athātaḥ svēdādhyāyaṁ vyākhyāsyāmaḥ||1||
iti ha smāha bhagavānātrēyaḥ||2||

snēhapūrvakatvāt svēdasya svēdādhyāyō’bhidhīyatē| svēdapratipādakō’dhyāyaḥ svēdādhyāyaḥ||1-2||

ataḥ svēdāḥ pravakṣyantē yairyathāvatprayōjitaiḥ|
svēdasādhyāḥ praśāmyanti gadā vātakaphātmakāḥ||3||
snēhapūrvaṁ prayuktēna svēdēnāvajitē’nilē|
purīṣamūtrarētāṁsi na sajjanti kathañcana||4||
śuṣkāṇyapi hi kāṣṭhāni snēhasvēdōpapādanaiḥ|
namayanti yathānyāyaṁ kiṁ punarjīvatō narān||5||

vātakaphātmakā asaṁsr̥ṣṭavātakaphajāḥ, vātakaphajatvē’pyudarādayaḥ svēdēna na śāmyanti, ata āha- svēdasādhyāḥ; ētēnōdarādayō’svēdyā vyāvartyantē| snēhapūrvamiti kriyāviśēṣaṇam| na sajjanti apravr̥ttāni na bhavanti| yathānyāyaṁ yathāgamam, ētacca snēhasvēdōpapādanairityanēna sambadhyatē; yadi vā yathānyāyaṁ yathāsahajaṁ namayantīti sambandhaḥ||3-5||

rōgartuvyādhitāpēkṣō nātyuṣṇō’timr̥durna ca|
dravyavān kalpitō dēśē svēdaḥ kāryakarō mataḥ||6||

rōgamr̥tuṁ vyādhitaṁ ca balavattvādinā’pēkṣata iti rōgartuvyādhitāpēkṣaḥ| nātyuṣṇō nāticaṇḍatāpaḥ| dravyavāniti snigdharūkṣādidravyavān kalpita iti rōgādīnapēkṣya yathōcitēna dravyēṇa dēśē cāmāśayādau yathāyōgyatayā sampādita iti mantavyam||6||

vyādhau śītē śarīrē ca mahān svēdō mahābalē|
durbalē durbalaḥ svēdō madhyamē madhyamō hitaḥ||7||
vātaślēṣmaṇi vātē vā kaphē vā svēda iṣyatē|
snigdharūkṣastathā snigdhō rūkṣaścāpyupakalpitaḥ||8||

rōgādyapēkṣayōktakalpanāṁ darśayati- vyādhāvityādi| vyādhau mahābalē tathā śītē kālakr̥tē mahābalē| mahāniti caṇḍatāpa ēva punaḥ punaḥ kriyamāṇatvēna mr̥dusvēdāpēkṣayā’dhikatāpatvēna jñēyaḥ| durbala iti tathā madhyama iti ca vyādhyādiṣu pūrvavadyōjanīyam| snigdharūkṣadravyakr̥taḥ snigdharūkṣaḥ, snigdharūkṣadravyādayō vātaślēṣmādiṣu yathāsaṅkhyaṁ mantavyāḥ; ētacca snigdharūkṣādikathanaṁ dravyāpēkṣakalpanōdāharaṇaṁ; vātē snigdhaḥ, kaphē rūkṣaḥ||7-8||

āmāśayagatē vātē kaphē pakvāśayāśritē|
rūkṣapūrvō hitaḥ svēdaḥ snēhapūrvastathaiva ca||9||

taṁ dēśaviśēṣasambandhēna vyabhicārayan dēśāpēkṣāṁ kalpanāmāha- āmāśayētyādi  āmāśayagatē vātē rūkṣapūrvaḥ sthānāpēkṣayā pūrvaṁ rūkṣaṁ kr̥tvā paścādvātāpēkṣaḥ snigdhaḥ kāryaḥ, ēvaṁ pakvāśayagatē kaphē snēhapūrvō vyākhyēyaḥ; āmāśayaśabdēna kaphasthānaṁ jñēyaṁ, kaphasthānāpēkṣayā hi prathamaṁ rūkṣaḥ kriyatē, yaduktaṁ- “sthānaṁ jayēddhi pūrvaṁ tu sthānasthasyāviruddhataḥ” iti||9||

vr̥ṣaṇau hr̥dayaṁ dr̥ṣṭī svēdayēnmr̥du naiva vā|
madhyamaṁ vaṅkṣaṇau śēṣamaṅgāvayavamiṣṭataḥ||10||

mr̥du naiva vēti svēdaikasādhyē vr̥ṣaṇādigatē vyādhau mr̥dusvēdaḥ, svēdavyatiriktōpāyāntarasambhavē tu na vēti bōddhavyam| iṣṭata ityāturēcchātō vaidyēcchātaśca iṣṭata iti bhāvādicchāvacanaḥ||10||

suśuddhairnaktakaiḥ piṇḍyā gōdhūmānāmathāpi vā|
padmōtpalapalāśairvā svēdyaḥ saṁvr̥tya cakṣuṣī||11||

svēdē kriyamāṇē cakṣuṣaḥ svēdaparihārōpāyamāha- suśuddhairityādi| naktakaḥ karpaṭāvayavaḥ [1] ||11||

muktāvalībhiḥ śītābhiḥ śītalairbhājanairapi|
jalārdrairjalajairhastaiḥ svidyatō hr̥dayaṁ spr̥śēt||12||

svēdē kriyamāṇē hr̥dayarakṣaṇārthamāha- muktāvalībhirityādi| jalajāni paṅkajādīni| ēvamasvēdyatvasāmānyatvādvr̥ṣaṇarakṣā’pyunnētavyā, prādhānyāddhr̥dayacakṣuḥpālanamuktam||12||

