjā viśēṣatō’sthnāṁ ca balakr̥t snēhanē hitaḥ||17||

snēhaguṇānabhidhattē- ghr̥tamityādi| nirvāpaṇaṁ dāhapraśamanam| mārutaghnamityādi tailaguṇāḥ| sthirakaram aṅgasthairyakaram| viddhētyādi vasāguṇāḥ| pauruṣōpacayaḥ śukrōpacayaḥ| snēhē śarīrasnēhanē kartavyē| balaśukrētyādi majjaguṇāḥ||14-17||

sarpiḥ śaradi pātavyaṁ vasā majjā ca mādhavē|
tailaṁ prāvr̥ṣi nātyuṣṇaśītē snēhaṁ pibēnnaraḥ||18||

sarpirādipānakālamāha- sarpiḥ śaradītyādi| mādhavē vaiśākhē| prāvr̥ḍāṣāḍhaśrāvaṇau, yaduktaṁ- “prāvr̥ṭ śukranabhau jñēyau” (si.a.6) iti| śaradi bahupittatvēna pittaviruddhaṁ ghr̥tamēva yaugikaṁ, nānyastailādiḥ| vasāmajjñōstu nātiśītōṣṇatvāt sādhāraṇē; yatastayōranupānē śītatvēna vōṣṇatvēna vā nirdēśō na kr̥taḥ; “yathāsattvaṁ tu śaityauṣṇyē vasāmajjñōrvinirdiśēt” (sū.a.27) iti tu vacanēna śaityauṣṇyābhidhānaṁ sāmānyēna, tailasarpirvadauṣṇyaśaityānabhidhānānna prakarṣaprāptaśaityōṣṇatvaprāpakam| ata ēvōktaṁ- “tailavasāmajjasarpiṣāṁ tu yathāpūrvaṁ śrēṣṭhatvaṁ vātaślēṣmavikārēṣu bhavati, yathōttaraṁ pittavikārēṣu” (vi.a.8) iti| atrōttarasya sarpiṣaḥ śaityāt pittaharatvaṁ, tailasya tūṣṇatvādvātaślēṣmaharatvaṁ, vasāmajjñōstu sādhāraṇatvēna madhyagatatvamiti sthitam| ēvaṁ vasāmajjñōḥ sādhāraṇatvēna tathā balyatvadhātuvr̥ddhikaratvābhyāmanatiśītōṣṇē tathā balakṣayadhātukṣayayuktē mādhavē prayōgō yuktaḥ| caitrastu mukhyasādhāraṇaguṇō’pi prabhūtaślēṣmatayā na snēhaviṣaya ityanuktaḥ| sāmānyēna snēhōpayōgē śastaṁ kālamāha- nātyuṣṇētyādi| nātyuṣṇē grīṣmē, nātiśītē hēmantē śiśirē ca tathā varṣajanitaśaityē varṣākālē| ayaṁ cānātyayikavikārē sati kālaniyamō jñēyaḥ, agrē uṣṇē śītē ca kālē snēhōpadēśāt||18||

vātapittādhikō rātrāvuṣṇē cāpi pibēnnaraḥ|
ślēṣmādhikō divā śītē pibēccāmalabhāskarē||19||

kālaviśēṣē dōṣaviśēṣē ca pānakramaṁ darśayati- vātētyādinā| vātaśca pittaṁ ca vātapittaṁ, tadadhikō vātapittādhikaḥ| rātrāviti sāyam| uṣṇē grīṣmē| ślēṣmādhikagrahaṇamatyantaśītavikāragr̥hītapuruṣōpalakṣaṇārthaṁ, tēna vātaślēṣmādhikaḥ ślēṣmādhikaśca gr̥hyatē; ata ēva suśrutē’pyuktaṁ- “vātapittādhikō rātrau vātaślēṣmādhikō divā” (su.ci.31) iti| kēvalavātādhikasya tathā pittādhikasya ślēṣmādhikasya ca sādhāraṇē śaradādau kālē utsargasiddha ēva pānakālō vakṣyamāṇō bhavati| vakṣyati hi- “pibēt saṁśamanaṁ snēhamannakālē” ityādi| anyē tu bruvatē- vātādhikagrahaṇēna kēvalavātasyāpi grahaṇaṁ, ślēṣmādhikavyapadēśācca vātaślēṣma-pittaślēṣmaṇōrapi grahaṇamiti| śītē hēmantādau| amalaḥ prabalaraśmiryasmin dinasya bhāgē bhāskaraḥ sō’malabhāskarō madhyāhna iti yāvat||19||

atyuṣṇē vā divā pītō vātapittādhikēna vā|
mūrcchāṁ pipāsāmunmādaṁ kāmalāṁ vā samīrayēt||20||
śītē rātrau piban snēhaṁ naraḥ ślēṣmādhikō’pi vā|
ānāhamaruciṁ śūlaṁ pāṇḍutāṁ vā samr̥cchati||21||

uktakālaniyamaviparyayē dōṣamāha- atyuṣṇē vētyādi| atyuṣṇē kālē divā pītaḥ snēhaḥ ślaiṣmikasyāpi yathōktavikārakaraḥ, tathā vātapittādhikēna pītaḥ śītakālē’pi yathōktavikārakaraḥ; ēvaṁ niśāpānē’pi vākyārthaḥ; paraṁ niṣiddhasya kālasya dōṣasya ca mēlakē’tyayē cōktavikāraprakarṣāprakarṣau tarkaṇīyau||20-21||

jalamuṣṇaṁ ghr̥tē pēyaṁ yūṣastailē’nu śasyatē|
vasāmajjñōstu maṇḍaḥ syāt sarvēṣūṣṇamathāmbu vā||22||

anupānamāha- jalamityādi| tailē’nviti anupānē| anupānaparimāṇaṁ tu samyagbhēṣajapākārthaṁ kriyamāṇaṁ bhēṣajāvaikārikapākēnaivōnnēyaṁ, vr̥ddhavaidyavyavahārācca||22||

