athātaḥ śōṇitavarṇanīyamadhyāyaṁ vyākhyāsyāmaḥ ||1||
yathōvāca bhagavān dhanvantariḥ ||2||

athāta ityādi||1-2||

tatra [1] pāñcabhautikasya caturvidhasya ṣaḍrasasya [2] dvividhavīryasyāṣṭavidhavīryasya vā’nēkaguṇasyōpayuktasyāhārasya samyakpariṇatasya yastējōbhūtaḥ sāraḥ paramasūkṣmaḥ sa `rasaḥ’ ityucyatē, tasya hr̥dayaṁ sthānaṁ, sa hr̥dayāccaturviṁśatidhamanīranupraviśyōrdhvagādaśa daśādhōgāminyaścatasraśca tiryaggāḥ kr̥tsnaṁ śarīramaharahastarpayati vardhayati dhārayati [3] yāpayati cādr̥ṣṭahētukēna karmaṇā |
tasya śarīramanusaratō’numānādgatirupalakṣayitavyā kṣayavr̥ddhivaikr̥taiḥ |
tasmin sarvaśarīrāvayavadōṣadhātumalāśayānusāriṇi rasē jijñāsā- kimayaṁ saumyastaijasa? iti |
atrōcyatē- sa khalu dravānusārī snēhanajīvanatarpaṇadhāraṇādibhirviśēṣaiḥ saumya ityavagamyatē ||3||

śōṇitōtpattē rasādhīnatvādrasamēva darśayannāha- tatrētyādi| itthambhūtasyāhārasya yaḥ sāraḥ sa `rasa’ ityucyata iti piṇḍārthaḥ| pāñcabhautikasyēti pr̥thivyādibhūtadravyabhēdēna, caturvidhasyēti pēyalēhyabhōjyabhakṣyabhēdēna, ṣaḍrasasyēti madhurādirasabhēdēna, dvividhavīryasyēti śītōṣṇavīryabhēdēna, pakṣāntaramāha- aṣṭavidhavīryasya vēti śītōṣṇasnigdharūkṣaviśadapicchilamr̥dutīkṣṇabhēdēna, anēkaguṇasyēti śītādidravādiguṇabhēdēna viṁśatiguṇasya, upayuktasyēti samyakpariṇatasyētyanēnaivōpayuktapadārthasya labdhatvādyadupayuktagrahaṇaṁ karōti tat samyagyōgaṁ svāsthyavr̥ttīyadvādaśavidhāśanapravicāramapēkṣyōpayōgaṁ prāpayati| tējōbhūta iti tējasā bhūtastējōbhūtō vahnisambhūta ityarthaḥ; anyē tu tējaḥśabdēna ghr̥tamāhuḥ, tatra tējōbhūtō ghr̥tavadutpanna ityarthaḥ; anyē tu vadanti- bhūtaśabdō’trōpamānārthaḥ, tatra tējōbhūtō ghr̥tākāra ityarthaḥ| sāra iti viḍādimalarahita ityarthaḥ| paramasūkṣma iti atiśayēnāsthūlāvayavaḥ, sūkṣmasrōtō’nusārītyarthaḥ| rasasya sthānamāha- tasyētyādi| tasya rasasya sarvadēhānusāritvē’pi hr̥dayaṁ sthānaṁ [4] ; hr̥dayaśabdēnātra hr̥dayōpalakṣitaḥ pradēśa ucyatē, na tu sākṣāddhr̥dayaṁ; kutaḥ? hr̥dayasyaujaḥsthānatvāt| rasasya kriyāṁ nirdiśannāha- sa hr̥dayādityādi| tarpayatīti bālamadhyasthavirān sarvānēva prīṇayati; anyē garbhaṁ tarpayatīti manyantē, tasyāhārāsambhavāt; vardhayatīti bālaṁ; dhārayatīti madhyaṁ sampūrṇadhātutvāt, kēcit `dhārayati’ ityatra `jīvayati’ iti paṭhanti, atrāpi sa ēvārthaḥ; yāpayatīti vr̥ddhaṁ kṣīyamāṇadēhatvāt| kēcidatra `hr̥dayāt’ ityādi pāṭhaṁ `catasraśca tiryaggāḥ’ ityantaṁ na paṭhanti, `kr̥tsnaṁ śarīraṁ’ ityādi ca paṭhanti| kutaḥ punarayaṁ tarpaṇādi karōtītyāha- adr̥ṣṭahētukēna karmaṇā; prāktanakarmaṇētyarthaḥ| anyē tu kēṣāñcidēva martumicchūnāṁ kutō na tarpaṇādi karōtīti pr̥ṣṭa āha- adr̥ṣṭahētukēna karmaṇēti| tasya śarīramityādi tasyēti rasasya| anusarataḥ anugacchataḥ| kṣayavr̥ddhivaikr̥tairiti vaikr̥taṁ vikāraḥ; kṣayavikāraiḥ `rasakṣayē hr̥tpīḍā kampa’ ityādibhiḥ, vr̥ddhivikāraiḥ `hr̥dayōtklēdaṁ’ ityādibhiḥ| tatra kṣayavr̥ddhivikārairvikr̥tasya; kṣayavr̥ddhivaikr̥taiścētyatra cakārō draṣṭavyaḥ, tēna sarvaśarīratarpaṇādibhiścāvikr̥tasya gatiranumantavyētyarthaḥ| rasasvabhāvaṁ vinirdēṣṭumāha- tasminnityādi| tasminniti pūrvōktē rasē| jijñāsā jñātumicchā| kimayaṁ saumyaḥ kaphavat, athavā taijasaḥ pittavat? iti saṁśayaḥ| atrōcyata ityādi| anusārī anusaraṇaśīlaḥ, snēhanaḥ snēhayatīti, jīvanō jīvayatīti, tarpaṇaḥ prīṇanaḥ śarīrasya, ādiśabdādavaṣṭambhanādayaḥ| viśēṣaiḥ bhēdaiḥ| avagamyatē avabudhyatē||3||