śītaśūlavyuparamē stambhagauravanigrahē|
sañjātē mārdavē svēdē svēdanādviratirmatā||13||

śītaśūlētyādi| svēda iti svēdabhavē gharmē| svēdanādviratirmatētyupadiśan śītādivyuparamē sati svēdō nivartanīyaḥ, śītādyanuparamē ca svēdaḥ kartavya iti dvayamupadiśati; tataśca ita ēva svēdanivr̥ttiviṣayaśītādivyuparamōtpādaḥ svēdasya samyagyōgalakṣaṇaṁ tathā śītādivyuparamānutpādaśca svēdānivr̥ttiviṣayō’yōgalakṣaṇamuktaṁ bhavatīti nāyōgalakṣaṇānabhidhānamudbhāvanīyam||13||

pittaprakōpō mūrcchā ca śarīrasadanaṁ tr̥ṣā|
dāhaḥ svarāṅgadaurbalyamatisvinnasya lakṣaṇam||14||
uktastasyāśitīyē yō graiṣmikaḥ sarvaśō vidhiḥ|
sō’tisvinnasya kartavyō madhuraḥ snigdhaśītalaḥ||15||

atisvinnacikitsitamāha- ukta ityādi graiṣmikō vidhirityanēna labdhē punarmadhuraḥ snigdhaśītala ityādivacanaṁ “madyamalpaṁ na vā pēyaṁ” (sū.a.6) ityatrōpadiṣṭamadyapānasya pratiṣēdhārthaṁ, madhuraśītādiyōgaviśēṣavidhānārthaṁ ca||14-15||

kaṣāyamadyanityānāṁ garbhiṇyā raktapittinām|
pittināṁ sātisārāṇāṁ rūkṣāṇāṁ madhumēhinām||16||
vidagdhabhraṣṭabradhnānāṁ viṣamadyavikāriṇām|
śrāntānāṁ naṣṭasañjñānāṁ sthūlānāṁ pittamēhinām||17||
tr̥ṣyatāṁ kṣudhitānāṁ [2] ca kruddhānāṁ śōcatāmapi|
kāmalyudariṇāṁ caiva kṣatānāmāḍhyarōgiṇām||18||
durbalātiviśuṣkāṇāmupakṣīṇaujasāṁ tathā|
bhiṣak taimirikāṇāṁ ca na svēdamavatārayēt||19||

asvēdyānāha- kaṣāyētyādi| kaṣāyadravyakr̥taṁ madyaṁ kaṣāyamadyaṁ; kiṁvā kaṣāyaśabdō’madhuravacanaḥ, na tēna yaducyatē- kaṣāyanityasya vātapradhānatā syāt kaṣāyasya vātakāritvāt, vātē ca svēdō vihita ēva, tat kathaṁ kaṣāyanityaṁ prati svēdaniṣēdha iti, tannirastaṁ bhavati| kiṁvā, kaṣāyanityā rūkṣātistabdhagātrā bhavanti, kaṣāyasya virūkṣakastambhakatvēna; tataśca tēṣāṁ svēdaḥ parvabhēdamāvahatītyataḥ kaṣāyanityaniṣēdhaḥ| raktapittināmavidhānādēva svēdē niṣiddhē, punaḥ svēdaniṣēdhō raktapittināṁ yadyanyō’pi svēdasādhyō vātaślēṣmajō vikārō bhavati tatrāpi svēdaniṣēdhārthaṁ, tathā raktapittināṁ vamanavirēcanāṅgatayā prāptasvēdapratiprasavaniṣēdhārthaṁ ca; ēvaṁ pittamēhikāmalyādiṣvapi vyākhyēyam| pittināmiti pittaprakr̥tīnām| madhumēhaśabdēna sarva ēvaṁ mēhā gr̥hyantē, madhumēhaśabdō hi sarvēṣvēva mēhēṣu vartata iti kiyantaḥśirasīyē darśanīyaṁ, mēhēṣu ca sarvēṣvēva śarīraśaithilyapravr̥ttēṣu viśēṣataḥ śarīraśaithilyahētutvēna svēdō na yujyatē; pittamēhināmiti tu punarabhidhānaṁ pittasambandhēna viśēṣapratiṣēdhatādarśanārtham| bradhnaḥ gudaḥ| madyavikāriṇāmiti madyanityasya vātakaphajamadātyayē svēdaniṣēdhārtham| āḍhyarōgīha vātaraktī| ēṣu cāsvēdaviṣayēṣu yadi svēdaikasādhyaḥ sannyāsādirbhavati tadā mahāpratyavāyabhayādalpapratyavāyamupēkṣyāpi svēdō vidhēya iti nyāyasiddhamēva; yadāhurnyāyavidaḥ- “bhūyōvirōdhē svalpamanyāyyam” iti||16-19||