ōdanaśca vilēpī ca rasō māṁsaṁ payō dadhi|
yavāgūḥ sūpaśākau ca yūṣaḥ kāmbalikaḥ khaḍaḥ||23||
saktavastilapiṣṭaṁ ca madyaṁ lēhāstathaiva ca|
bhakṣyamabhyañjanaṁ bastistathā cōttarabastayaḥ||24||
gaṇḍūṣaḥ karṇatailaṁ ca nastaḥkarṇākṣitarpaṇam|
caturviṁśatirityētāḥ snēhasya pravicāraṇāḥ [5] ||25||

vicāraṇāḥ saṅkhyayā svarūpēṇa caikagranthēnāha- ōdanaścētyādi| vilēpī viraladravā yavāgūrbahusikthasamanvitā jñēyā| saśākapallavēna kr̥tō yūṣaḥ khaḍaḥ| kāmbalikō dadhilavaṇasnēhatilādikr̥ta īṣadamlaḥ| ētayōrudāharaṇaṁ yathā- “takrē kapitthacāṅgērīmaricājājicitrakaiḥ [6] | supakvaḥ khaḍayūṣō’yamayaṁ kāmbalikō mataḥ|| dadhyamlō lavaṇasnēhatilamāṣānvitaḥ śr̥taḥ” iti| lēhaḥ śarkarādīnāṁ pākāt kr̥taḥ; lihyata iti lēhaḥ| pravicāryatē avacāryatē’nukalpēnōpayujyatē’nayēti pravicāraṇā ōdanādayaḥ; ōdanādayaśca snēhapravicāraṇāyāṁ snēhayuktā ēva bōddhavyāḥ; abhyañjanādayastu yadyapi śuddhasnēhasampādyāstathā’pi jaṭharāgnisambandhē na vyāpriyanta iti tantrē vicāraṇāśabdēnōcyantē||23-25||

acchapēyastu yaḥ snēhō na tāmāhurvicāraṇām|
snēhasya sa bhiṣagdr̥ṣṭaḥ [7] kalpaḥ prāthamakalpikaḥ||26||

kēvalasnēhapānaṁ tu snēhanē śaktyatiśayavattvēna na vicāraṇāsañjñayōcyatē, ētadēvāha- acchapēya ityādi| acchaśca pēyaśca acchapēyaḥ, ōdanādyasambandhē sati pēya ityarthaḥ| na tāmāhurvicāraṇāmiti vacanēna vaidyaparamparāsiddhō’yaṁ vyavahāra iti darśayati| bhiṣagbhirdr̥ṣṭō bhiṣagdr̥ṣṭaḥ| prathamē śrēṣṭhē kalpē pakṣē bhavatīti prāthamakalpikaḥ, śrēṣṭha ityarthaḥ||26||

rasaiścōpahitaḥ snēhaḥ samāsavyāsayōgibhiḥ|
ṣaḍbhistriṣaṣṭidhā saṅkhyāṁ prāpnōtyēkaśca kēvalaḥ||27||
ēvamētāścatuḥṣaṣṭiḥ snēhānāṁ pravicāraṇā [8] |
ōkartuvyādhipuruṣān prayōjyā jānatā bhavēt||28||

prakārāntarēṇa vicāraṇābhēdamāha- rasaiścētyādi| samāsō rasānāmanyōnyamēlakaḥ, vyāsō’mēlakaḥ; samāsavyāsavadbhiḥ ṣaḍbhī rasairōdanādigatairupahitō yuktaḥ san snēhastriṣaṣṭisaṅkhyāṁ prāpnōti| ēkaśca kēvala ityacchapēyaṁ varjayitvā’bhyañjanādiprayōjyaḥ| triṣaṣṭhī rasabhēdā ātrēyabhadrakāpyīyē “svāduramlādibhiryōgaṁ” (sū.a.26) ityādivākyē vakṣyamāṇā bōddhavyāḥ| ēvaṁ snēhānāṁ rasayuktānāṁ catuḥṣaṣṭiḥ pravicāraṇā bhavanti| catuḥṣaṣṭiriti snēhānāmityanēna sambadhyatē, tēna pravicāraṇētyēkavacanamupapannaṁ bhavati| na sarvavicāraṇā sarvatra kartavyā, kintu sātmyartuvyādhidōṣapuruṣān parīkṣya yā yatra yujyatē sā tatra kartavyētyāha- ōkartvityādi| ōkaḥ abhyāsaḥ| puruṣagrahaṇēna kasmin dēśē’yaṁ puruṣō vartata iti parīkṣayā dēśō’pyavaruddhō bōddhavyaḥ, vayōbalaprabhr̥tayaśca bōddhavyāḥ||27-28||