sa khalvāpyō rasō yakr̥tplīhānau prāpya rāgamupaiti ||4||

idānīṁ kramaniṣpattyā śōṇitaṁ darśayannāha- sa khalvityādi| khaluśabdō’pyarthaḥ| āpyō’pi rasō rāgamupaiti lōhitatvaṁ gacchati||4||

ślōkau cātra bhavataḥ-
rañjitāstējasā tvāpaḥ śarīrasthēna dēhinām |
avyāpannāḥ prasannēna raktamityabhidhīyatē ||5||

tamēvārthaṁ ślōkēna spaṣṭīkurvannāha- bhavataścātrētyādi| śarīrasthēna yakr̥tlīhasthēnaiva, prasannēna prakr̥tisthēna, irtthabhūtēna tējasā rañjakanāmnā, avyāpannā ēvaṅguṇaviśiṣṭā āpō rañjitā lōhitīkr̥tāḥ satyō raktamityucyatē| āpō’tra rasaḥ||5||

rasādēva striyā raktaṁ rajaḥsañjñaṁ pravartatē |
tadvarṣāddvādaśādūrdhvaṁ yāti pañcāśataḥ kṣayam ||6||

raktārtavayōrabhēdaṁ darśayannāha- rasādēvētyādi| rajaḥsañjñamiti sañjñāntaramētat strīyōnipravr̥ttasya raktasya, r̥tukālajaṁ raktamēva rajaḥsañjñamucyata ityarthaḥ| tadvarṣāddvādaśādūrdhvamiti tadrajaḥsañjñaṁ śōṇitaṁ dvādaśavarṣādanantaraṁ pravartata iti sambandhaḥ| tasya nivr̥tti kālamāha- yāti pañcāśataḥ kṣayamiti| `rasādēva rajaḥ strīṇāṁ māsi māsi tryahaṁ sravēt| tadvarṣāddvādaśādūrdhvaṁ yāvat pañcāśataṁ samāḥ’- ityanyē paṭhanti| samāḥ varṣāṇi||6||