pratiśyāyē ca kāsē ca hikkāśvāsēṣvalāghavē|
karṇamanyāśiraḥśūlē svarabhēdē galagrahē||20||
arditaikāṅgasarvāṅgapakṣāghātē vināmakē|
kōṣṭhānāhavibandhēṣu mūtrāghātē [3] vijr̥mbhakē||21||
pārśvapr̥ṣṭhakaṭīkukṣisaṅgrahē gr̥dhrasīṣu ca|
mūtrakr̥cchrē mahattvē ca muṣkayōraṅgamardakē||22||
pādajānūrujaṅghārtisaṅgrahē śvayathāvapi|
khallīṣvāmēṣu śītē ca vēpathau vātakaṇṭakē||23||
saṅkōcāyāmaśūlēṣu stambhagauravasuptiṣu [4] |
sarvāṅgēṣu vikārēṣu svēdanaṁ hitamucyatē||24||

pratiśyāyē cētyādinā svēdyān darśayati| vināmakaḥ śarīravinamanakārī vātaḥ| vijr̥mbhakō bahirāyāmaḥ, jr̥mbhābahutvaṁ vā| pādajānūrujaṅghābhirartiḥ saṅgrahaśca pr̥thak sambadhyatē khallī hastapadāvamōṭanam| vātakaṇṭakō gulphāśritō vātaḥ| alāghava iti pūrvamuktē’pi punargauravavacanamaṅgānāṁ gurutaratvapratipādanārtham, alāghavavacanaṁ tu lāghavapratiṣēdhamātraprayōjanaṁ nātigurutvaṁ brūtē, yataḥ sarvatra nañ viruddhē na vartatē, yathā “arūkṣamanabhiṣyandi tvāsīnapracalāyitam” (sū.a.21) ityatra na hyarūkṣaśabdēna snigdhatvamabhiprētaṁ, kiṁ tarhi rūkṣatāpratiṣēdhamātramēva||20-24||

tilamāṣakulatthāmlaghr̥tatailāmiṣaudanaiḥ|
pāyasaiḥ kr̥śarairmāṁsaiḥ piṇḍasvēdaṁ prayōjayēt||25||
gōkharōṣṭravarāhāśvaśakr̥dbhiḥ satuṣairyavaiḥ|
sikatāpāṁśupāṣāṇakarīṣāyasapūṭakaiḥ||26||
ślaiṣmikān svēdayēt pūrvairvātikān samupācarēt|
dravyāṇyētāni śasyantē yathāsvaṁ prastarēṣvapi||27||

vakṣyamāṇānāṁ saṅkarādisvēdānāṁ dravyāṇyāha- tilamāṣētyādi| piṇḍarūpaḥ svēdaḥ piṇḍasvēdaḥ| karīṣaḥ śuṣkagōmayaḥ; āyasaḥ ayōvikāraḥ, sa cēha puṭakaraṇayōgyō bōddhavyaḥ| pūrvairiti tilamāṣādibhiḥ| yathāsvamityanēna tilamāṣādayō vātē, gōkharādigranthōktāśca ślēṣmaṇi, prastarasvēdē kartavyā iti darśayati||25-27||

bhūgr̥hēṣu ca jēntākēṣūṣṇagarbhagr̥hēṣu ca|
vidhūmāṅgārataptēṣu svabhyaktaḥ svidyatē sukham||28||

bhūgr̥hēṣviti bhūsvēdārthēṣu gr̥hēṣu| uṣṇagarbhagr̥hēṣviti kuṭīsvēdaṁ darśayati| svabhyakta iti samyagabhyaktaḥ||28||

grāmyānūpaudakaṁ māṁsaṁ payō bastaśirastathā|
varāhamadhyapittāsr̥k [5] snēhavattilataṇḍulāḥ||29||
ityētāni samutkvāthya nāḍīsvēdaṁ prayōjayēt|
dēśakālavibhāgajñō [6] yuktyapēkṣō bhiṣaktamaḥ||30||
vāruṇāmr̥takairaṇḍaśigrumūlakasarṣapaiḥ|
vāsāvaṁśakarañjārkapatrairaśmantakasya ca||31||
śōbhāñjanakasairēyamālatīsurasārjakaiḥ [7] |
patrairutkvāthya salilaṁ nāḍīsvēdaṁ prayōjayēt||32||
bhūtīkapañcamūlābhyāṁ surayā dadhimastunā|
mūtrairamlaiśca sasnēhairnāḍīsvēdaṁ prayōjayēt||33||

bastaśiraḥ chāgamastakam| snēhavantaścairaṇḍabījādayaḥ tilāśca taṇḍulāśca snēhavattilataṇḍulāḥ| grāmyētyādinā vātāpahō nāḍīsvēda uktaḥ, vāruṇētyādinā kaphāpahaḥ, bhūtīkētyādinā vātaślēṣmāpahaḥ| vāruṇō varuṇaḥ amr̥takā guḍūcī, sarṣapairityatra patrairiti sambadhyatē| vaṁśō vēṇuḥ| punaḥ śōbhāñjanagrahaṇāddvitīyō viṭapaśōbhāñjanō gr̥hyatē, sairēyaḥ jhiṇṭī||29-33||