ahōrātramahaḥ kr̥tsnamardhāhaṁ ca pratīkṣatē|
pradhānā madhyamā hrasvā snēhamātrā jarāṁ prati||29||
iti tisraḥ samuddiṣṭā mātrāḥ snēhasya mānataḥ|
tāsāṁ prayōgān vakṣyāmi puruṣaṁ puruṣaṁ prati||30||
prabhūtasnēhanityā yē kṣutpipāsāsahā narāḥ|
pāvakaścōttamabalō yēṣāṁ yē cōttamā balē||31||
gulminaḥ sarpadaṣṭāśca visarpōpahatāśca yē|
unmattāḥ kr̥cchramūtrāśca gāḍhavarcasa ēva ca||32||
pibēyuruttamāṁ mātrāṁ tasyāḥ pānē guṇāñchr̥ṇu|
vikārāñchamayatyēṣāṁ śīghraṁ samyakprayōjitā||33||
dōṣānukarṣiṇī mātrā sarvamārgānusāriṇī|
balyā punarnavakarī śarīrēndriyacētasām||34||
aruṣkasphōṭapiḍakākaṇḍūpāmābhirarditāḥ|
kuṣṭhinaśca pramīḍhāśca vātaśōṇitikāśca yē||35||
nātibahvāśinaścaiva mr̥dukōṣṭhāstathaiva ca|
pibēyurmadhyamāṁ mātrāṁ madhyamāścāpi yē balē||36||
mātraiṣā mandavibhraṁśā na cātibalahāriṇī|
sukhēna ca snēhayati śōdhanārthē ca yujyatē||37||
yē tu vr̥ddhāśca bālāśca sukumārāḥ sukhōcitāḥ|
riktakōṣṭhatvamahitaṁ yēṣāṁ mandāgnayaśca yē||38||
jvarātīsārakāsāśca yēṣāṁ cirasamutthitāḥ|
snēhamātrāṁ pibēyustē hrasvāṁ yē cāvarā balē||39||
parihārē sukhā caiṣā mātrā snēhanabr̥ṁhaṇī|
vr̥ṣyā balyā nirābādhā ciraṁ cāpyanuvartatē||40||

mātrāyāḥ saṅkhyāṁ pramāṇaṁ cāha- ahōrātramityādi| ahōrātraśabdō’ṣṭapraharōpalakṣaṇaḥ, ēvamahaḥśabdārdhāhaśabdau catuḥpraharadvipraharōpalakṣaṇau, tēna praharādyatītē’pyahani pītā mātrā yathōktapraharakālaprāptyā dināntarē rātrau vā jīryamāṇā mantavyā; anyē tvahōrātraśabdēna nyūnēnāpyahnā yuktā rātrirahōrātraśabdēnōcyatē [9] , kr̥tsnārdhāhau tu praharōpalakṣaṇāviti vadanti| atra yadā ahōrātrapariṇāminī mātrā kriyatē, tadā tadaharāhārō na kartavyaḥ; ata ēvaitatpānaṁ puruṣaviśēṣaviṣayakathanē uktaṁ- “kṣutpipāsāsahānarāḥ” iti| prabhūtasnēhanityāḥ prabhūtasnēhasātmyāḥ| samyagyō jitētivacanēna mahāvyāpattitvamasyāḥ sūcayati| sarvamārgāḥ kōṣṭhasandhimarmaśākhāḥ| punarnavakarī niḥśēṣadōṣaharatvēna| aruṣkētyādi madhyamamātrāguṇaḥ; aruṣkā arūṁṣikā| śōdhanārtha iti śōdhanārtha(ṅga)snēhakaraṇē; ētēna uttamamātrā saṁśamanē [10] ēva paraṁ, na tu śōdhanāṅgasnēhē kartavyēti darśayati| yē tvityādi hrasvamātrāguṇaḥ| parihārē sukhēti alpaparihāratvēna||29-40||

vātapittaprakr̥tayō vātapittavikāriṇaḥ|
cakṣuḥkāmāḥ kṣatāḥ kṣīṇā vr̥ddhā bālāstathā’balāḥ||41||
āyuḥprakarṣakāmāśca balavarṇasvarārthinaḥ|
puṣṭikāmāḥ prajākāmāḥ saukumāryārthinaśca yē||42||
dīptyōjaḥsmr̥timēdhāgnibuddhīndriyabalārthinaḥ|
pibēyuḥ sarpirārtāśca dāhaśastraviṣāgnibhiḥ||43||

yaḥ snēhō yatra kāryastamāha- vātapittētyādi| vātapittavikāragrahaṇēnaiva vātapittaprakr̥tiṣu labdhēṣu punastadabhidhānaṁ vātapittaprakr̥tīnāṁ stōkaślēṣmavikārē’pi ghr̥tapānōpadēśārtham; ēvaṁ vātavyādhibhirāviṣṭā vātaprakr̥tayaśca ya ityatra vyākhyēyam| balārthina ityatra balaśabdaḥ smr̥tyādibhiḥ sambadhyatē| ārtāḥ pīḍitāḥ, dāhādibhiriti sambandhaḥ||41-43||

pravr̥ddhaślēṣmamēdaskāścalasthūlagalōdarāḥ|
vātavyādhibhirāviṣṭā vātaprakr̥tayaśca yē||44||
balaṁ tanutvaṁ laghutāṁ dr̥ḍhatāṁ sthiragātratām [11] |
snigdhaślakṣṇatanutvaktāṁ yē ca kāṅkṣanti dēhinaḥ||45||
kr̥mikōṣṭhāḥ krūrakōṣṭhāstathā nāḍībhirarditāḥ|
pibēyuḥ śītalē kālē tailaṁ tailōcitāśca yē||46||

tailaviṣayamāha- pravr̥ddhētyādi| śītalē kāla iti tailasyōṣṇatvēna śītalē’pi kāla ityarthaḥ; tēna sāmānyapratiṣēdhaḥ ‘nātyuṣṇaśītē snēhaṁ pibēnnaraḥ’ iti na virudhyatē; yadi vā sarpiḥpānakālāpēkṣayā śītatvaṁ bōddhavyam||44-46||