ārtavaṁ śōṇitaṁ tvāgnēyam, agnīṣōmīyatvādgarbhasya ||7||

raktārtavayōḥ saumyarasasambhūtayōrapi svabhāvabhēdaṁ darśayannāha- ārtavamityādi| tuśabdō’tra bhēdē, tēna rasāt saumyājjātamapyārtavaṁ śōṇitaṁ cāgnēyam| kutaḥ kāraṇādityāha- agnīṣōmīyatvādgarbhasyēti|- ārtavamāgnēyaṁ, śukraṁ saumyaṁ, tābhyāmagnīṣōmīyō garbhō bhavati| nanu yadyārtavamapi saumyaṁ bhavati, tadā saumyārabdhaḥ saumya ēva garbhō bhavati; na caivam, agnīṣōmīyatvādgarbhasyētyatrārtavasyāgnēyatvamucyatē, ārtavaśōṇitayōḥ svabhāvābhēdādārtavasyāgnēyatvē uktē śōṇitasyāpyāgnēyatvamuktamēvēti| `ārtavaśōṇitaṁ tvāgnēyam’- ityanyē paṭhanti; `ārtavaṁ ca tacchōṇitaṁ cētyārtavaśōṇitaṁ; tuśabdō’trāvadhāraṇē, tēnārtavasyāgnēyatvamavadhārayati’ iti vyākhyānayanti| raktaṁ punaranuṣṇaśītamēvamācāryā manyantē||7||

pāñcabhautikaṁ tvaparē jīvaraktamāhurācāryāḥ ||8||

śōṇitasvabhāvē matāntaramāha- pāñcabhautikamityādi| jīvaraktamiti jīvatulyaṁ raktam| kutaḥ? jīvaccharīrē raktadarśanāt, mr̥taśarīrē cādarśanāt; natu jīvaraktamōja iti, ēvaṁ prastutasyaiva raktasya lakṣaṇamanuktaṁ syāt||8||

visratā dravatā rāgaḥ spandanaṁ laghutā [5] tathā |
bhūmyādīnāṁ [6] guṇā hyētē dr̥śyantē cātra śōṇitē ||9||

tadēva pāñcabhautikatvaṁ sukhabōdhārthaṁ spaṣṭayitumāha- visratētyādi| visratā āmagandhatā, bhūmiguṇaḥ; dravatā dravabhāvaḥ, ayamambuguṇaḥ; rāgō raktatā, tējōguṇaḥ; spandanaṁ kiñciccalanaṁ, vātaguṇaḥ; laghutā agurutvam, ākāśaguṇaḥ| bhūmyādīnāmityatrādiśabdēnāptējōvāyvākāśā gr̥hyantē| hi yasmādarthē, yasmādētē visratādayaḥ pr̥thivyādīnāṁ guṇā atra śōṇitē dr̥śyantē, tasmādraktaṁ pāñcabhautikamiti||9||

rasādraktaṁ [7] tatō māṁsaṁ māṁsānmēdaḥ prajāyatē |
mēdasō’sthi tatō majjā majjñaḥ śukraṁ tu jāyatē ||10||

