athātō janapadōddhvaṁsanīyaṁ vimānaṁ vyākhyāsyāmaḥ||1||
iti ha smāha bhagavānātrēyaḥ||2||

dvividhō hēturvyādhijanakaḥ prāṇināṁ bhavati- sādhāraṇaḥ, asādhāraṇaśca; tatrāsādhāraṇaṁ pratipuruṣaniyataṁ vātādijanakamāhārādyabhidhāya bahujanasādhāraṇaṁ vātajaladēśakālarūpaṁ sādhāraṇarōgakāraṇamabhidhātuṁ janapadōddhvaṁsanīyō’bhidhīyatē||1-2||

janapadamaṇḍalē pañcālakṣētrē dvijātivarādhyuṣitē kāmpilyarājadhānyāṁ bhagavān punarvasurātrēyō’ntēvāsigaṇaparivr̥taḥ paścimē gharmamāsē gaṅgātīrē vanavicāramanuvicarañchiṣyamagnivēśamabravīt||3||

janapadavasatyupalakṣitaṁ maṇḍalaṁ janapadamaṇḍalaṁ, ‘pañcālakṣētrē’ iti tasya viśēṣaṇam| dvijātivarādhyuṣita iti vacanēna mahājanasēvitē’pi dēśē’dharmavaśājjanapadōddhvaṁsō vakṣyamāṇō bhavatīti darśayati| paścimē gharmamāsa iti jyēṣṭhē| vanavicāramanuvicaranniti vanaṁ vicarya vicaryānuvicarannityarthaḥ||3||

dr̥śyantē hi khalu saumya! nakṣatragrahagaṇacandrasūryānilānalānāṁ diśāṁ cāprakr̥tibhūtānāmr̥tuvaikārikā [1] bhāvāḥ, acirāditō bhūrapi ca na yathāvadrasavīryavipākaprabhāvamōṣadhīnāṁ pratividhāsyati, tadviyōgāccātaṅkaprāyatā niyatā|
tasmāt prāguddhvaṁsāt prāk ca bhūmērvirasībhāvāduddharadhvaṁ saumya! bhaiṣajyāni yāvannōpahatarasavīryavipākaprabhāvāṇi bhavanti|
vayaṁ caiṣāṁ rasavīryavipākaprabhāvānupayōkṣyāmahē yē cāsmānanukāṅkṣanti, yāṁśca vayamanukāṅkṣāmaḥ|
na hi samyaguddhr̥tēṣu saumya! bhaiṣajyēṣu samyagvihitēṣu samyak cāvacāritēṣu janapadōddhvaṁsakarāṇāṁ vikārāṇāṁ kiñcit pratīkāragauravaṁ bhavati||4||

r̥tuvikārāya bhūtā r̥tuvaikārikāḥ; r̥tuvikāraścōpalakṣaṇaṁ, tēna jaladēśavātavikārāya bhūtā iti mantavyaṁ; yatō bhūmyādīnāmapi vikr̥tiṁ vakṣyati| kiṁvā r̥tvananurūpā r̥tuvaikārikāḥ; tēna, r̥tvananurūpalakṣaṇamēva nakṣatrādīnāṁ [2] vikr̥tirityuktaṁ bhavati; grīṣmē hi nakṣatrāṇi nirmalāni bhavanti, tāni yadi tuṣāracchannāni grīṣmē bhavanti, tadā vikr̥tāni bhavantīti bōddhavyam| bhūrapi cētyapivacanājjalānilau ca grāhayati; tēna, bhūstāvadōṣadhīnāṁ pradhānaṁ kāraṇaṁ, sā rasādīnna pratividhāsyati; jalavātāvapi cauṣadhīnāṁ rasādīnna pratividhāsyata ityuktaṁ bhavati| pratividhāsyatīti janayiṣyati| uddharadhvamiti bahuvacanaṁ bahvantēvāsiyuktāgnivēśābhiprāyēṇa; agnivēśastu pradhānatvēnaika ēvēti ‘agnivēśa’ itipadēna tathā ‘saumya’ itipadēna sambōdhyatē; bhēṣajōddharaṇaṁ tu bahubhirēva kartavyamityabhiprāyēṇa bahuvacanam| bhavati hi pradhānaṁ sambōdhya gaṇasampādyakriyāyāṁ bahuvacanaṁ; yathā- sēnāpatē yudhyadhvamiti| anyē tu saumyapadaṁ bhēṣajaviśēṣaṇaṁ kurvanti| yē cāsmānanukāṅkṣanti yē cāsmān bhiṣajō’nukāṅkṣantītyarthaḥ, yāṁśca vayamanukāṅkṣāmaścikitsyatvēna| ētēna, yē vaidyamanukāṅkṣanti tē vaidyapriyatvēna sādhyāḥ, asādhyā hi vaidyadviṣa uktāḥ; vaidyāśca yānicchanti tē sādhyarōgā ēva, asādhyān hi vaidyā nēcchanti| ētēnānyēṣāmapi yēṣāṁ bhēṣajasādhyā rōgāstē āsāmōṣadhīnāṁ rasādīnupayōkṣyantītyarthaḥ| yadi ca yē asmadgatāḥ, yāṁśca vayaṁ prayōjanavaśādanugatāḥ, tē upayōkṣyantīti vyākhyāyatē, tadā ātrēyasya pakṣarāgitvēnāptatvaṁ na sambhavati, “sarvaprajānāṁ pitr̥vaccharaṇyaḥ” (ci.a.5) iti vacanāccāsya nīrāgatvamuktam||4||

ēvaṁvādinaṁ bhagavantamātrēyamagnivēśa uvāca- uddhr̥tāni khalu bhagavan! bhaiṣajyāni, samyagvihitāni, samyagavacāritāni [3] ca; api tu khalu janapadōddhvaṁsanamēkēnaiva vyādhinā yugapadasamānaprakr̥tyāhāradēhabalasātmyasattvavayasāṁ manuṣyāṇāṁ kasmādbhavatīti||5||

udddhr̥tānīti vacanamabhūtē bhūtavaccēti prayōgādbōddhavyaṁ, yathā- acirakartavyē kr̥tamiti vadanti; na hi vacanakāla ēva ōṣadhīnāmuddharaṇaṁ sambhavatīti| ēkēnēti ēkajātīyēna| asamānaprakr̥tyādīnāṁ samānakāraṇābhāvānna tulyarūpō vyādhirbhavitumarhatīti praśnārthaḥ||5||

tamuvāca bhagavānātrēyaḥ- ēvamasāmānyāvatāmapyēbhiragnivēśa! prakr̥tyādibhirbhāvairmanuṣyāṇāṁ yē’nyē bhāvāḥ sāmānyāstadvaiguṇyāt samānakālāḥ samānaliṅgāśca vyādhayō’bhinirvartamānā janapadamuddhvaṁsayanti|
tē tu khalvimē bhāvāḥ sāmānyā janapadēṣu bhavanti; tadyathā- vāyuḥ, udakaṁ, dēśaḥ, kāla iti||6||