vātātapasahā yē ca rūkṣā bhārādhvakarśitāḥ|
saṁśuṣkarētōrudhirā niṣpītakaphamēdasaḥ||47||
asthisandhisirāsnāyumarmakōṣṭhamahārujaḥ|
balavānmārutō yēṣāṁ khāni cāvr̥tya tiṣṭhati||48||
mahaccāgnibalaṁ yēṣāṁ vasāsātmyāśca yē narāḥ|
tēṣāṁ snēhayitavyānāṁ vasāpānaṁ vidhīyatē||49||

vasāviṣayamāha- vātātapētyādi| saṁśuṣkaniṣpītaśabdau kṣīṇārthāvēva| mahāruja ityasthyādibhiḥ sambadhyatē| khāni srōtāṁsi||47-49||

dīptāgnayaḥ klēśasahā ghasmarāḥ snēhasēvinaḥ|
vātārtāḥ krūrakōṣṭhāśca snēhyā majjānamāpnuyuḥ||50||
yēbhyō yēbhyō hitō yō yaḥ snēhaḥ sa parikīrtitaḥ|51|

dīptāgnaya ityādi majjapānaviṣayaḥ| ghasmarā bahubhakṣakāḥ| āpnuyuḥ upayuñjīran||50||-

snēhanasya prakarṣau tu saptarātratrirātrakau||51||

prakarṣāviti alpaprakarṣabhūyaḥprakarṣau [12] ; tēna, alpatvēna trairātrikaḥ prakarṣaḥ, bhūyastvēna sāptarātrika iti ca bhavati| ētacca vakṣyamāṇasadyaḥsnēhaprayōgātiriktaprayōgē bōddhavyaṁ; yadi vā, sadyaḥsnēhaprayōgā api tryahēṇaiva snēhayanti, stutyarthaṁ tu tēṣu sadya ityuktam| yaduktaṁ- “tryahāvaraṁ saptadinaṁ paraṁ tu snigdhō naraḥ svēdayitavya iṣṭaḥ| nātaḥ paraṁ snēhanamādiśanti sātmyībhavēt saptadināt paraṁ tu” (si.a.1.) iti||51||

svēdyāḥ śōdhayitavyāśca rūkṣā vātavikāriṇaḥ|
vyāyāmamadyastrīnityāḥ snēhyāḥ syuryē ca cintakāḥ||52||

sāmānyēna snēhyānāha- svēdyā ityādi| svēdyāḥ svatantrasvēdasādhyā vātarugārtādayaḥ, śōdhanāṅgasvēdasādhyānāṁ tu śōdhayitavyā ityanēnaiva gr̥hītatvāt| cintakā iti cintābahulāḥ||52||

saṁśōdhanādr̥tē yēṣāṁ rūkṣaṇaṁ sampravakṣyatē|
na tēṣāṁ snēhanaṁ śastamutsannakaphamēdasām||53||
abhiṣyaṇṇānanagudā nityamandāgnayaśca yē|
tr̥ṣṇāmūrcchāparītāśca garbhiṇyastāluśōṣiṇaḥ||54||
annadviṣaśchardayantō jaṭharāmagarārditāḥ|
durbalāśca pratāntāśca snēhaglānā madāturāḥ||55||
na snēhyā vartamānēṣu na nastō bastikarmasu|
snēhapānāt prajāyantē tēṣāṁ rōgāḥ sudāruṇāḥ||56||

asnēhyānāha- saṁśōdhanādr̥ta ityādi| yēṣāṁ rūkṣaṇaṁ vakṣyatē laṅghanabr̥ṁhaṇīyē- “abhiṣyandā mahādōṣā marmasthā vyādhayaśca yē| ūrustambhaprabhr̥tayō rūkṣaṇīyā nidarśitāḥ” (sū. a.22) ityanēna, tēṣāṁ śōdhanādr̥tē snēhanaṁ na śastaṁ, yadā tu śōdhanēna virūkṣyantē tadā paraṁ śōdhanāṅga(rtha)statra snēhaḥ kartavya iti bhāvaḥ| utsannō vr̥ddhaḥ kaphō mēdaśca yēṣāṁ tē tathā; ētacca viśēṣaṇaṁ virūkṣaṇīyā ēvambhūtā ēva bhavantīti darśayati [13] | abhiṣyaṇṇaḥ dravapradhānaślēṣmavikārī| garaḥ kr̥trimaṁ viṣam| atipratāntaḥ atikṣīṇadravadhātuḥ| vartamānēṣu kriyamāṇēṣvityarthaḥ||53-56||

purīṣaṁ grathitaṁ rūkṣaṁ vāyurapraguṇō mr̥duḥ|
paktā kharatvaṁ raukṣyaṁ ca gātrasyāsnigdhalakṣaṇam||57||
vātānulōmyaṁ dīptō’gnirvarcaḥ snigdhamasaṁhatam|
mārdavaṁ snigdhatā cāṅgē snigdhānāmupajāyatē||58||
pāṇḍutā gauravaṁ [14] jāḍyaṁ purīṣasyāvipakvatā|
tandrīrarucirutkēśaḥ syādatisnigdhalakṣaṇam||59||

asnigdhalakṣaṇamāha- purīṣamityādi| mr̥duriti pakturviśēṣaṇam| vātānulōmyamityādi snigdhalakṣaṇam| pāṇḍutētyādi atisnigdhalakṣaṇam| jāḍyam indriyajaḍatvam||57-59||

dravōṣṇamanabhiṣyandi bhōjyamannaṁ pramāṇataḥ|
nātisnigdhamasaṅkīrṇaṁ śvaḥ snēhaṁ pātumicchatā||60||
pibēt saṁśamanaṁ snēhamannakālē prakāṅkṣitaḥ|
śuddhyarthaṁ punarāhārē naiśē jīrṇē pibēnnaraḥ||61||