śōṇitaprasaṅgēnānyēṣāmapi dhātūnāṁ kramēṇōtpattiṁ darśayannāha- rasādraktamityādi| sa khalvāpyō rasō yakr̥tplīhānau prāpya rāgamupaitītyanēnaiva rasādēva raktasya bhavanē uktē rasāt punaḥ śōṇitasambhavanavacanaṁ niyamārtham| tēna rasāt kramōtpattyā śōṇitamēva bhavati na parē dhātava iti| ētēna yugapadēva sarvadhātuṣu rasasañcārādrasēnaiva sarvadhātupōṣaṇamiti tantrāntarīyaṁ vacō nirastam| nanu, yadi pariṇamanti rasādayō raktādibhāvēna, tarhi sarvēṣāmutsādaḥ syāt? santatyā pariṇāma iti cēttarhi sarvēṣāṁ pūrvēṣāmalpatā syāduttarēṣāṁ bāhulyamiti? naitadasti| tēṣāṁ [8] rasādīnāṁ malasthūlāṇubhāgaviśēṣēṇa trividhaḥ pariṇāmō bhavati; tadyathā- annāt pacyamānādviṇmūtraṁ malaḥ, sārō rasaḥ; rasādagnipakvānmalaḥ kaphaḥ, sthūlō bhāgō rasaḥ, aṇubhāgō raktaṁ; raktādagnipakvānmalaḥ pittaṁ, sthūlabhāgaḥ śōṇitam, aṇubhāgastu māṁsamiti; tatō’pyātmapāvakapacyamānānmalaḥ [9] śrōtranāsākarṇākṣiprajananādisrōtōmalaḥ, sthūlabhāgō māṁsaṁ, sūkṣmō mēdaḥ; tatō’pi nijavahnipacyamānānmalaḥ svēdaḥ, sthūlōṁ’śō mēda ēva, sūkṣmabhāgō’sthi; tatō’pi pacyamānānmalaḥ kēśalōmaśmaśrūṇi, sthūlō’sthi, sūkṣmastu majjā; tatō’pi majjñaḥ pāvakapacyamānānmalō nayanapurīṣatvacāṁ snēhaḥ, sthūlō bhāgō majjā, sūkṣmaḥ śukraṁ; tataḥ punaḥ pacyamānādupamalō nōtpadyatē sahasradhādhmātasuvarṇavat, sthūlō bhāgaḥ śukramēva, snēhabhāgaḥ sūkṣmastējōbhūtamōjaḥ| pūrvōkta ēvārthaḥ ślōkābhyāṁ kathyatē- “sthūlāṇvaṁśamalaiḥ sarvē bhidyantē dhātavastridhā| svaḥ sthūlōṁ’śaḥ paraṁ sūkṣmastanmalaṁ yāti tanmalaḥ|| svāgnibhiḥ pacyamānēṣu malaḥ ṣaṭsu rasādiṣu| na śukrē pacyamānē’pi hēmanīvākṣayē malaḥ [10] – iti| ākr̥ṣṭāṇḍakōṣasya puṁsaḥ śmaśrupātācchmaśru śukramala ityēkē| tanna, śmaśruhīnasyāpi śukradarśanāt| nanu, māṁsānmēdaḥ prajāyata ityanarthakaṁ, ‘majjñaḥ śukraṁ tu jāyatē’ ityēkēnaiva kriyāpadēna prajāyata ityasyārthasya labdhatvāt| satyaṁ, prajāyata iti kriyāpadaṁ rasādīnāṁ mēdaḥparyantānāṁ viśiṣṭakāryāntarōtpādadarśanārtham, ēbhya ēvōpadhātavaḥ svabhāvādutpadyantē na punarasthyādibhya iti| tathāhi [11] – rasāt stanyamārtavaṁ ca, raktāt kaṇḍarāḥ sirāśca, māṁsādvasātvacau, mēdasaḥ snāyusandhī iti| śukraṁ tu jāyata iti dvitīyajāyatēgrahaṇēna śukrē viśiṣṭadharmavattā uktā; śukraṁ hi svāgnipacyamānamapi nāṇubhāgamutpādayati| anyē tu ‘mēdaḥ prajāyatē’ ityatra `pravartatē’ iti paṭhanti, `śukraṁ tu jāyatē’ ityatra `śukrasya sambhava’ iti paṭhanti, vyākhyānayanti ca- sambhavāśabdō’tra pōṣaṇē na tvapūrvōtpādanē, yatō rasādīnāṁ śukrāntānāmāgarbhādēvōtpattiriti||10||