samānaliṅgā iti tulyaliṅgāḥ||6||

tatra vātamēvaṁvidhamanārōgyakaraṁ vidyāt; tadyathā-yathartuviṣamamatistimitamaticalamatiparuṣamatiśītamatyuṣṇamatirūkṣamatyabhiṣyandinamatibhairavārāvamatipratihata- parasparagatimatikuṇḍalinamasātmyagandhabāṣpasikatāpāṁśudhūmōpahatamiti (1);
udakaṁ tu khalvatyarthavikr̥tagandhavarṇarasasparśaṁ klēdabahulamapakrāntajalacaravihaṅgamupakṣīṇajalēśayamaprītikaramapagataguṇaṁ [4] vidyāt (2);
dēśaṁ punaḥ prakr̥tivikr̥tavarṇagandharasasparśaṁ klēdabahulamupasr̥ṣṭaṁ sarīsr̥pavyālamaśakaśalabhamakṣikāmūṣakōlūkaśmāśānikaśakunijambūkādibhistr̥ṇōlūpōpavanavantaṁ pratānādibahulamapūrvavadavapatitaśuṣkanaṣṭaśasyaṁ dhūmrapavanaṁ pradhmātapatatrigaṇamutkruṣṭaśvagaṇamudbhrāntavyathitavividhamr̥gapakṣisaṅghamutsr̥ṣṭanaṣṭadharmasatyalajjācāraśīlaguṇajanapadaṁ śaśvatkṣubhitōdīrṇasalilāśayaṁ [5] pratatōlkāpātanirghātabhūmikampamatibhayārāvarūpaṁ [6] rūkṣatāmrāruṇasitābhrajālasaṁvr̥tārkacandratārakamabhīkṣṇaṁ sasambhramōdvēgamiva satrāsaruditamiva satamaskamiva guhyakācaritamivākranditaśabdabahulaṁ cāhitaṁ vidyāt (3);
kālaṁ tu khalu yathartuliṅgādviparītaliṅgamatiliṅgaṁ hīnaliṅgaṁ cāhitaṁ vyavasyēt (4);
imānēvandōṣayuktāṁścaturō bhāvāñjanapadōddhvaṁsakarān vadanti kuśalāḥ; atō’nyathābhūtāṁstu hitānācakṣatē||7||
viguṇēṣvapi khalvētēṣu janapadōddhvaṁsakarēṣu bhāvēṣu bhēṣajēnōpapādyamānānāmabhayaṁ bhavati rōgēbhya iti||8||

yathartuviṣamamiti r̥tvananurūpam| apagataguṇamiti jīvanapipāsāharatvādyuktajalaguṇarahitam| prakr̥tivarṇādērvikr̥tā varṇādayō yasya dēśasya taṁ prakr̥tivikr̥tavarṇagandharasasparśam| śmāśānikaśakuniḥ gr̥dhraḥ| apūrvavaditi paricitamapyupahatatvēnāpūrvamiva dr̥śyatē| utsr̥ṣṭāśca naṣṭāśca dharmasatyalajjāguṇā janairyatra sa tathā; tatra yē dharmādiyuktāstē utsr̥janti dharmādīni, yē tu dharmādīni sarvathā ajñānānnācaranti tān prati naṣṭānyēva dharmādīni| guhyakākrāntō hi dēśō yathā ākrandanaśabdabahulō bhavati tādr̥śam||7-8||

bhavanti cātra-
vaiguṇyamupapannānāṁ dēśakālānilāmbhasām|
garīyastvaṁ viśēṣēṇa hētumat sampravakṣyatē||9||
vātājjalaṁ jalāddēśaṁ dēśāt kālaṁ svabhāvataḥ|
vidyādduṣparihāryatvādgarīyastaramarthavit [7] ||10||
vāyvādiṣu yathōktānāṁ dōṣāṇāṁ tu viśēṣavit|
pratīkārasya saukaryē vidyāllāghavalakṣaṇam||11||

vaiguṇyamityādinā duṣṭānāṁ vātādīnāṁ yasya ya utkarṣō yēna ca hētunā tadāha| svabhāvatō duṣparihāryatvāditi svabhāvādēva vātāpēkṣayā jalaṁ duṣpariharaṁ bhavati, jalācca dēśaḥ, dēśācca kālaḥ| vātō hi nivātadēśasēvayā duṣṭaḥ parihriyatē, na tathā jalaṁ, taddhi dēhavr̥ttyarthamavaśyaṁ sēvyaṁ; jalamapi ca yadi mahatā prayatnēna tyajyatē, dēśastu jalāpēkṣayā duṣpariharō bhavati, tadvyatirēkēṇāvasthātumaśakyatvāt; dēśō’pi yadi dēśāntaragamanēna tyajyatē, kālastu sarvathā tyaktumaśakya iti sarvēṣvēva garīyān| ‘garīyaḥ param’ iti pāṭhē yadyataḥ paraṁ, tattatō garīyō vidyāditi yōjanā| ētadviparyayēṇa lāghavamāha- vāyvādiṣvityādi| pratīkārasya saukarya iti yathōktavidhayā vātādiparityāgasya sukaratvēnētyarthaḥ||9-11||

caturṣvapi tu duṣṭēṣu kālāntēṣu yadā narāḥ|
bhēṣajēnōpapādyantē na bhavantyāturāstadā||12||
yēṣāṁ na mr̥tyusāmānyaṁ sāmānyaṁ na ca karmaṇām|
karma pañcavidhaṁ tēṣāṁ bhēṣajaṁ paramucyatē||13||
rasāyanānāṁ vidhivaccōpayōgaḥ praśasyatē|
śasyatē dēhavr̥ttiśca bhēṣajaiḥ pūrvamuddhr̥taiḥ||14||
satyaṁ bhūtē dayā dānaṁ balayō dēvatārcanam|
saddhr̥ttasyānuvr̥ttiśca praśamō guptirātmanaḥ||15||
hitaṁ janapadānāṁ ca śivānāmupasēvanam|
sēvanaṁ brahmacaryasya tathaiva brahmacāriṇām||16||
saṅkathā dharmaśāstrāṇāṁ maharṣīṇāṁ jitātmanām|
dhārmikaiḥ sāttvikairnityaṁ sahāsyā vr̥ddhasammataiḥ||17||
ityētadbhēṣajaṁ prōktamāyuṣaḥ paripālanam|
yēṣāmaniyatō mr̥tyustasmin kālē sudāruṇē||18||

yēṣāṁ na mr̥tyusāmānyamiti na [8] mr̥tyujanakadaivasāmyaṁ yēṣāmastītyarthaḥ| sāmānyaṁ na ca karmaṇāmiti naca mārakakarmasāmānyaṁ yēṣāmastītyarthaḥ| kēciddhi sambhūyaiva janmāntarē grāmadāhādikarma kurvatē sma, tatkarmabalāt saṁhatamr̥tyava ēva bhavanti; kiṁvā pr̥thagapi mārakaṁ karma kr̥taṁ kēṣāñcidēkakālaṁ vipacyamānaṁ bhavati, tē’pi samakālabhr̥tyavō bhavanti| tatra, na mr̥tyusāmānyamityanēnōtpannariṣṭatvādēva kēcidasādhyā iti darśayati, na karmasāmānyamityanēna kēciccājātariṣṭā api niyatamārakakarmavaśādasādhyā bhavantīti darśayati; kiṁvā na mr̥tyusāmānyamityanēna ca mārakō vyādhiḥ sādhāraṇa ucyatē, na karmasāmānyamityanēna ca mārakavyādhijanakaṁ karmōcyatē| pūrvamuddhr̥tairiti vyāpattēḥ pūrvaṁ gr̥hītaiḥ| guptiḥ mantrādinā rakṣā| aniyata iti vacanēna durbalakarmārabdhō hi mr̥tyuḥ pāryata ēvaivaṁ pratikartumiti darśayati||12-18||