snēhāt pūrvaṁ yat pathyaṁ tadāha- dravōṣṇamityādi| asaṅkīrṇam aviruddhavīryam| śva ityāgāmidinē| annakālē dvipraharādilakṣaṇē bubhukṣā kadācinna [15] syādapi tadarthaṁ viśēṣaṇaṁ- prakāṅkṣita iti| śuddhyarthaṁ tu snēhaṁ naiśē dināntarakr̥tē āhārē jīrṇa ēva prātarēva pibēdityarthaḥ| saṁśamanārthasnēhō yadi jaraṇāntē prātarēva kriyatē tadā kōṣṭhōpalēpakadōṣasyākṣayāttēna dōṣēṇa sambaddhō dōṣōtklēśaṁ kuryānna saṁśamanaṁ, saṁśōdhanārthastu dōṣōtklēśaṁ karōtītyapēkṣaṇīya ēvēti bhāvaḥ| ētacca kālakathanamutsargēṇa, tēna “vātapittādhikō rātrau” ityuktakālavirōdhō na bhavati||60-61||

uṣṇōdakōpacārī syādbrahmacārī kṣapāśayaḥ [16] |
śakr̥nmūtrānilōdgārānudīrṇāṁśca na [17] dhārayēt||62||
vyāyāmamuccairvacanaṁ krōdhaśōkau himātapau|
varjayēdapravātaṁ ca sēvēta śayanāsanam||63||
snēhaṁ [18] pītvā naraḥ snēhaṁ pratibhuñjāna ēva ca|
snēhamithyōpacārāddhi jāyantē dāruṇā gadāḥ||64||

kṣapāyāmēva svapitīti kṣapāśayaḥ| apravātaṁ cēti śayanāsanaviśēṣaṇam| snēhaṁ pratibhuñjāna iti snēhē jīrṇē’pi snēhaprayōgānuguṇamanyasnēhamaviruddhavīryādiguṇayuktaṁ bhuñjānaḥ| ētēna snēhē pītē jīrṇē kiñca hitāhitamiti praśnadvayasyōttaramidam- uṣṇōdakōpacārī syādityādi bhavati||62-64||

mr̥dukōṣṭhastrirātrēṇa snihyatyacchōpasēvayā|
snihyati krūrakrōṣṭhastu saptarātrēṇa mānavaḥ||65||
guḍamikṣurasaṁ mastu kṣīramullōḍitaṁ dadhi|
pāyasaṁ kr̥śarāṁ sarpiḥ kāśmaryatriphalārasam||66||
drākṣārasaṁ pīlurasaṁ jalamuṣṇamathāpi vā|
madyaṁ vā taruṇaṁ pītvā mr̥dukōṣṭhō viricyatē||67||
virēcayanti naitāni krūrakōṣṭhaṁ kadācana|
bhavati krūrakōṣṭhasya grahaṇyatyulbaṇānilā||68||
udīrṇapittā’lpakaphā grahaṇī mandamārutā|
mr̥dukōṣṭhasya tasmāt sa suvirēcyō naraḥ smr̥taḥ||69||

mr̥dukōṣṭhādilakṣaṇamāha- mr̥dvityādi| abhyarhitatvāt kōṣṭhajñānasyānyathā’pi tallakṣaṇamāha- guḍamityādi| ullōḍitaṁ dadhisaraḥ| kr̥śarā tilataṇḍulamāṣakr̥tā yavāgūḥ; vacanaṁ hi- “tilataṇḍulamāṣaistu kr̥śarā trisarēti ca”| krūrakōṣṭhāvirēcanahētumāha- bhavatītyādi| grahaṇī kōṣṭhasthāgnyadhiṣṭhānabhūtā nāḍī; yaduktam- “agnyadhiṣṭhānamannasya grahaṇādgrahaṇī matā” (ci.a.15) iti| udīrṇapittētyādi mr̥dukōṣṭhasvarūpakathanam| krūrakōṣṭhasya grahaṇīgatō vāyurguḍādīnāṁ saratvaṁ pratibadhnāti, mr̥dukōṣṭhasya hi grahaṇyāṁ virōdhakō vāyurnāsti, stambhakō’pi ślēṣmā’lpaḥ, udbhūtasaratvaguṇaṁ ca pittaṁ prabalaṁ; tēna guḍādibhiḥ sukhaṁ virēcanaṁ bhavatīti bhāvaḥ||65-69||

udīrṇapittā grahaṇī yasya cāgnibalaṁ mahat|
bhasmībhavati tasyāśu snēhaḥ pītō’gnitējasā||70||
sa jagdhvā snēhamātrāṁ tāmōjaḥ prakṣārayan balī|
snēhāgniruttamāṁ tr̥ṣṇāṁ sōpasargāmudīrayēt||71||
nālaṁ snēhasamr̥ddhasya śamāyānnaṁ sugurvapi|
sa cēt suśītaṁ salilaṁ nāsādayati dahyatē|
yathaivāśīviṣaḥ kakṣamadhyagaḥ svaviṣāgninā||72||
ajīrṇē yadi tu snēhē tr̥ṣṇā syācchardayēdbhiṣak|
śītōdakaṁ punaḥ pītvā bhuktvā rūkṣānnamullikhēt||73||
na sarpiḥ kēvalaṁ pittē pēyaṁ sāmē viśēṣataḥ|
sarvaṁ hyanurajēddēhaṁ [19] hatvā sañjñāṁ ca mārayēt||74||
tandrā [20] sōtklēśa ānāhō jvaraḥ stambhō visañjñatā|
kuṣṭhāni kaṇḍūḥ pāṇḍutvaṁ śōphārśāṁsyarucistr̥ṣā||75||
jaṭharaṁ grahaṇīdōṣāḥ staimityaṁ vākyanigrahaḥ|
śūlamāmapradōṣāśca jāyantē snēhavibhramāt||76||
tatrāpyullēkhanaṁ śastaṁ svēdaḥ kālapratīkṣaṇam|
prati prati vyādhibalaṁ buddhvā sraṁsanamēva ca||77||
takrāriṣṭaprayōgaśca rūkṣapānānnasēvanam|
mūtrāṇāṁ triphalāyāśca snēhavyāpattibhēṣajam||78||