tatraitēṣāṁ dhātūnāmannapānarasaḥ [12] prīṇayitā ||11||
rasajaṁ puruṣaṁ vidyādrasaṁ rakṣēt prayatnataḥ |
annātpānāñca matimānācārāñcāpyatandritaḥ ||12||

rasasya nirdiṣṭasya prādhānyaṁ darśayitumāha- tatraiṣāmityādi| tatra tēṣu dhātuṣu madhyē| ētēṣāṁ dhātūnāṁ prāguktānāṁ raktādīnām| annapānarasaḥ annapānasya sāraḥ| prīṇayitā tarpayitētyarthaḥ| atandritō’nalasa ityarthaḥ||11-12||

tatra ‘rasa’ gatau dhātuḥ, aharahargacchatītyatō rasaḥ ||13||

rasasyaiva niruktimāha- tatra rasagatāvityādi||13||

sa khalu trīṇi trīṇi kalāsahasrāṇi pañcadaśa ca kalā ēkaikasmin dhātāvavatiṣṭhatē; ēvaṁ māsēna rasaḥ śukraṁ [13] strīṇāṁ cārtavaṁ bhavati ||14||
bhavati cātra-
aṣṭādaśasahasrāṇi saṅkhyā hyasmin samuccayē |
kalānāṁ navatiḥ prōktā svatantraparatantrayōḥ ||15||

rasadhāturdhātvantarāṇāṁ svabhāvaṁ janayannēkaikasmin dhātau kiyantaṁ kālamavatiṣṭhata ityāha- sa khalvityādi| avatiṣṭhatē avasthitiṁ karōtītyarthaḥ, pariṇāmaṁ gacchannēva tiṣṭhati pacyamānasthālītaṇḍulavat, na punarasya gamananivr̥ttiḥ| trīṇi trīṇi kalāsahasrāṇi pañcadaśa ca kalā ityasyārthaḥ- rasaḥ kilaikāhēnaiva sampadyatē, tadanantaraṁ yē ṣaṭdhātavastē pratyēkaṁ pañcabhiḥ pañcabhirahōbhiḥ sampadyantē| yāvatā kālēna rasaḥ śukratāṁ yāti tāvantaṁ vaktumāha- ēvaṁ māsēnētyādi| atrārtavaśabdō’yaṁ śukrē vartatē na tu rajasi, rajō hi rasādraktavat saptamē’hani jāyatē; athavā yadyayamārtavaśabdaḥ śukrē na vartatē tadā’tra śukrōtpattyadhikārē strīṇāṁ śukrasyānuktatvāt ṣaḍdhātutvaṁ syāt, tasmādārtavaśabdaḥ śukrē vartatē; anyē tu punaratrārtavaśabdaṁ rajasyēva vartayanti, cakārēṇa strīśukraṁ samuccinvanti śukrē’pi garbhajananaśaktidyōtanārtham| tathā cōktaṁ- `yadā nāryāvupēyātāṁ vr̥ṣasyantyau kathañcana| muñcataḥ śukramanyō’nyamanasthistatra jāyatē’ (śā. a. 2)- iti| asmin pakṣē māsēnārtavasya bhavanamupacayō’bhiprētaḥ prakāśaśca; yasmādārtavasya raktavat saptāhēnaivōtpattiriti| idānīṁ samudāyasaṅkhyāmāha- aṣṭādaśētyādi| aṣṭādaśasahasrāṇītyādinā triṁśaddināni kathitāni| svatantraparatantrayōriti samānatantrāsamānatantrayōrityarthaḥ||14-15||