ēta ēva ca niryūhāḥ prayōjyā jalakōṣṭhakē|
svēdanārthaṁ ghr̥takṣīratailakōṣṭhāṁśca kārayēt||34||

ēta ēvēti nāḍīsvēdōktāstrayō’pi| jalakōṣṭhaḥ avagāhārthaṁ kr̥taṁ mahajjalapātram; ēvaṁ ghr̥takṣīratailakōṣṭhāśca vyākhyātāḥ||34||

gōdhūmaśakalaiścūrṇairyavānāmamlasaṁyutaiḥ|
sasnēhakiṇvalavaṇairupanāhaḥ praśasyatē||35||
gandhaiḥ surāyāḥ kiṇvēna jīvantyā śatapuṣpayā|
umayā kuṣṭhatailābhyāṁ yuktayā cōpanāhayēt||36||
carmabhiścōpanaddhavyaḥ salōmabhirapūtibhiḥ|
uṣṇavīryairalābhē tu kauśēyāvikaśāṭakaiḥ||37||

gōdhūmaśakalaiḥ gōdhūmacūrṇaiḥ| kiṇvaḥ surābījam| upanāhaḥ bahalaṁ lēpaṁ dattvā carmādibhirāvr̥tya vyādhiyuktasyāṅgasya bandhanam; carmabhiścōpanaddhavya ityatra upanāhō’nagnisvēdō [8] grāhyaḥ| gandhaiḥ sugandhidravyairupanāhō bandhanīyaḥ| uṣṇavīryairiti uṣṇavīryamr̥gādiprāṇiprabhavaiḥ [9] | āvikaśāṭakaḥ kambalaḥ||35-37||

rātrau baddhaṁ divā muñcēnmuñcēdrātrau divā kr̥tam|
vidāhaparihārārthaṁ, syāt prakarṣastu śītalē||38||

upanāhasvēdē bandhamōkṣāvadhiṁ darśayati- rātrau baddhamityādi| divākr̥tamityatra ‘bandhaṁ’ iti śēṣaḥ| vidāhaḥ raktādividāhaḥ| śītalē ityatra “kālē” iti śēṣaḥ| prakarṣa uktādbandhanakālādadhikakālatvaṁ bandhanasya||38||

saṅkaraḥ prastarō nāḍī pariṣēkō’vagāhanam|
jēntākō’śmaghanaḥ karṣūḥ kuṭī bhūḥ kumbhikaiva ca||39||
kūpō hōlāka ityētē svēdayanti trayōdaśa|
tān yathāvat pravakṣyāmi sarvānēvānupūrvaśaḥ||40||

samprati sāgnisvēdānāṁ saṅkarādīnāṁ lakṣaṇamabhidhātuṁ saṅkarādīn svēdān nāmatastāvaduddiśati- saṅkara ityādi| saṅkarādiśabdāścāyurvēdaparamparāsiddhāḥ; tatra kvacinnāḍīsvēdādau nāḍyā praṇīyata ityanvayō’pyanusaraṇīyaḥ, jēntākādayaścānvayanirapēkṣā ēva||39-40||

tatra vastrāntaritairavastrāntaritairvā piṇḍairyathōktairupasvēdanaṁ saṅkarasvēda iti vidyāt||41||

piṇḍairyathōktairiti tilamāṣādipiṇḍaistathā gōkharādigranthōktapuṭakarūpaiśca piṇḍaiḥ; svēdanamēvōpasvēdanam||41||

śūkaśamīdhānyapulākānāṁ vēśavārapāyasakr̥śarōtkārikādīnāṁ vā prastarē kauśēyāvikōttarapracchadēpañcāṅgulōrubūkārkapatrapracchadē vā svabhyaktasarvagātrasya śayānasyōpasvēdanaṁ [10] prastarasvēda iti vidyāt||42||

pulākaḥ tucchadhānyam| utkārikā māṣādikr̥tōtkārākr̥tivyañjanaviśēṣaḥ [11] | prastīryata iti prastaraḥ śayanapramāṇēna svēdavastūnāṁ vistaraṇaṁ, tasmin prastarē| kauśēyāvikōttarapracchadē kauśēyāvikapihita ityarthaḥ| pañcāṅgula ēraṇḍabhēdaḥ||42||