iti śrutvā janapadōddhvaṁsanē kāraṇāni punarapi bhagavantamātrēyamagnivēśa uvāca- atha khalu bhagavan! kutōmūlamēṣāṁ vāyvādīnāṁ vaiguṇyamutpadyatē? yēnōpapannā janapadamuddhvaṁsayantīti||19||
tamuvāca bhagavānātrēyaḥ- sarvēṣāmapyagnivēśa! vāyvādīnāṁ yadvaiguṇyamutpadyatē tasya mūlamadharmaḥ, tanmūlaṁ vā’satkarma [9] pūrvakr̥taṁ; tayōryōniḥ prajñāparādha ēva|
tadyathā- yadā vai dēśanagaranigamajanapadapradhānā [10] dharmamutkramyādharmēṇa prajāṁ vartayanti, tadāśritōpāśritāḥ paurajanapadā vyavahārōpajīvinaśca tamadharmamabhivardhayanti, tataḥ sō’dharmaḥ prasabhaṁ dharmamantardhattē, tatastē’ntarhitadharmāṇō dēvatābhirapi tyajyantē; tēṣāṁ tathā’ntarhitadharmaṇāmadharmapradhānānāmapakrāntadēvatānāmr̥tavō vyāpadyantē; tēna nāpō yathākālaṁ dēvō varṣati na vā varṣati vikr̥taṁ vā varṣati, vātā na samyagabhivānti, kṣitirvyāpadyatē, salilānyupaśuṣyanti, ōṣadhayaḥ svabhāvaṁ parihāyāpadyantē vikr̥tiṁ; tata uddhvaṁsantē janapadāḥ spr̥śyābhyavahāryadōṣāt [11] ||20||

kutōmūlaṁ kimmūlamityarthaḥ| tasya mūlamadharma iti aihikamadharmaṁ darśayati| tanmūlaṁ vēti tasya vātādivaiguṇyasya mūlaṁ pūrvakr̥taṁ vā karma| tēnaihikō vā’dharmō janmāntarakr̥tō vā’dharmō vātādivaiguṇyasya kāraṇamiti brūtē| tadyadā dēśētyādinā tvaihikamēvādharmaṁ yadvakṣyati hētutayā tat pratyakṣatvēna sphuṭasiddhāntārthaṁ, natu janmāntarakr̥tādharmasyākāraṇatvēnēti jñēyam| tayōriti aihikajanmāntarīyayōradharmayōḥ| yōniriti kāraṇam| spr̥śyābhyavahāryadōṣāditi spr̥śyasya vā jalādērabhyavahāryasya ca kr̥tsnasya duṣṭatvāt| ētacca prādhānyēna jñēyaṁ; tēna duṣṭapavanagandhadōṣō’pi jñēyaḥ, asātmyagandhō’pi duṣṭavātē uktaḥ||19-20||

tathā śastraprabhavasyāpi janapadōddhvaṁsasyādharma ēva hēturbhavati|
yē’tipravr̥ddhalōbhakrōdhamōhamānāstē durbalānavamatyātmasvajanaparōpaghātāya śastrēṇa parasparamabhikrāmanti, parān vā’bhikrāmanti, parairvā’bhikrāmyantē||21||

śastraprabhavasyāpīti bahujanamārakasya śastraprabhavasyētyarthaḥ| ātmasvajanaparōpaghātāyēti atra ātmanaḥ svajanasya parasya cōpaghātō bhavati prāya ityarthaḥ||21||

rakṣōgaṇādibhirvā vividhairbhūtasaṅghaistamadharmamanyadvā’pyapacārāntaramupalabhyābhihanyantē||22||

rākṣasādyutsādō’pi janānāmadharmakr̥ta ēva bhavatītyāha- rakṣōgaṇētyādi| anyadvā apacārāntaramiti yathōktādharmakāraṇādanyadadharmakāraṇamaśaucādītyarthaḥ||22||

tathā’bhiśāpaprabhavasyāpyadharma ēva hēturbhavati|
yē luptadharmāṇō dharmādapētāstē guruvr̥ddhasiddharṣipūjyānavamatyāhitānyācaranti; tatastāḥ prajā gurvādibhirabhiśaptā bhasmatāmupayānti prāgēvānēkapuruṣakulavināśāya, niyatapratyayōpalambhādaniyatāścāparē [12] ||23||

prāgēvēti jhaṭiti, anēkapuruṣakulavināśāyābhiśaptā bhasmatāṁ yāntītyarthaḥ| niyatapratyayōpalambhādaniyatāścāparē bhasmatāṁ yāntīti yōjanā| aniyatā amilitā ityarthaḥ| pratiniyatapuruṣābhiśāpāt pratiniyatā ēva bhasmatāṁ yānti, na sarvē janā ityarthaḥ||23||

prāgapi cādharmādr̥tē nāśubhōtpattiranyatō’bhūt|
ādikālē hyaditisutasamaujasō’tivimalavipulaprabhāvāḥ pratyakṣadēvadēvarṣidharmayajñavidhividhānāḥ śailasārasaṁhatasthiraśarīrāḥ prasannavarṇēndriyāḥ pavanasamabalajavaparākramāścārusphicō’bhirūpapramāṇākr̥tiprasādōpacayavantaḥ satyārjavānr̥śaṁsyadānadamaniyamatapōpavāsabrahmacaryavrataparā vyapagatabhayarāgadvēṣamōhalōbhakrōdhaśōkamānarōganidrātandrāśramaklamālasyaparigrahāśca puruṣā babhūvuramitāyuṣaḥ|
tēṣāmudārasattvaguṇakarmaṇāmacintyarasavīryavipākaprabhāvaguṇasamuditāni [13] prādurbabhūvuḥ śasyāni sarvaguṇasamuditatvāt pr̥thivyādīnāṁ kr̥tayugasyādau|
bhraśyati tu kr̥tayugē kēṣāñcidatyādānāt sāmpannikānāṁ sattvānāṁ śarīragauravamāsīt, śarīragauravācchramaḥ, śramādālasyam, ālasyāt sañcayaḥ, sañcayāt parigrahaḥ, parigrahāllōbhaḥ prādurāsīt kr̥tē|
tatastrētāyāṁ lōbhādabhidrōhaḥ, abhidrōhānr̥tavacanam, anr̥tavacanāt kāmakrōdhamānadvēṣapāruṣyābhighātabhayatāpaśōkacintōdvēgādayaḥ pravr̥ttāḥ|
tatastrētāyāṁ dharmapādō’ntardhānamagamat|
tasyāntardhānāt yugavarṣapramāṇasya pādahrāsaḥ, pr̥thivyādēśca guṇapādapraṇāśō’bhūt|
tatpraṇāśakr̥taśca śasyānāṁ snēhavaimalyarasavīryavipākaprabhāvaguṇapādabhrāṁśaḥ|
tatastāni prajāśarīrāṇi hīyamānaguṇapādairāhāravihārairayathāpūrvamupaṣṭabhyamānānyagnimārutaparītāni [14] prāgvyādhibhirjvarādibhirākrāntāni|
ataḥ prāṇinō hrāsamavāpurāyuṣaḥ kramaśa iti||24||