sa śabdārcirjalasantānavadaṇunā viśēṣēṇānudhāvatyēvaṁ śarīraṁ kēvalam ||16||

dr̥ṣṭāntatrayēṇa śarīrē rasagatiṁ tridhā darśayannāha- sa śabdārcirjalasantānavadityādi| saḥrasaḥ, santānaśabdaḥ śabdādibhiḥ saha pratyēkaṁ sambadhyatē| aṇunā viśēṣēṇa sūkṣmaprakārēṇa| anudhāvati sañcarati| ēvaṁśabdō niyamārthaḥ| śarīraṁ kēvalaṁ sakalanityarthaḥ| tatra śabdasantānavadityanēna tiryaggāmitvaṁ rasasyōktam, arciḥsantānavadityanēnōrdhvagāmitvaṁ, jalasantānavadityanēnādhōgāmitvamiti| kēcidanyathā vyākhyānayanti- `śabdādidr̥ṣṭāntatrayēṇa tīkṣṇamadhyamandāgnayō nirdiṣṭāḥ| śabdasantānavattīkṣṇāgnīnāṁ rasaḥ sañcarati, arciḥsantānavanmadhyāgnīnāṁ, jalasantānavanmandāgnīnām’ iti| tēna tīkṣṇāgnīnāmaṣṭāhēnaiva rasaḥ śukrībhavati, mandāgnērmāsēnaiva [14] | ayamarthō gayadāsācāryēṇa bahudhā dūṣitaḥ| dīptāgnēstu kiñcinyūnēna māsēna śukraṁ bhavati, mandāgnēstu kiñcidadhikēna māsēnētyayamarthō nyāyya iti||16||

vājīkaraṇyastvōṣadhayaḥ [15] svabalaguṇōtkarṣādvirēcanavadupayuktāḥ śukraṁ śīghraṁ virēcayanti ||17||

yadi māsēna rasaḥ śukrībhavati tarhi vājīkarīṇāṁ mahauṣadhīnāṁ prayōgō niṣphalaḥ syādityāha- vājīkaraṇya ityādi| vājīkaraṇyastvōṣadhaya iti yābhirōṣadhibhiḥ strīṣu narō vājīva samarthō bhavati [16] tā vājīkaraṇyaḥ| svabalaguṇōtkarṣāditi [17] svaśabdō balaguṇābhyāṁ saha pratyēkaṁ saṁvadhyatē, utkarṣaśabdō’pi| atra kāścidōṣadhayaḥ svabalōtkarṣāt, kāścit svaguṇōtkarṣāt, kāścit svabalaguṇōtkarṣāt, tatra saṅkalpapādalēpaviśiṣṭakāntāsparśādayaḥ svabalōtkarṣāt, svaprabhāvōtkarṣādityarthaḥ; ghr̥takṣīrādayaḥ svaguṇōtkarṣāt, svasnēhādyutkarṣādityarthaḥ; māṣādayaḥ svabalaguṇōtkarṣāt, svaprabhāvasnēhādyutkarṣādityarthaḥ; utkarṣa ādhikyam| vājīkaraṇya iti bahuvacanamādyarthē, tēna balyabr̥ṁhaṇīyajīvanasaṅgrahaṇādayō’pi tadvadvācyā iti||17||

yathāhi puṣpamukulasthō gandhō na śakyamihāstīti vaktuṁ, naiva nāstīti; atha [18] cāsti, satāṁ bhāvānāmabhivyaktiriti jñātvā [19] , kēvalaṁ saukṣmyānnābhivyajyatē; sa ēva vivr̥tapatrakēśarē puṣpē kālāntarēṇābhivyaktiṁ gacchati; ēvaṁ bālānāmapi vayaḥpariṇāmācchukraprādurbhāvō bhavati, rōmarājyādayaśca viśēṣā nārīṇām ||18||