svēdanadravyāṇāṁ punarmūlaphalapatraśuṅgādīnāṁ mr̥gaśakunapiśitaśiraspadādīnāmuṣṇasvabhāvānāṁ vā yathārhamamlalavaṇasnēhōpasaṁhitānāṁ mūtrakṣīrādīnāṁ vā kumbhyāṁ bāṣpamanudvamantyāmutkvathitānāṁ nāḍyā śarēṣīkāvaṁśadalakarañjārkapatrānyatamakr̥tayā gajāgrahastasaṁsthānayā vyāmadīrghayā vyāmārdhadīrghayā vā vyāmacaturbhāgāṣṭabhāgamūlāgrapariṇāhasrōtasā sarvatō vātaharapatrasaṁvr̥tacchidrayā dvistrirvā vināmitayā vātaharasiddhasnēhābhyaktagātrō bāṣpamupaharēt; bāṣpō hyanr̥jugāmī [12] vihatacaṇḍavēgastvacamavidahan sukhaṁ svēdayatīti nāḍīsvēdaḥ||43||

svēdanētyādinā nāḍīsvēdamāha| svēdanadravyāṇi svēdōpagagaṇōktāni iha ca nāḍīsvēdakvāthārthamuktāni| śiraḥpadaṁ mastakam| bāṣpamanudvamantyāmityanēna kvathanakālē bāṣpō yathā na niryāti tathā kartavyamiti darśayati| utkvathitānāṁ bāṣpaṁ snēhāktagātraḥ [13] san nāḍyā upaharēditi sambandhaḥ| nāḍīkaraṇavidhimāha- śarēṣīkētyādi| vaṁśadalō vaṁśavidalaḥ [14] | gajāgrahastasaṁsthānatvaṁ nāḍyā agra ēva bōddhavyam| vyāmaḥ tiryagvistr̥tabāhudvayapramāṇaṁ; vyāmadīrghatvaṁ nāḍyā bahalasvēdē kartavyam| vyāmacaturthabhāgēna vyāmāṣṭabhāgēna ca mūlē agrē ca yathāsaṅkhyaṁ mānaṁ nāḍyā vēditavyaṁ; pariṇāhēna vēṣṭanēna srōtō randhraṁ yasyāḥ sā tathā| yathōktanāḍīkaraṇē guṇamāha- bāṣpō hītyādi| vihatacaṇḍavēgatvaṁ nāḍīkāyā dīrghatvēna vakratvēna ca bōddhavyam||43||

vātikōttaravātikānāṁ punarmūlādīnāmutkvāthaiḥ sukhōṣṇaiḥ kumbhīrvarṣaṇikāḥ [15] pranāḍīrvā pūrayitvā yathārhasiddhasnēhābhyaktagātraṁ vastrāvacchannaṁ pariṣēcayēditi pariṣēkaḥ||44||

pariṣēkavidhimāha- vātikētyādi| vātikāni vātaharāṇi, uttaravātikāni uttaravātē [16] pradhānavātē vātaślēṣmaṇi hitānīha grāhyāṇi| varṣaṇikā alpaghaṭī, ‘sahasradhārā’ ityanyē; praṇāḍī vēṇunalanāḍyādyāḥ||44||

vātaharōtkvāthakṣīratailaghr̥tapiśitarasōṣṇasalilakōṣṭhakāvagāhastu yathōkta ēvāvagāhaḥ||45||

yathōkta ēvēti lōkaprasiddha ēva| avagāhaḥ avagāhasvēdaḥ||45||

atha jēntākaṁ cikīrṣurbhūmiṁ parīkṣēta- tatra pūrvasyāṁ diśyuttarasyāṁ vā guṇavati praśastē bhūmibhāgē kr̥ṣṇamadhuramr̥ttikē suvarṇamr̥ttikē vā parīvāpapuṣkariṇyādīnāṁ jalāśayānāmanyatamasya kūlē dakṣiṇē paścimē vā sūpatīrthē samasuvibhaktabhūmibhāgē saptāṣṭau vā’ratnīrupakramyōdakāt prāṅmukhamudaṅmukhaṁ vā’bhimukhatīrthaṁ kūṭāgāraṁ kārayēt, utsēdhavistārataḥ paramaratnīḥ ṣōḍaśa, samantāt suvr̥ttaṁ mr̥tkarmasampannamanēkavātāyanam; asya kūṭāgārasyāntaḥ samantatō bhittimaratnivistārōtsēdhāṁ piṇḍikāṁ kārayēdākapāṭāt, madhyē cāsya kūṭāgārasya catuṣkiṣkumātraṁ puruṣapramāṇaṁ mr̥nmayaṁ kandusaṁsthānaṁ bahusūkṣmacchidramaṅgārakōṣṭhakastambhaṁ sapidhānaṁ kārayēt; taṁ ca khādirāṇāmāśvakarṇādīnāṁ vā kāṣṭhānāṁ pūrayitvā pradīpayēt; sa yadā jānīyāt sādhu dagdhāni kāṣṭhāni gatadhūmānyavataptaṁ ca kēvalamagninā tadagnigr̥haṁ svēdayōgyēna cōṣmaṇā yuktamiti, tatrainaṁ puruṣaṁ vātaharābhyaktagātraṁ vastrāvacchannaṁ pravēśayēt, pravēśayaṁścainamanuśiṣyāt- saumya! praviśa kalyāṇāyārōgyāya cēti, praviśya caināṁ piṇḍikāmadhiruhya pārśvāparapārśvābhyāṁ yathāsukhaṁ śayīthāḥ, na ca tvayā svēdamūrcchāparītēnāpi satā piṇḍikaiṣā vimōktavyā”prāṇōcchvāsāt, bhraśyamānō hyataḥ piṇḍivakāvakāśāddvāramanadhigacchan svēdamūrcchāparītatayā sadyaḥ prāṇāñjahyāḥ, tasmāt piṇḍikāmēnāṁ na kathañcana muñcēthāḥ; tvaṁ yadā jānīyāḥ- vigatābhiṣyandamātmānaṁ samyakprasrutasvēdapicchaṁ sarvasrōtōvimuktaṁ laghūbhūtamapagatavibandhastambhasuptivēdanāgauravamiti, tatastāṁ piṇḍikāmanusaran dvāraṁ prapadyēthāḥ, niṣkramya ca na sahasā cakṣuṣōḥ paripālanārthaṁ śītōdakamupaspr̥śēthāḥ, apagatasantāpaklamastu muhūrtāt sukhōṣṇēna vāriṇā yathānyāyaṁ pariṣiktō’śnīyāḥ; iti jēntākasvēdaḥ||46||