ādyāvirbhāvē ca rōgāṇāmadharma ēva kāraṇamityāha- prāgapi cētyādi| yajñaḥ yajñadēvatā, vidhiḥ yajñavidhāyakō vēdaḥ, vidhānaṁ yajñakarma| javaḥ vēgaḥ| parigrahaḥ mamatā| amitamivātibahutvēnāyuryēṣāṁ tē amitāyuṣaḥ| satyē hi caturvarṣaśatamāyuḥ; yaduktaṁ bhagavatā vyāsēna- “puruṣāḥ sarvasiddhārthāścaturvarṣaśatāyuṣaḥ| kr̥tē” iti| sāmpannikānām īśvarāṇām| kr̥tē iti kr̥tayugasya śēṣē| hīyamānaguṇapādairiti yathā yathā trētāyāḥ kṣayō bhavati, tathā tathā āhāravihāraguṇapādahrāsō bhavannāsta iti darśayati| vihārō’pi cādharmavatāṁ hīnaguṇō bhavati, tēna na yathāvaccharīrōpaṣṭambhanaṁ karōti| upaṣṭabhyamānānīti dhātusāmyēna pālyamānāni||24||

bhavataścātra-
yugē yugē dharmapādaḥ kramēṇānēna hīyatē|
guṇapādaśca bhūtānāmēvaṁ lōkaḥ pralīyatē||25||
saṁvatsaraśatē pūrṇē yāti saṁvatsaraḥ kṣayam|
dēhināmāyuṣaḥ kālē yatra yanmānamiṣyatē||26||
iti vikārāṇāṁ prāgutpattihēturuktō bhavati||27||

saṁvatsaraśatē pūrṇa iti saṁvatsarēṇa śatatamēṁ’śē pūrṇē| yatra yanmānamiṣyata iti yatra yugē yanmānamiṣyatē, tasya śatatamēṁ’śē pūrṇē varṣa ēkaḥ kṣayaṁ yāti| tēna, kalau śatavarṣāyuṣi yadā śatatamōṁ’śō yāti kṣayaṁ tadā navanavatiḥ paramāyurbhavatītyādyanusaraṇīyam||25-27||

ēvaṁvādinaṁ bhagavantamagnivēśa uvāca- kinnu khalu bhagavan! niyatakālapramāṇamāyuḥ sarvaṁ na vēti||28||
taṁ bhagavānuvāca-
ihāgnivēśa! bhūtānāmāyuryuktimapēkṣatē|
daivē puruṣakārē ca sthitaṁ hyasya balābalam||29||
daivamātmakr̥taṁ vidyāt karma yat paurvadaihikam|
smr̥taḥ puruṣakārastu kriyatē yadihāparam||30||
balābalaviśēṣō’sti tayōrapi ca karmaṇōḥ|
dr̥ṣṭaṁ hi trividhaṁ karma hīnaṁ madhyamamuttamam||31||
tayōrudārayōryuktirdīrghasya ca sukhasya ca|
niyatasyāyuṣō hēturviparītasya cētarā||32||
madhyamā madhyamasyēṣṭā kāraṇaṁ śr̥ṇu cāparam|33|

yuktimapēkṣata iti daivapuruṣakārayōryōgamapēkṣatē niyatatvē’niyatatvē cētyarthaḥ| balaṁ cābalaṁ ca balābalaṁ; tatrāyuṣō niyatatvēna balam, aniyatatvēnābalaṁ jñēyam| yadyapi paurvadaihikaṁ karmāsthiratvēna gataṁ, tathā’pi tajjanitādr̥ṣṭasya vidyamānatvāt taddvārā tatkarma kāraṇaṁ bhavatyēvēha janmanyapi| puruṣakārastviha janmani kr̥taṁ karma sāmānyēnōcyatē| tatra balimaṅgalādi adr̥ṣṭajananatvād vyāpriyatē, tathā bhēṣajādi rasarudhirādidvārā [15] ||28-32||-

daivaṁ puruṣakārēṇa durbalaṁ hyupahanyatē||33||
daivēna cētarat karma viśiṣṭēnōpahanyatē|
dr̥ṣṭvā yadēkē manyantē niyataṁ mānamāyuṣaḥ||34||
karma kiñcit kvacit kālē vipākē niyataṁ mahat|
kiñcittvakālaniyataṁ pratyayaiḥ pratibōdhyatē||35||

udārayōriti praśastatvēnōttamayōḥ| dīrghasyēti rasāyanādinā śatādapi dīrghasya; sukhasyēti nīrōgatvēna; niyatasyēti yuganiyatasya, kalau varṣaśatapramāṇasyētyarthaḥ; śatādarvāṅaniniyatamapīha niyataśabdēnōcyatē; tēna na tatra tasya daivapuruṣakārajanyatvaṁ ghaṭatē, tathā’pi tasyāpraśastadaivapuruṣakārajanyatvāt daivapuruṣakārajanyatvaṁ bhavatīti yuktaṁ; kiñcāniyatāyuṣa ēva puruṣā rasāyanādhikāriṇō bhavanti, niyatāyuṣaṁ prati rasāyanasyākiñcitkaratvāt; rasāyanādikr̥taṁ cāyuraniyataṁ praśastatvēna praśastadaivapuruṣakārajanyaṁ bhavatīti yuktam| kiṁvā, dīrghatvē sati niyatasyāyuṣō hēturiti yōjanā; tēna yuganiyataṁ ca śatavarṣaṁ, tathā tadadhikaṁ cāniyataṁ mahatā karmaṇaiva kriyatē; puruṣakārēṇa tu mahatā’sya sukhitvaṁ rōgānupaghātāt kriyatē; rasāyanēna ca jarādivyādhipratighātaḥ kriyatē; rasāyanalabhyamapyāyurbalavatkarmaniyatamēvēti bhāvaḥ| viparītasya dīrghatvēnāniyatasya tathā rōgayuktatvēnāsukhasya| itarēti hīnayōrddaivapuruṣakārayōryuktirityarthaḥ| madhyamāmadhyamasya dīrghatvēnādīrghatvēnāniyatasya, tathā sukhāsukhatvēnāniyatasyāyuṣō madhyamayōḥ karmaṇōryuktirityarthaḥ| kāraṇamiti daivapuruṣakārayōḥ parasparabādhanē upapattimityarthaḥ| daivamityādi| durbalamāyurjananaṁ daivaṁ balavatā mārakēṇa dr̥ṣṭāpathyabhōjanādinā viparītamaraṇakāryajananādupahanyatē; viśiṣṭēna balavatā, itarat karma dr̥ṣṭaṁ puruṣakārākhyam, upahanyatē parābhūyatē| ētaddaivakartr̥kadr̥ṣṭaparābhavadarśanāddaivaniyatamēva sarvamāyuriti kēcinmanyanta ityāha [16] – dr̥ṣṭvētyādi| yadi dr̥ṣṭamāyuḥ kāraṇaṁ syāt, na tadā bhēṣajaiḥ samyagupapāditānāṁ mr̥tyuḥ syāt; yataśca satyapi cikitsitē karmavaśāttu mr̥tyurbhavati; tēna, yatrāpi cikitsā jīvayatīti manyantē, tatrāpi karmaivāsti jīvanakāraṇamiti dr̥ṣṭaśaktitvādavadhārayāma iti bhāvaḥ| daivapuruṣakārayōrubhayōrapi bādhyatvaṁ darśayannēkāntēna niyatāyuḥpakṣaṁ vyudasyati- karmētyādi| na kvacit karma na bhavati; yaducyatē- “nābhuktaṁ kṣīyatē karma kalpakōṭiśatairapi| avaśyamēva bhōktavyaṁ kr̥taṁ karma śubhāśubham” iti| kiñcittvakālaniyatamiti, yathā- idaṁ mārakaṁ karma na tu kvacitkālē pañcaviṁśavarṣādau niyataṁ, tēna yasmin kālē puruṣakārākhyaṁ dr̥ṣṭakarmānuguṇaṁ prāpnōti tasmin kālē sahakārisānnidhyōpabr̥ṁhitabalaṁ mārayati, yadā tu dr̥ṣṭamapathyasēvādi na prāpnōti na tadā mārayati, pratyayaiḥ pratibōdhyata iti dr̥ṣṭakāraṇairudriktaṁ kriyatē| yē tu bruvatē- kiñcit karma kālaniyataṁ yadā pacyatē, tasmin kālē pacyata ēvēti kālaniyamaḥ; vipākaniyataṁ tu- idaṁ karma vipacyata ēva, na tu vipacyata iti na; kālavipākaniyataṁ tu yathā- idaṁ karma asminnēva kālē vipacyata ēvēti; ētacca kālavipākaniyatatvādbalavaducyatē; ētadēva dr̥ṣṭābādhanīyamiti; tēṣāṁ matē, abhuktamapi kṣīyatē durbalakarma prāyaścittādinēti bōddhavyaṁ, paraṁ viparyayē’pi tadā kiñcittvavipākakālaniyatamiti vaktavyaṁ syāt; kiñcittvakālaniyatamiti [17] vacanāttu kālaniyatamapi||33-35||