nanu, yadi māsēna rasaḥ śukrībhavati tarhi bālānāmaśnatāmapi tat kathaṁ na dr̥śyata iti dr̥ṣṭāntamāha- yathētyādi| yathāhītyavyayaṁ [20] yathādr̥ṣṭāntatāpratipādanārtham| puṣpamukulastha iti kusumakalikāmadhyasthaḥ| ihēti puṣpamukulē, gandhō’styēvēti [21] nāstyēvēti ca vaktuṁ na śakyam| pāramārthikaṁ rūpamāha- atha cāstīti|- athaśabdaḥ sambōdhanē [22] ; caśabda ēvārthē, astyēvētyarthaḥ| yuktimāha- satāṁ bhāvānāmabhivyaktiriti jñātvēti; pūrvaṁ santa ēva bhāvāḥ paścāddhētumāsādyābhivyajyantē, yathā- tilēṣu tailamityādi| yadyastyēviti tarhi mukulāvasthāyāmēva kathaṁ nābhivyajyata ityāha- kēvalaṁ saukṣmyānnābhivyajyata iti| sa ēvētyādi| sa ēva gandhō vivr̥tapatrakēśarē kusumē kālāntarēṇōpacitō’bhivyaktiṁ gacchati| ēvaṁ bālānāmityādi itthaṁ bālānāmapi vayaḥpariṇāmācchukraprādurbhāvō vyaktībhāvō bhavati| rōmarājyādayaśca viśēṣā bhāvā vayaḥpariṇāmānnārīṇāmapi prādurbhavanti, ādiśabdāt stanyārtavādayaḥ; rōmarājyādayaścēti cakārō nārīṇāṁ cētyatra draṣṭavyaḥ; tēna puruṣāṇāmapi śmaśruprabhr̥tayō gr̥hyantē| atra kēcit `rajasi cōpacīyamānē śanaiḥ śanaiḥ stanagarbhāśayayōnyabhivr̥ddhirbhavati’- iti paṭhanti, na tu nibandhakārāḥ, kutaḥ? ādiśabdāttadarthasya labdhatvāditi||18||

sa ēvānnarasō vr̥ddhānāṁ (jarā) paripakvaśarīratvādaprīṇanō bhavati ||19||

nanu rasasyōpacayakaratvādvr̥ddhēnāpi vardhitavyamityāha- sa ēvānnarasa ityādi| sa ēvānnarasa iti aśēṣadhātupōṣakō’pi vr̥ddhānāmaprīṇana īṣatprīṇanō bhavati, jīvanamātraṁ karōtītyarthaḥ| kuta ityāha- paripakvaśarīratvāt||19||

ta ētē śarīradhāraṇāddhātava [23] ityucyantē ||20||

rasādidhātūnāṁ niruktiṁ kurvannāha- ta ētē śarīradhāraṇādityādi| yadyapi kvacidaduṣṭā dōṣā api dēhadhāraṇāddhātuśabdēnōcyantē, tathā’pyatra rasādīnāmadhikr̥tatvāt ēva dhātavaḥ kathyantē||20||

tēṣāṁ kṣayavr̥ddhī śōṇitanimittē, tasmāttadadhikr̥tya vakṣyāmaḥ |
tatra, phēnilamaruṇaṁ kr̥ṣṇaṁ paruṣaṁ tanu śīghragamaskandi ca vātēna duṣṭaṁ; nīlaṁ pītaṁ haritaṁ śyāvaṁ visramaniṣṭaṁ pipīlikāmakṣikāṇāmaskandi ca pittēna duṣṭaṁ; gairikōdakapratīkāśaṁ [24] snigdhaṁ śītalaṁ bahalaṁ picchilaṁ cirasrāvi māṁsapēśīprabhaṁ ca ślēṣmaduṣṭaṁ; sarvalakṣaṇasaṁyuktaṁ kāñjikābhaṁ viśēṣatō durgandhi ca sannipātaduṣṭaṁ; dvidōṣaliṅgaṁ saṁsr̥ṣṭam ||21||