jēntākavidhimāha- athētyādi| athaśabdō maṅgalē ānantaryē vā| pūrvasyāmuttarasyāṁ vēti grāmādbāddhavyam| guṇavatīti sasyaprarōhādiyuktatvēna; praśastabhūmibhāgatvaṁ tuṣāṅgārādirahitatvēna| parīvāpaḥ dīrghikā| suṣṭhu upa samīpē tīrthaṁ yasya tasmin sūpatīrthē| aratniḥ hastaḥ| prāṅmukhamiti paścimē, udaṅmukhamiti dakṣiṇē; ēvaṁ hyabhimukhaṁ tīrthaṁ bhavati| kūṭāgāramiti vartulāgāram| ākapāṭādityanēna dvāraparyantaṁ lakṣayati| kiṣkuḥ hastaḥ| puruṣapramāṇamiti ūrdhvataḥ| kanduḥ kandvākārāgnisthānam| aṅgārārthaṁ kōṣṭhō’vakāśō vidyatē yasmin sō’ṅgārakōṣṭhakaḥ, sa ēva stambha ityaṅgārakōṣṭhakastambhaḥ| khādirāṇāmiti pūraṇē ṣaṣṭhī| sa ityatra ‘tvaṁ’ ityadhyāhāryaṁ, jānīyā ityarthaḥ; kiṁvā, ‘jānīyāt’ iti pāṭhaḥ, uttaratrāpi ‘pravēśayēt’ iti pāṭhaḥ; ēvaṁ ca sugamam| picchā svēdasyaiva picchilō bhāgaḥ| sarvēṣu srōtaḥsu vimuktaṁ sarvasrōtōvimuktam apagatavibandhastu apagatamalavibandhō bōddhavyaḥ| cakṣuṣōḥ paripālanārthamiti atrōpataptasya [17] sahasā śītajalapravēśē śītajalaparāhata ūṣmā nayanōpaghātaṁ karōtītyabhiprāyaḥ| atra ca jēntākē bhūmiviśēṣaparigrahajalasānnidhyādayō maṅgalārthāḥ; jalasānnidhyaṁ tu svidyamānasya darśanēna dr̥ṣṭēḥ paripālanārthaṁ ca, tathā svēdātiyōgapratikriyārthaṁ kūṭāgārasya jalasānnidhyē sukhēna karaṇārthaṁ ca||46||

śayānasya pramāṇēna ghanāmaśmamayīṁ śilām|
tāpayitvā mārutaghnairdārubhiḥ sampradīpitaiḥ||47||
vyapōjjhya sarvānaṅgārān prōkṣya caivōṣṇavāriṇā|
tāṁ śilāmatha kurvīta kauṣēyāvikasaṁstarām||48||
tasyāṁ svabhyaktasarvāṅgaḥ svapan svidyati nā sukham|
kauravājinakauṣēyaprāvārādyaiḥ [18] susaṁvr̥taḥ [19] ||49||
ityaktō’śmaghanasvēdaḥ,…|50|

kauravaṁ kārpāsam||47-49||-

…karṣūsvēdaḥ pravakṣyatē|
khānayēcchayanasyādhaḥ karṣūṁ sthānavibhāgavit||50||
dīptairadhūmairaṅgāraistāṁ karṣūṁ pūrayēttataḥ|
tasyāmupari śayyāyāṁ svapan svidyati nā sukham||51||