tasmādubhayadr̥ṣṭatvādēkāntagrahaṇamasādhu|
nidarśanamapi cātrōdāhariṣyamaḥ- yadi hi niyatakālapramāṇamāyuḥ sarvaṁ syāt, tadā”yuṣkāmāṇāṁ na mantrauṣadhimaṇimaṅgalabalyupahārahōmaniyamaprāyaścittōpavāsasvastyayanapraṇipātagamanādyāḥ kriyā iṣṭayaśca prayōjyēran; nōdbhrāntacaṇḍacapalagōjōṣṭrakharaturagamahiṣādayaḥ pavanādayaśca duṣṭāḥ parihāryāḥ syuḥ, na prapātagiriviṣamadurgāmbuvēgāḥ, tathā na pramattōnmattōdbhāntacaṇḍacapalamōhalōbhākulamatayaḥ, nārayaḥ, na pravr̥ddhō’gniḥ, ca vividhaviṣāśrayāḥ sarīsr̥pōragādayaḥ, na sāhasaṁ, nādēśakālacaryā, na narēndraprakōpa iti; ēvamādayō hi bhāvā nābhāvakarāḥ syuḥ, āyuṣaḥ sarvasya niyatakālapramāṇatvāt|
na cānabhyastākālamaraṇabhayanivārakāṇāmakālamaraṇabhayamāgacchēt praṇināṁ, vyarthāścārambhakathāprayōgabuddhayaḥ syurmaharṣīṇāṁ rasāyanādhikārē, nāpīndrō niyatāyuṣaṁ śatruṁ vajrēṇābhihanyāt, nāśvināvārtaṁ bhēṣajēnōpapādayētāṁ [18] , na maharṣayō yathēṣṭamāyustapasā prāpnuyuḥ, na ca viditavēditavyā maharṣayaḥ sasurēśāḥ samyak paśyēyurupadiśēyurācarēyurvā|
api ca sarvacakṣuṣāmētat paraṁ yadaindraṁ cakṣuḥ [19] , idaṁ cāpyasmākaṁ tēna pratyakṣaṁ; yathā- puruṣasahasrāṇāmutthāyōtthāyāhavaṁ [20] kurvatāmakurvatāṁ cātulyāyuṣṭvaṁ, tathā jātamātrāṇāmapratīkārāt pratīkārācca, aviṣaviṣaprāśināṁ cāpyatulyāyuṣṭvamēva, na ca tulyō yōgakṣēma udapānaghaṭānāṁ citraghaṭānāṁ cōtsīdatāṁ; tasmāddhitōpacāramūlaṁ jīvitam, atō viparyayānmr̥tyuḥ|
api ca dēśakālātmaguṇaviparītānāṁ karmaṇāmāhāravikārāṇāṁ ca kramōpayōgaḥ [21] samyak, tyāgaḥ sarvasya [22] cātiyōgāyōgamithyāyōgānāṁ, sarvātiyōgasandhāraṇam [23] , asandhāraṇamudīrṇānāṁ ca gatimatāṁ, sāhasānāṁ ca varjanam, ārōgyānuvr̥ttau hētumupalabhāmahē samyagupadiśāmaḥ samyak paśyāmaścēti||36||

ataḥ paramuttaramupasaṁharati [24] – tasmādityādi| ubhayadr̥ṣṭatvāditi daivasya puruṣakārēṇa, tathā puruṣakārasya daivēna bādhadarśanāt| ēkāntagrahaṇamiti niyatamēvāyuriti tathā aniyatamēvāyuḥ sarvamiti cētyarthaḥ| nidr̥śyatē’bhimataḥ pakṣaḥ sādhyatē’nēnēti nidarśanaṁ yuktarityarthaḥ| atrēti anaikāntikapakṣē| yadītyādinā prakaraṇēnāyurjanakasya dr̥ṣṭasya hētōḥ sēvā tathā āyurvighātakasya hētōrasēvā sarvaprāmāṇikajanāvivādasiddhā darśyatē| sā ca sarvā yadi niyatamāyuḥ syāttadā akiñcitkarī syāt, aniyatē cāyuṣi kiñcitkarī syāt; tasmādaniyatamapyāyurbhavatīti bhāvaḥ| na ca sarvatraivādr̥ṣṭamēva kāraṇaṁ dr̥ṣṭamakiñcitkaramēvēti vadatō dr̥ṣṭasyāpi trivr̥tādērvirēkādikartr̥tvaṁ vyaktamēva; adr̥ṣṭasyaiva tu kāraṇatvaṁ dr̥ṣṭēkāryānupapattēḥ kalpanīyaṁ; tēnādr̥ṣṭasya kāraṇatvaṁ dr̥ṣṭakāraṇamūlamityarthaḥ; na ca dr̥ṣṭakāraṇōcchēdaḥ kalpayitumapi pāryatē| iṣṭayaḥ yajñāḥ| atyarthasarpaṇaśīlā uragāḥ sarīsr̥pōragāḥ| ācarēyurvā ‘bhēṣajam [25] ’ iti śēṣaḥ| cakṣuṣāṁ paramiti atyarthābhrāntatvēna| atulyāyuṣṭvamiti yē āhavaṁ kurvatē tē śastrēṇa mriyantē, yē tu na kurvatē tē śastrēṇa na prāyō mriyantē| pratīkārādapratīkārāccātulyāyuṣṭvamiti yōjanā| na ca tulya ityādau citraghaṭō yaścitrita iva sthāpyatē, sa hi pānīyavahanādipratyavāyahētvabhāvācciraṁ tiṣṭhati; udapānaghaṭastu jalasambandhāt tathā vahanasamayē patanādinā ca śīghramutsīdati| hitōpacāramūlamiti hitōpacāramūlamapi| kramōpayōgaḥ samyagiti yōjanā| sarvātiyōgasandhāraṇaṁ sarvātiyōgānāṁ varjanam||36||

ataḥ paramagnivēśa uvāca- ēvaṁ satyaniyatakālapramāṇāyuṣāṁ bhagavan! kathaṁ kālamr̥tyurakālamr̥tyurvābhavatīti||37||