samprati snēhavyāpadō darśayati- udīrṇētyādi| ōjaḥ sarvadhātusārabhūtaṁ hr̥di sthitaṁ, prakṣārayan sthānādbhraṁśayan kṣapayaṁśca| balītyanēna snēhēndhanō vahnirnitarāṁ balavān bhavatīti darśayati| vacanaṁ hi- “nālaṁ snēhasamr̥ddhasya śamāyānnaṁ sugurvapi” iti| uttamāṁ mahatīṁ mātrām| sōpasargāṁ sōpadravām| kakṣaḥ kāṣṭhasamūhaḥ| chardayēditi prathamaṁ snēhamēva tr̥ṣṇākārakaṁ chardayitvā punaḥ śītōdakaṁ pītvā rūkṣānnaṁ ca bhuktvā ullikhēditi yōjanīyam| na sarpirityādi|- na sarpiḥ sāmē pittē pēyaṁ, kēvalaṁ tvasaṁskr̥taṁ viśēṣatō na pēyaṁ sāmapitta ēvēti yōjanā; ēvaṁ manyatē- saṁskr̥taṁ tiktakādibhiryutaṁ sāmē pittē tiktakādipācanaguṇānuyōgādyōgyaṁ kadācidbhavatyapi [21] , asaṁskr̥taṁ tu sarvathā viruddhamēva; yadivā, kēvalamasaṁskr̥taṁ sarpiḥ pittē sāmānyēna sāmē nirāmē vā na pēyaṁ, sāmē pittē viśēṣata iti yōjanā| ētēna, yatrāpi sāmānyēna ghr̥taṁ vihitaṁ, yathā- “ata ūrdhvaṁ kaphē mandē vātapittōttarē jvarē| paripakvēṣu dōṣēṣu sarpiḥpānaṁ yathā’mr̥tam” (ci.a.3) ityādau, tatrāpyucitabhēṣajasaṁskr̥tamēva bōddhavyam| yadivā, na kēvalaṁ pittē sāmē sarpirviśēṣatō na pēyaṁ, kintarhi tailādīnyapi vātaślēṣmavihitāni tayōḥ sāmayōrna pēyānītyarthaḥ| asmin vyākhyānē’pēyamityakārapraślēṣō draṣṭavyaḥ| anurajēt pittavarṇaṁ kuryāt| sañjñā smr̥tiḥ, taddhananaṁ cēha vyādhiprabhāvāt| staimityam ārdravastrāguṇṭhitatvamiva| āmapradōṣā alasakavisūcikādayaḥ| kālapratīkṣaṇaṁ snēhajanitadōṣakṣayaṁ yāvadabhōjanam| takrasyāriṣṭānāṁ ca cikitsāvakṣyamāṇānāṁ prayōgaḥ| mūtrāṇāṁ triphalāyāśca sēvanamiti sambandhaḥ||70-78||

akālē cāhitaścaiva mātrayā na ca yōjitaḥ|
snēhō mithyōpacārācca vyāpadyētātisēvitaḥ||79||

mithyōpacārāt yathōktavidhyananuṣṭhānāt| atisēvitaḥ kālaprakarṣēṇa sēvitaḥ||79||

snēhāt praskandanaṁ jantustrirātrōparataḥ pibēt|
snēhavaddravamuṣṇaṁ ca tryahaṁ bhuktvā rasaudanam||80||

saṁśōdhanasnēhapānē vr̥ttipracāramāha- snēhādityādi| snēhāt snēhaprayōgāt| trirātrōparataḥ trirātraṁ parityaktasnēhapāna ityarthaḥ| praskandanaṁ virēcanam| snēhōparamatrirātra [22] ēva bhōjanaṁ darśayati- snēhavadityādi| rasapradhānamōdanaṁ rasaudanam||80||

ēkāhōparatastadvadbhuktvā pracchardanaṁ pibēt|81|

vamanē snēhavr̥ttimāha- ēkētyādi| ēkāhōparataḥ snēhāditi yōjanā| tadvaditi snēhavaddravamuṣṇaṁ ca rasaudanaṁ snēhōparamadivasa ēva|81|-

syāttvasaṁśōdhanārthīyē vr̥ttiḥ snēhē viriktavat||81||

saṁśamanavidhimāha- syāttvityādi| asaṁśōdhanārthīyē saṁśamanē| vr̥ttiḥ upacāraḥ| viriktavadityanēnāgatāvēkṣaṇēnōpakalpanīyavakṣyamāṇaṁ “samyagviriktaṁ cainaṁ” (sū. a.15) ityādigranthapratipādanīyamupacāramāha, natu pēyādikramamātram [23] | yadyapi vamanōktā ēva tatrōccairbhāṣyādayō virēcanavr̥ttāvapyatidiṣṭāstathā’pīha vamanavidhi parityajya virēcanavidhyatidēśō dhūmapānapratiṣēdhārthaḥ, virēcanē hi tatra “dhūmapānavarjaṁ” (sū. a.15) iti kr̥taṁ, snēhapānē ca dhūmapānaṁ niṣiddhaṁ mātrāśitīyē- “na madyadugdhē pītvā ca na snēhaṁ” (sū. a.5) ityādinā||81||