karṣūḥ abhyantaravistīrṇaḥ svalpamukhō gartaḥ||50-51||

anatyutsēdhavistārāṁ vr̥ttākārāmalōcanām|
ghanabhittiṁ kuṭīṁ kr̥tvā kuṣṭhādyaiḥ sampralēpayēt||52||
kuṭīmadhyē bhiṣak śayyāṁ svāstīrṇāmupakalpayēt|
prāvārājinakauśēyakuthakambalagōlakaiḥ||53||
hasantikābhiraṅgārapūrṇābhistāṁ ca sarvaśaḥ|
parivāryāntarārōhēdabhyaktaḥ svidyatē sukham||54||
ya ēvāśmaghanasvēdavidhirbhūmau sa ēva tu|
praśastāyāṁ nivātāyāṁ samāyāmupadiśyatē||55||

anatyutsēdhavistārāmiti svalpapramāṇōcchrāyavistārām| alōcanāṁ nirjālakām| kuṣṭhādyairiti atrādiśabdaḥ prakāravacanaḥ, tēnōṣṇasugandhidravyairiti bhavati| hasantikā aṅgāradhāni(ri)kā, parivāryēti hasantikābhirityanēna sambadhyatē| tāmiti upakalpitaśayyāṁ kuṭīm, ārōhēditi sambandhaḥ||52-55||

kumbhīṁ vātaharakvāthapūrṇāṁ bhūmau nikhānayēt|
ardhabhāgaṁ tribhāgaṁ vā śayanaṁ tatra cōpari||56||
sthāpayēdāsanaṁ vā’pi nātisāndraparicchadam|
atha kumbhyāṁ susantaptān prakṣipēdayasō guḍān||57||
pāṣāṇān vōṣmaṇā tēna tatsthaḥ svidyati nā sukham|
susaṁvr̥tāṅgaḥ svabhyaktaḥ snēhairanilanāśanaiḥ||58||

śayanaṁ tatra cōparīti atra kumbhīkōpari śayanaṁ khaṭṭādi tathā kartavyaṁ yathā kumbhīkā na bhajyatē| tatstha iti yathōktaśayanāsanasthaḥ||56-58||

kūpaṁ śayanavistāraṁ dviguṇaṁ cāpi vēdhataḥ|
dēśē nivātē śastē ca kuryādantaḥsumārjitam||59||
hastyaśvagōkharōṣṭrāṇāṁ karīṣairdagdhapūritē|
svavacchannaḥ susaṁstīrṇē’bhyaktaḥ svidyati nā sukham||60||

kūpamiti kūpamiva kūpaṁ gabhīratvēna| dviguṇamiti vistārādbōddhavyam| vēdhata ityadhaḥkhananapramāṇēna| susaṁstīrṇa iti suṣṭhu saṁstīrṇē ācchāditē, śayyayā khaṭvōparisthitayā ācchāditē kūpē iti bōddhavyam||59-60||

dhītīkāṁ [20] tu karīṣāṇāṁ yathōktānāṁ pradīpayēt|
śayanāntaḥpramāṇēna śayyāmupari tatra ca||61||
sudagdhāyāṁ vidhūmāyāṁ yathōktāmupakalpayēt|
svavacchannaḥ svapaṁstatrābhyaktaḥ svidyati nā sukham||62||
hōlākasvēda ityēṣa sukhaḥ prōktō maharṣiṇā|
iti trayōdaśavidhaḥ svēdō’gniguṇasaṁśrayaḥ||63||

dhītīkāmityādinā hōlākasvēdaḥ| dhītīkā śuṣkagōmayādikr̥tō’gnyāśrayaviśēṣaḥ| yathōktānāmiti pūrvōktahastyaśvādibhavānām| śayanāntaḥpramāṇēna dhītīkāṁ ‘kr̥tvā’ ityadhyāhārya yōjyam| yathōktāmiti nātisāndraparicchadām| upasaṁharati- itītyādi| sākṣādagnērguṇamuṣṇatvamāśritya svēdayatītyagniguṇasaṁśrayaḥ||61-63||

vyāyāma uṣṇasadanaṁ guruprāvaraṇaṁ kṣudhā|
bahupānaṁ bhayakrōdhāvupanāhāhavātapāḥ||64||
svēdayanti daśaitāni naramagniguṇādr̥tē|65|

sampratyanagnisvēdānāha- vyāyāma ityādi| uṣṇasadanamiti agnisantāpavyatirēkēṇa nirjālakatayā ghanabhittitayā ca yadgr̥haṁ svēdayati tadbōddhavyam  bahupānamiti bahumadyapānam| upanāhō dvividhaḥ- sāgniranagniśca; tatra yaḥ sāgnirupanāhaḥ sa saṅkara ēva bōddhavyaḥ, yaduktaṁ- “kōlaṁ kulatthāḥ suradārurāsnāḥ” (sū.a.3) ityādinā”ragvadhīyē; yastvanagnirbahalatvēna śarīrōṣmarōdhaṁ kr̥tvā svēdayati sa iha bōddhavyaḥ| ātapaśca yadyapyuṣṇaḥ, tathā’pyagnikr̥taṁ tasyōṣṇatvaṁ na bhavatītyanagnisvēda uktaḥ| agniguṇādr̥tē iti sākṣādagnisambandhēna kr̥tāduṣṇatvādvinā||64||-