ēvaṁ satītyādi| yattāvat kālaniyataṁ tasyākālē maraṇābhāvādēva nākālamr̥tyurasti, yattvakālaniyataṁ tasyāpyaniyatatvāt kathaṁ kālamr̥tyurakālamr̥tyurvā bhavati? aniyatē hyāyuṣi kālaniyamō nāsti, niyatakālāccārvāgakālamr̥tyurucyata iti pr̥cchārthaḥ||37||

tamuvāca bhagavānātrēyaḥ- śrūyatāmagnivēśa! yathā yānasamāyuktō’kṣaḥ prakr̥tyaivākṣaguṇairupētaḥ sa ca sarvaguṇōpapannō vāhyamānō yathākālaṁ svapramāṇakṣayādēvāvasānaṁ gacchēt, tathā”yuḥ śarīrōpagataṁ balavatprakr̥tyā yathāvadupacaryamāṇaṁ svapramāṇakṣayādēvāvasānaṁ gacchati; sa mr̥tyuḥ kālē|
yathā ca sa ēvākṣō’tibhārādhiṣṭhitatvādviṣamapathādapathādakṣacakrabhaṅgādvāhyavāhakadōṣādaṇimōkṣādanupāṅgāt paryasanāccāntarā’vasānamāpadyatē, tathā”yurapyayathābalamārambhādayathāgnyabhyavaharaṇādviṣamābhyāvaharaṇādviṣamaśarīranyāsādatimaithunādasatsaṁśrayādudīrṇa- vēgavinigrahādvidhāryavēgāvidhāraṇādbhūtaviṣavāyvagnyupatāpādabhighātādāhārapratīkāravivarjanāccāntarā’vasānamāpadyatē, sa mr̥tyurakālē; tathā jvarādīnapyātaṅkānmithyōpacaritānakālamr̥tyūn paśyāma iti||38||

yathākālamiti yāvatā kālēna pratyavāyaśūnyasyākṣasya kṣayō bhavati tasminnēvētyarthaḥ| svapramāṇakṣayādēvēti yugānurūpavarṣaśatādipramāṇakṣayādityarthaḥ| apathāditi sarvathā amārgagamanāt| aṇimōkṣāditi kīlamōkṣāt| anupāṅgāditi snēhādānāt| paryasanāt parikṣēpāt| mithyōpacaritāniti asamyakcikitsatān| akālamr̥tyūniti akālamr̥tyukarān||38||

athāgnivēśaḥ papraccha- kinnu khalu bhagavan! jvaritēbhyaḥ pānīyamuṣṇaṁ prayacchanti bhiṣajō bhūyiṣṭhaṁ na tathā śītam, asti ca śītasādhyō’pi dhāturjvarakara iti||39||

samprati mithyōpacāraśrutyā uṣṇatōyaṁ jvarē’pyāgnēyē mithyōpacāraḥ syādityāśaṅkyāha- kinnvityādi| śītasādhyō’pidhātuḥ pittamuṣṇarūpamityarthaḥ| pānīyaṁ yasmāt sarvajvaritēbhyō dīyatē, tasmāt pānīyamēvātra pr̥cchati||39||

tamuvāca bhagavānātrēyaḥ- jvaritasya kāyasamutthānadēśakālānabhisamīkṣya pācanārthaṁ pānīyamuṣṇaṁ prayacchanti bhiṣajaḥ|
jvarō hyāmāśayasamutthaḥ, prāyō bhēṣajāni cāmāśayasamutthānāṁ vikārāṇāṁ pācanavamanāpatarpaṇasamarthāni [26] bhavanti; pācanārthaṁ ca pānīyamuṣṇaṁ, tasmādētajjvaritēbhyaḥ prayacchanti bhiṣajō bhūyiṣṭham|
taddhi tēṣāṁ pītaṁ vātamanulōmayati, agniṁ cōdaryamudīrayati, kṣipraṁ jarāṁ gacchati, ślēṣmāṇaṁ pariśōṣayati, svalpamapi ca pītaṁ tr̥ṣṇāpraśamanāyōpakalpatē; tathāyuktamapi caitannātyarthōtsannapittē jvarē sadāhabhramapralāpātisārē vā pradēyam, uṣṇēna hi dāhabhramapralāpātisārā bhūyō’bhivardhantē, śītēna cōpaśāmyantīti||40||

utsannapittē pravr̥ddhapittē||40||

bhavati cātra-
śītēnōṣṇakr̥tān rōgāñchamayanti bhiṣagvidaḥ|
yē tu śītakr̥tā rōgāstēṣāmuṣṇaṁ bhiṣagjitam||41||

na kēvalaṁ jvarē ēva śītōṣṇasamutthatvabhēdēna uṣṇaśītōpacāraḥ, kintu sarvatraiva vyādhāvēvamityāha- śītēnētyādi| bhiṣajaśca tē jñānavantaścēti bhiṣagvidaḥ||41||

ēvamitarēṣāmapi vyādhīnāṁ nidānaviparītaṁ bhēṣajaṁ bhavati; yathā- apatarpaṇanimittānāṁ vyādhīnāṁ nāntarēṇa pūraṇamasti śāntiḥ, tathā pūraṇanimittānāṁ vyādhīnāṁ nāntarēṇāpatarpaṇam||42||
apatarpaṇamapi ca trividhaṁ- laṅghanaṁ, laṅghanapācanaṁ, dōṣāvasēcanaṁ cēti||43||
tatra laṅghanamalpabaladōṣāṇāṁ [27] , laṅghanēna hyagnimārutavr̥ddhyā vātātapaparītamivālpamudakamalpō dōṣaḥ praśōṣamāpadyatē; laṅghanapācanē [28] tu madhyabaladōṣāṇāṁ, laṅghanapācanābhyāṁ hi sūryasantāpamārutābhyāṁ pāṁśubhasmāvakiraṇairiva cānatibahūdakaṁ madhyabalō dōṣaḥ praśōṣamāpadyatē; bahudōṣāṇāṁ punardōṣāvasēcanamēva kāryaṁ, na hyabhinnē kēdārasētau palvalāprasēkō’sti, tadvaddōṣāvasēcanam||44||