snēhadviṣaḥ snēhanityā mr̥dukōṣṭhāśca yē narāḥ|
klēśāsahā madyanityāstēṣāmiṣṭā vicāraṇā||82||
lāvataittiramāyūrahāṁsavārāhakaukkuṭāḥ|
gavyājaurabhramātsyāśca rasāḥ syuḥ snēhanē hitāḥ||83||
yavakōlakulatthāśca snēhāḥ saguḍaśarkarāḥ|
dāḍimaṁ dadhi savyōṣaṁ rasasaṁyōgasaṅgrahaḥ||84||
snēhayanti tilāḥ pūrvaṁ jagdhāḥ sasnēhaphāṇitāḥ|
kr̥śarāśca bahusnēhāstilakāmbalikāstathā||85||
phāṇitaṁ śr̥ṅgavēraṁ ca tailaṁ ca surayā saha|
pibēdrūkṣō bhr̥tairmāṁsairjīrṇē’śnīyācca bhōjanam||86||
tailaṁ surāyā maṇḍēna vasāṁ majjānamēva vā|
piban saphāṇitaṁ kṣīraṁ naraḥ snihyati vātikaḥ||87||
dhārōṣṇaṁ snēhasaṁyuktaṁ pītvā saśarkaraṁ payaḥ|
naraḥ snihyati pītvā vā saraṁ dadhnaḥ saphāṇitam||88||
pāñcaprasr̥tikī pēyā pāyasō māṣamiśrakaḥ|
kṣīrasiddhō bahusnēhaḥ snēhayēdacirānnaram||89||
sarpistailavasāmajjātaṇḍulaprasr̥taiḥ śr̥(kr̥)tā|
pāñcaprasr̥tikī pēyā pēyā snēhanamicchatā||90||
(śaukarō vā rasaḥ snigdhaḥ sarpirlavaṇasaṁyutaḥ |
pītō dvirvāsarē yatnāt snēhayēdacirānnaram ||1||)|

vicāraṇāviṣayamāha- snēhadviṣa ityādinā| lāvādirasānāmuktānāṁ saṁskāramāha- yavētyādi| rasē snēhārthōktarasa ucitaḥ saṁyōgō yēṣāṁ tē rasasaṁyōgāḥ, tēṣāṁ saṅgrahaṇaṁ saṅgrahaḥ| pūrvamiti bhōjanāt pūrvam| tilapradhānaḥ kāmbalikastilakāmbalikaḥ| phāṇitamityādau śr̥ṅgavēramiti śr̥ṅgavērarasam| bhr̥taiḥ bhaṭitrīkr̥taiḥ| pāñcaprasr̥tikī agrē vakṣyamāṇā| māṣamiśrakō māṣataṇḍulakr̥tamannam| pēyā pātavyā||82-90||

grāmyānūpaudakaṁ māṁsaṁ guḍaṁ dadhi payastilān|
kuṣṭhī śōthī pramēhī ca snēhanē na prayōjayēt||91||
snēhairyathārhaṁ tān siddhaiḥ snēhayēdavikāribhiḥ|
pippalībhirharītakyā siddhaistriphalayā’pi vā||92||
drākṣāmalakayūṣābhyāṁ dadhnā cāmlēna sādhayēt|
vyōṣagarbhaṁ bhiṣak snēhaṁ pītvā snihyati taṁ naraḥ||93||
yavakōlakulatthānāṁ rasāḥ kṣāraḥ surā dadhi|
kṣīrasarpiśca tat siddhaṁ snēhanīyaṁ ghr̥tōttamam||94||

yathārhamiti yō yatra snēhō yujyatē sarpirādiḥ| siddhairiti pippalībhistathā harītakyā tathā triphalayā cēti pr̥thagyōjanīyaṁ; pippalyādisiddhasnēhaśca kuṣṭhādiṣu yathāsaṅkhyamiti kēcit| yūṣaśabdaḥ kvāthavacanaḥ| vyōṣagarbhaṁ vyōṣakalkam| atra tribhirdravyairmilitvā cāturguṇyam| yavakōlādau ṣaḍdravyāṇi snēhasamāni| kṣārō yavakṣāraḥ kalkaḥ||91-94||

tailamajjavasāsarpirbadaratriphalārasaiḥ|
yōniśukrapradōṣēṣu sādhayitvā prayōjayēt||95||

tailamajjētyādi|- catuḥsnēhō’kalka ēva, tailamajjavasāsarpirityēkavadbhāvāddvitīyāntaḥ prayōgaḥ||95||

gr̥hṇātyambu [24] yathā vastraṁ prasravatyadhikaṁ yathā|
yathāgni jīryati snēhastathā sravati cādhikaḥ||96||
yathā vā”klēdya mr̥tpiṇḍamāsiktaṁ tvarayā jalam|
sravati sraṁsatē snēhastathā tvaritasēvitaḥ||97||

samprati snēha upayuktō yathā śarīraṁ sasnēhyādhikō dr̥śyatē, tadāha- gr̥hṇātītyādi| tacca śiṣyēṇādhyāyādāvapr̥ṣṭamapi śiṣyahitatayā’bhidhīyatē| yathāgnīti agnyanadhika ityarthaḥ| nanvagnyadhikaścēt sravati, tadavadhi ca snēhalakṣaṇamuktaṁ, yaducyatē- “adhastāt snēhadarśanam” iti, tēnaikadina ēvādhikasnēhapānaṁ kriyatāmityāha- yathā cētyādi|āklēdya īṣatklēdayitvā|tvaritasēvitaḥ snēhō dhātūnasnēhayitvaiva sraṁsatē’dhō yāti yāvān, na tāvatā snēhanaṁ bhavatīti bhāvaḥ||96-97||