ityuktō dvividhaḥ svēdaḥ saṁyuktō’gniguṇairna ca||65||
ēkāṅgasarvāṅgagataḥ snigdhō rūkṣastathaiva ca|
ityētattrividhaṁ dvandvaṁ svēdamuddiśya kīrtitam||66||

sarvasvēdamupasaṁharati- ityukta ityādi| ēkāṅgagatāḥ saṅkaranāḍyādayaḥ, sarvāṅgagatāḥ prastarajēntākādayaḥ| snigdhō vātavihitaḥ svēdaḥ| rūkṣaḥ kaphavihitaḥ| snigdharūkṣastu vātaślēṣmavihitō’nayōrna bhidyata iti pr̥thaṅgōktaḥ| dvandvaṁ parasparaṁ viruddhaṁ yugmam||65-66||

snigdhaḥ svēdairupakramyaḥ svinnaḥ pathyāśanō bhavēt|
tadahaḥ svinnagātrastu vyāyāmaṁ varjayēnnaraḥ||67||

svinnēna yathā kartavyaṁ tadāha- snigdha ityādi  pathyāśanō bhavēdityatra yadyapi śr̥ṅgagrāhikayā pathyaṁ nōktaṁ, tathā’pi svēdapravr̥ttiviṣayadōṣasya yat pathyaṁ tadēva bōddhavyam||67||

tatra ślōkāḥ-
svēdō yathā kāryakarō hitō yēbhyaśca yadvidhaḥ|
yatra dēśē yathā yōgyō dēśō rakṣyaśca yō yathā||68||
svinnātisvinnarūpāṇi tathā’tisvinnabhēṣajam|
asvēdyāḥ svēdayōgyāśca svēdadravyāṇi kalpanā||69||
trayōdaśavidhaḥ svēdō vinā daśavidhō’gninā|
saṅgrahēṇa ca ṣaṭ svēdāḥ svēdādhyāyē nidarśitāḥ||70||
svēdādhikārē yadvācyamuktamētanmaharṣiṇā [21] |
śiṣyaistu pratipattavyamupadēṣṭā punarvasuḥ||71||

saṅgrahē svēdō yathā kāryakara iti snēhapūrvaṁ prayuktēnētyādi| yēbhyaśca yadvidha iti vātē snigdha ityādi saṅgr̥hṇāti| yatra dēśē yathā yōgya iti āmāśayagatē vātē rūkṣapūrva ityādi| śēṣaṁ sugamam||68-71||

ityagnivēśakr̥tē tantrē carakapratisaṁskr̥tē ślōkasthānē svēdādhyāyō nāma caturdaśō’dhyāyaḥ||14||

iti śrīcakrapāṇidattakr̥tāyāṁ carakatātparyaṭīkāyāmāyurvēdadīpikākhyāyāṁ sūtrasthānē nirdēśacatuṣkē svēdādhyāyaścaturdaśaḥ||14||

1. ‘karpaṭāvayavaḥ paṭāvayavaḥ’ iti pāṭhaḥ|
2. ‘kṣutparītānāṁ’ iti pā.|
3. ‘śukrāghātē’ iti pā.|
4. ‘stambhasya gauravaṁ bahutvamatistabdhatētyarthaḥ| na tu gauravamityarthaḥ, alāghavē iti pūrvamuktatvāt’ iti śivadāsasēnaḥ|
5. ‘varāhamēdaḥ’ iti pā.|
6. ‘dēśakālavikārajñaḥ iti, dēśakālavicārajñaḥ’ iti ca pā.
7. ‘… śairīṣa…’ iti pā.|
8. ‘ayaṁ cānagnirasvēdō’tibahalatvēna śarīrōṣmarōdhaṁ kr̥tvā svēdayati’ iti śivadāsasēnaḥ|
9. ‘ānūpaprāṇibhavāni carmāṇi prāyēṇōṣṇavīryāṇi bhavanti’ iti śivadāsasēnaḥ|
10. ‘śayānasyōpari svēdanaṁ’ iti pā.|
11. ‘māṁsādikr̥ta … ’ iti pā.|
12. ‘hyanūrdhvagāmī’ iti pā.|
13. ‘snēhāktagātrasya’ iti pā.|
14. ‘vaṁśapatraṁ’ iti pā.|
15. ‘vārṣulikāḥ iti, varṣulikā’ iti ca pā.|
16. ‘uttaraḥ pradhānō vātō yatra īdr̥śō yō vātakaphasaṁsargastatra hitāni’ iti śivadāsasēnaḥ|
17. ‘atrōṣṇataptasya’ iti pā.|
18. ‘rauravājina…’ iti pā.|
19. ‘sukhaṁ vr̥taḥ’ iti pā.|
20. ‘dhautikāṁ’ iti pā.|
21. ‘yadvācyamuktamiti svēdādhyāyē yadvācyaṁ yō’rtha uktaḥ, tacchiṣyaiḥ| pratipattavyaṁ, yataḥ punarvasurupadēṣṭā’ iti śivadāsasēnaḥ|