na kēvalaṁ śītōṣṇasamutthayōrēva paraṁ hētuviparyayēṇa cikitsā, kintvapatarpaṇādijē’pi hētuviparītēnētyāha- ēvamityādi| apatarpaṇasantarpaṇābhyāṁ ca sarvaṁ cikitsitaṁ gr̥hītaṁ, na hyapatarpaṇasantarpaṇābhyāṁ vinā’nyadvidhānāntaramasti cikitsāyāḥ; yēna sarva ēvōpakramāḥ santarpaṇāpatarpaṇabhēdā ēva| ata [29] ēva viśēṣajñānārthamapatarpaṇabhēdānāha- apatarpaṇamityādi| laṅghanapācanamitivacanēna yatra pācanaṁ kriyatē tatrāvaśyaṁ stōkamātrayā laṅghanamapikriyata iti darśayati, pācanakālē hi yadi br̥ṁhaṇaṁ kriyatē tadā br̥ṁhaṇēnāgnēḥ pratikūlēna pācanaṁ na syādityarthaḥ| avakiraṇairivētyatra ivaśabdō’natibahūdakamivētyēvaṁrūpō jñēyaḥ| anyadvēti laṅghanādi br̥ṁhaṇādi ca||42-44||

dōṣāvasēcanamanyadvā bhēṣajaṁ prāptakālamapyāturasya naivaṁvidhasya kuryāt|
tadyathā- anapavādapratīkārasyādhanasyāparicārakasya [30] vaidyamāninaścaṇḍasyāsūyakasya tīvrādharmārucēratikṣīṇabalamāṁsaśōṇitasyāsādhyarōgōpahatasya mumūrṣuliṅgānvitasya cēti|
ēvaṁvidhaṁ hyāturamupacaran bhiṣak pāpīyasā’yaśasā yōgamr̥cchatīti||45||

anapavādapratīkārō vācyapratīkāraḥ| adhanasyānupakaraṇatvēna na cikitsā pāryatē kartumityarthaḥ| vaidyamānī durabhimānādvaidyōpadēśaṁ na karōti| tīvrādharmarucēḥ pratikriyāyāmadharmō bhavati, na ca cikitsā sidhyatyadharmapratibandhāt| mumūrṣuliṅgānvitasyēti riṣṭayuktasya| pāpīyasēti pāpahētunā pāpajanakēnāyaśasā||45||

bhavati cātra-
tadātvē cānubandhē vā yasya syādaśubhaṁ phalam|
karmaṇastanna kartavyamētadbuddhimatāṁ matam||46||
(alpōdakadrumō yastu pravātaḥ pracurātapaḥ|
jñēyaḥ sa jāṅgalō dēśaḥ svalparōgatamō’pi ca||47||
pracurōdakavr̥kṣō yō nivātō durlabhātapaḥ|
anūpō bahudōṣaśca, samaḥ sādhāraṇō mataḥ)||48||

anubandhē vēti uttarakālam| kēcidalpōdakadrumō yastvityādigranthaṁ jāṅgalādidēśalakṣaṇamatra paṭhanti||46-48||

tatra ślōkāḥ-
pūrvarūpāṇi sāmānyā hētavaḥ sasvalakṣaṇāḥ|
dēśōddhvaṁsasya bhaiṣajyaṁ hētūnāṁ mūlamēva ca||49||
prāgvikārasamutpattirāyuṣaśca kṣayakramaḥ|
maraṇaṁ prati bhūtānāṁ kālākālaviniścayaḥ||50||
yathā cākālamaraṇaṁ yathāyuktaṁ ca bhēṣajam|
siddhiṁ yātyauṣadhaṁ yēṣāṁ na kuryādyēna hētunā||51||
tadātrēyō’gnivēśāya nikhilaṁ sarvamuktavān|
dēśōddhvaṁsanimittīyē vimānē munisattamaḥ||52||

saṅgrahē pūrvarūpāṇīti nakṣatrādivikārāḥ| sasvalakṣaṇāḥ sasvavikr̥tilakṣaṇāḥ, tacca lakṣaṇaṁ tatra vātamēvaṁvidhamityādinā prōktam| yathāyuktaṁ ca bhēṣajaṁ siddhiṁ yātīti anēnōṣṇapānīyadānōpapattyā sarvaṁ saṅgr̥hītam||49-52||

ityagnivēśakr̥tē tantrē carakapratisaṁskr̥tē vimānasthānē janapadōddhvaṁsanīyavimānaṁ nāma tr̥tīyō’dhyāyaḥ||3||

iti śrīcakrapāṇidattaviracitāyāṁ carakatātparyaṭīkāyāmāyurvēdadīpikāyāṁ vimānasthānē janapadōddhvaṁsanīyavimānaṁ nāma tr̥tīyō’dhyāyaḥ||3||