lavaṇōpahitāḥ snēhāḥ snēhayantyacirānnaram|
taddhyabhiṣyandyarūkṣaṁ ca sūkṣmamuṣṇaṁ vyavāyi ca||98||

snēhanē sarvasnēhēṣu lavaṇaprayōgamāha-lavaṇōpahitā ityādi| taditi lavaṇam| abhiṣyandi dōṣasaṅghātavicchēdakam| vyavāyi akhiladēhavyāptipūrvakapākagāmi||98||

snēhamagrē prayuñjīta tataḥ svēdamanantaram|
snēhasvēdōpapannasya saṁśōdhanamathētarat [25] ||99||

atō vakṣyamāṇasvēdōpakalpanādhyāyayōḥ sambandhasūcakaṁ svēdādiṣu snēhasya prāgbhāvamāha- snēhamityādi||99||

tatra ślōkaḥ-
snēhāḥ snēhavidhiḥ kr̥tsnavyāpatsiddhiḥ sabhēṣajā|
yathāpraśnaṁ [26] bhagavatā vyāhr̥taṁ cāndrabhāginā||100||

cāndrabhāgī punarvasuḥ||100||

ityagnivēśakr̥tē tantrē carakapratisaṁskr̥tē ślōkasthānē snēhādhyāyō nāma trayōdaśō’dhyāyaḥ samāptaḥ||13||

iti śrīcakrapāṇidattaviracitāyāṁ carakatātparyavyākhyāyāmāyurvēdadīpikāyāṁ sūtrasthānē kalpanācatuṣkē snēhādhyāyō nāma trayōdaśō’dhyāyaḥ||13||

1. ‘kathayituṁ’ iti pā.|
2. ‘saṁśayaviṣayēṇa viṣayiṇaṁ’ iti pā.|
3. ‘sīḍanīti prasiddhā’ iti pā.|
4. ‘saṁskāragaṇēna svaguṇōpaghātādbhavati’ iti pā.|
5. ‘kalpanāpūrvakabhēdā’ ityarthaḥ|
6. ‘…cukrīkā…’ iti pā.|
7. ‘bhiṣagdiṣṭaḥ’ iti|
8. ‘pravicāraṇāḥ’ iti pā.|
9. ‘ahōrātrēṇaivōcyatē’ iti pā.|
10. ‘saṁśamanī’ iti pā.|
11. ‘sthiratāṁ dr̥ḍhagātratām’ iti pā.|
12. ‘alpatvabhūyastvaprakarṣau’ iti pā.|
13. ‘darśanārthaṁ’ iti pā.|
14. ‘sadanaṁ’ iti pā.|
15. ‘na bhavatyapi’ iti pā.|
16. ‘brahmacārī kṣapāśaya ityanēna maithunadivāsvapnarātrijāgaraṇānāṁ niṣēdhaḥ’ iti śivadāsasēnaḥ|
17. ‘udīrṇāṁśca na dhārayēdityatra cakārādanudīrṇāṁśca nōdīrayēdityarthō jñēyaḥ’ iti śivadāsasēnaḥ|
18. gaṅgādharastu ‘snēhaṁ pītvā narē snēhaṁ pratibhuñjāna ēva ca’ iti paṭhati, ‘snēhaṁ pītvā tvaparaṁ snēhaṁ pratibhuñjānē narē snēhamithyōpacārāddāruṇā gadā jāyantē’ iti vyākhyānayati| yōgīndranāthasēnastu ‘snēhaṁ pītvā naraḥ snēhaṁ pratibhuñjāna ēva ca| uṣṇōdakōpacārī syāt’ ityādi ‘sēvēta śayanāsanam| snēhamithyōpacārāddhi jāyantē dāruṇā gadā’ ityēvaṁ kiñcitpaurvāparyaṁ kr̥tvā paṭhati, ‘pītē hitāhitamāha- snēhaṁ pītvētyādi| snēhaṁ pītvā tathā snēhaṁ pratibhuñjānaḥ tasminnēva dinē snēhaṁ piban snēhaṁ pītavān snēhaṁ pibaṁścētyarthaḥ, nara uṣṇōdakōpacārī syāt’ ityādi vyākhyānayati ca|
19. ‘hyanucarēddēhaṁ’ iti pā.|
20. ‘tantrīrutklēśa’ iti pā.|
21. ‘yōgyaṁ śaṅkyētāpi’ iti pā.|
22. ‘snēhōparatasya trirātra ēva’ iti pā.|
23. ‘viriktavaditi yathā viriktē pēyādikramastathā’sminnapi’ iti yōgīndranāthasēnaḥ|
24. “idānīmupayuktaḥ snēhaḥ śarīraṁ saṁsnēhyādhikaścēdbhavati tadā sravati, anyathātu jīryatyēvētyāha- gr̥hṇātītyādi| yathāgnīti agnyanurūpam| nanu snēhapānaṁ hi snigdhalakṣaṇāvadhi kāryaṁ, tēnaikadina ēva tathā snēhapānaṁ kriyatāṁ yathā śīghramēva snēhalakṣaṇaṁ syādityāha- yathā cētyādi| āklēdya īṣatklēdayitvā, ēvaṁ tvaritasēvitō’pi snēhō dhātūnasnēhayitvaiva sraṁsatē adhō yāti, tathā ca sati samyaksnēhanaṁ na bhavatīti bhāvaḥ” iti śivadāsasēnaḥ|
25. ‘saṁśōdhanamanantaram’ iti pā.|
26. ‘yathānyāyaṁ yathāśāstraṁ snēhasvēdōpapādanairityanvayaḥ, śāstrōktasnēhasvēdavidhibhirityarthaḥ’ iti śivadāsasēnaḥ|