1. ‘ca prakr̥tibhūtānāṁ’ iti pā.|
2. ‘lakṣaṇatvādīnāṁ iti pā.|
3. ‘samyagvicāracāritāni’ ca iti pā.|
4. ‘upakṣīṇajalāśayaṁ’ iti pā.|
5. ‘sasvanakṣubhitōdīrṇasalilāśayaṁ’ iti pā.|
6. ‘… pratibhayāvārarūpaṁ’ iti gaṅgādharasammataḥ pāṭhaḥ|
7. ‘vidyādaparihāryatvādgarīyaḥ paramarthavit’ iti pā.|
8. ‘yēṣāṁ na mr̥tyujanakāriṣṭarūpaṁ sāmānyamastītyarthaḥ’ iti pā.|
9. ‘cāsatkarma’ iti pā.|
10. nagaranigamajanapadapradhānā nagarādīnāmadhyakṣāḥ|
11. ‘sparśābhyavahāryadōṣāt’ iti pā.|
12. prāgēvētyādi pāṭhō yōgīndranāthasēnēna na paṭhyatē|
13. ‘udārasattvaguṇaiḥ karmaṇāṁ dharmāṇāṁ cācintyatvādrasa …’ iti pā.|
14. ‘hīyamānāni hīyamānaguṇapādairhīyamānaguṇaiścāhāravihārairayathāpūrvamupaṣṭabhyamānāgnimārutaparītāni’ iti pā.|
15. “āhārācāraprāyaścittādipuruṣakārastvaihikaphalaṁ dr̥ṣṭam, adr̥ṣṭaṁ ca prāyō janmāntarakr̥taṁ śubhāśubhaṁ śarīrādinirvartakaṁ, tadētaddvitayamapi kāraṇaṁ dr̥ṣṭasāmarthyāt| tatra yadā dr̥ṣṭamāhārādi śubhamupacitam, adr̥ṣṭaṁ ca dharmarūpaṁ śubhamupacitaṁ bhavati, tadā yuganiyatavarṣaśatarūpasyāyuṣaḥ sukhayuktasya ca niṣpattiḥ| yadā tu daivapuruṣakārayōḥ śubhamadhyamayōranyōnyasyānuguṇayōryōgaḥ, tadā madhyaṁ madhyamasukhaṁ yuganiyatādalpaṁ bhavati| yadā tu hīnayōryōgaḥ, tadā hi hīnamasukhāyurbhavati| ēvaṁ yadā daivamaśubhaṁ, puruṣakāraścāśubhaḥ, tadā’tyalpaṁ duḥkhabahulaṁ cāyurbhavati| ēvamaśubhadaivapuruṣakārayōrmadhyamatāyāṁ hīnatāyāṁ vā udāharaṇamūhyam| ēvaṁ yadā daivaṁ śubhamuttamaṁ, puruṣakārastu madhyō hīnō vā, tadā’pi phalaviśēṣa ūhyaḥ| atrārthē carakaḥ-“ihāgnivēśa ! bhūtānāmāyuryuktimapēkṣatē| daivē puruṣakārē ca sthitaṁ hyasya balābalam| daivamātmakr̥taṁ vidyāt karma yat paurvadaihikam| smr̥taḥ puruṣakārastu kriyatē yadihāparam| balābalaviśēṣō’sti tayōrapi ca karmaṇōḥ| dr̥ṣṭaṁ hi trividhaṁ karma hīnaṁ madhyamamuttamam| tayōrudārayōryuktirdīrghasya ca sukhasya ca| niyatasyāyuṣō hēturviparītasya cētarā| madhyamā madhyamasyōktā viśēṣaṁ śr̥ṇu cāparam” (ca.vi.a.3) iti| atra paurvadaihikamiti prāyēṇa janmāntarakr̥tasyaivēha janmani pākāduktamētat, janmāntarakr̥taṁ tu yāgabrahmavadhādi prāyō janmāntara ēva phalati| niyatasyēti yuganiyatasya” iti su.ṭī.bhā. (sū.a.17) cakraḥ|
16. “yadā tu daivapuruṣakārayōrvirōdhaḥ, tadā durbalaṁ daivaṁ puruṣakārēṇa balavatā hanyatē, balavatā daivēna durbalaḥ puruṣakārō hanyatē| ata ēva ca daivēna puruṣakāraṁ parābhūtaṁ dr̥ṣṭvā kēcit karmavādinō daivaniyatamēvāyurādikaṁ vadanti, vyarthaṁ ca puruṣakāraṁ daivayuktivyapāśrayāhārācārarūpaṁ vadanti|” iti su.ṭī.bhā.(sū.a.1) cakraḥ|
17. “balavatōstu daivapuruṣakārayōrvirōdhinōryugapadupasthāpanaṁ nāstyēva, virōdhināṁ sukhaduḥkhādīnāṁ yaugapadyēnānupalambhādēva| balavattā tu daivākhyakarmaṇō dharmādharmarūpasya kālavipākaniyamād bhavati| viparyayē tu abalavattvaṁ puruṣakārabādhanīyatvaṁ ca bhavati| yadāha carakaḥ- “karma kiñcit kvacit kālē vipākaniyataṁ mahat| kiñcittvakālaniyataṁ pratyayaiḥ pratibōdhyatē” (ca.vi.a.3) iti| atra trividhō niyamaḥ ēkavidhaścāniyamaḥ, ēvaṁ pakṣacatuṣṭayamapi bhavati| yathā-“idaṁ karma yadi pacyēta tadā asminnēva kālē pacyēta, nānyatrēti kālaniyamaḥ| tathā-idaṁ karma yatra kvacit kālē pacyētaiva, na pacyētēti na, iti vipākaniyamaḥ| ētau pakṣau puruṣakārabādhyatayā śāstraviṣayau, pākṣikasya niyamasyāsattvāt| tathā-idaṁ karmāsminnēva kālē pacyētaivēti kālavipākaniyamaḥ| ayamaviṣayaḥ śāstrasya, puruṣakārānapēkṣatvāt| tathā-idaṁ karma kutracit kālē pratyayaṁ dr̥ṣṭamāsādya pacyēta, yadi vā na pacyēta, tadapi ca prāyaścittādiparābhūtatvādēvēti kālavipākāniyamaḥ sarvathā śāstraviṣayaḥ| atra pakṣacatuṣṭayē kēcid vadanti-“kiñcinna kālaniyataṁ” (ca.vi.a.3) iti vadatā carakēṇa kālāniyamō darśitaḥ, vipākāniyamastu na darśitaḥ| karmaṇāṁ vipākāniyamō nāsti| yaducyatē-“nābhuktaṁ kṣīyatē karma kalpakōṭiśatairapi| avaśyamēva bhōktavyaṁ kr̥taṁ karma śubhāśubham” iti| kintu prāyaścittānāmapi adattaphalakarmakṣayōpadēśāt, tathā “jñānāgniḥ sarvakarmāṇi bhasmasāt kurutē’rjuna” (bha.gī.a.4) iti jñānāgninā ca karmakṣayōpadēśād vipākāniyamapakṣō’pi sambhavatyēva| tathā ca-“na hi karma mahat kiñcit phalaṁ yasya na bhujyatē (śā.a.1)” iti vadatā carakēṇāpi mahataḥ karmaṇaḥ prāyaścittābādhanīyasya vipākaniyamō’pi darśitō bhavati| alamatisūkṣmagatikarmavicārēṇa| śāstrasyārōgyasādhanāhārācārarūpapuruṣakārōpadēśakatvēna prayōjanavattvamastyēva” iti su.ṭī.bhā. (sū.a.1) cakraḥ|
18. ‘bhēṣajēnōpacarētām’ iti pā.|
19. sarvacakṣuṣāṁ sarvapramāṇānāmityarthaḥ, ētatparamabhrāntatvēna śrēṣṭhaṁ, yadaindraṁ cakṣuḥ pratyakṣapramāṇamityarthaḥ| ‘yaddivyaṁ’ iti pā.|
20. ‘āhāraṁ’ iti pā.|
21. ‘kriyōpayōgaḥ’ iti pā.|
22. sarvasyēti kālasya karmaṇa indriyārthasya ca|
23. ‘sandhāraṇamanudīrṇānāṁ’ iti pā.|
24. ‘ataḥ paramuktamupasaṁharati’ iti pā.|
25. ‘bhēṣajaṁ tāvadāhārācārarūpaṁ yasya dōṣasya vikārasya vā viparītaṁ, tadasati virōdhakē taṁ śamayatīti dr̥ṣṭaṁ, yathā-kaṭukēna ślēṣmakṣayaḥ, agninā śītapraśamanam, āhārēṇa kṣudupaśamaḥ, pānīyapānēna pipāsāpagamaḥ| ēvamādi sāmānyēna vr̥ddhiḥ, viparītēna ca hrāsa iti dr̥śyatē| na cātrāpi dr̥ṣṭēnaivōpapadyamānē’dr̥ṣṭamēva kāraṇamiti kalpanā yuktā| yatō dr̥ṣṭēnānupapadyamānē kāryē kāraṇamadr̥ṣṭaṁ kalpyatē, dr̥ṣṭaparābhavēna tu sarvatrādr̥ṣṭakalpanaṁ prāmāṇikamēva| yatō yadēvādr̥ṣṭaṁ kāraṇatvēnābhimataṁ taddr̥ṣṭayāgādijanyaṁ, tadvadēva bhēṣajaṁ dr̥ṣṭarūpaṁ tāvatkvacidastyēvaṁ svīkartavyam’ iti suśrutaṭīkāyāṁ bhānumatyāṁ(su.a.1) cakraḥ|
26. ‘virēcanavamanāpatarpaṇasaṁśamanānyēva’ iti pā.|
27. ‘alpadōṣāṇām’ iti pā.|
28. ‘laṅghanapācanaṁ’ iti pā.|
29. ‘ata ēva’ iti hastalikhitapustakē na paṭhyatē|
30. ‘alpavādapratīkārasya’ iti pā.|