prastutaṁ śōṇitamēvādhikartumāha- tēṣāmityādi| tēṣāmiti dhātūnām| tadadhikr̥tyēti śōṇitamadhikr̥taṁ kr̥tvētyarthaḥ| tatra phēnilamityādi| phēnilaṁ phēnasahitam| aruṇam īṣadraktam; tadēva [25] pākābhimukhaṁ kr̥ṣṇam| paruṣam apicchilaṁ, rūkṣamityanyē| tanu accham| śīghragam āśuprasr̥ti| askandi cēti styānatvarahitam| nīlamityādi|- nīlaṁ haritaṁ, śyāvaṁ sāmapittaduṣṭaṁ, pītaṁ nirāmapittaduṣṭaṁ, śyāvaṁ haritakr̥ṣṇam| visram āmagandhi| aniṣṭaṁ pipīlikādīnāmananusaraṇādavagantavyam| askandi cēti styānatvarahitam| gairikētyādi|- gairikōdakapratīkāśaṁ pāṇḍulōhitam| bahalaṁ ghanam| māṁsapēśīprabhaṁ styānatvāt| sarvētyādi|- sarvalakṣaṇayuktaṁ vātādilakṣaṇayuktam| atra kēcit pittavadraktēnātikr̥ṣṇaṁ [26] ’ iti paṭhanti, na tu nibandhakārāḥ| dvidōṣaliṅgamityādi|- saṁsr̥ṣṭaṁ dōṣadvayayuktamityarthaḥ| atra kvacit ‘jīvaśōṇitamanyatrōpadēkṣyāmaḥ’ iti pāṭhaḥ, na tu nibandhēṣu||21||

indragōpakapratīkāśamasaṁhatamavivarṇaṁ ca prakr̥tisthaṁ jānīyāt ||22||

raktavikr̥tīrabhidhāya prakr̥tiṁ vaktumāha- indragōpakapratīkāśamityādi| indragōpakaḥ prāvr̥ṭkālaja udbhijjaḥ `indravadhūḥ’ iti lōkē, sa cānēkaprakāravarṇaḥ, atra tu rakta ēva gr̥hyatē| asaṁhataṁ nātyacchaṁ nātighanaṁ, na styāyatītyanyē| avivarṇamiti indragōpakavarṇamapīṣadvividhavarṇam, ētēna padmālaktakaguñjāphalavarṇamityuktam; athavā vastrādilagnaṁ sat prakṣālyamānamapi na vivarṇatāṁ yātītyavivarṇam||22||

visrāvyāṇyanyatra vakṣyāmaḥ ||23||

śōṇitasya srāvaṇaviṣayamatidēśēna darśayannāha- visrāvyāṇītyādi| anyatrēti aṣṭavidhaśastrakarmīyē||23||

athāvisrāvyāḥ- sarvāṅgaśōphaḥ, kṣīṇasya cāmlabhōjananimittaḥ, pāṇḍurōgyarśasōdariśōṣigarbhiṇīnāṁ ca śvayathavaḥ ||24||

visrāvyaniṣēdhaviṣayaṁ darśayannāha- athāvisrāvyā ityādi| kṣīṇasya puṁsō’mlabhōjananimittō yaḥ sō’visrāvya ityarthaḥ| tathā pāṇḍurōgyādīnāṁ śōthā avisrāvyāḥ; ētēṣāṁ vraṇaśōthā ēkāṅgajā api na srāvyāḥ||24||

śastravisrāvaṇaṁ dvividhaṁ- pracchānaṁ [27] , sirāvyadhanaṁ ca ||25||

śastravisrāvaṇasya dvaividhyamāha- śastrētyādi||25||

tatra, r̥jvasaṅkīrṇaṁ sūkṣmaṁ samamanavagāḍhamanuttānamāśu [28] ca śastraṁ pātayēnmarmasirāsnāyusandhīnāṁ cānupaghāti ||26||

atra pracchānamadhikr̥tyāha [29] – tatrētyādi| r̥ju prāñjalam| asaṅkīrṇaṁ [30] na saṅkaṭaṁ, viśālamityarthaḥ; anyē parasparāsaṁsr̥ṣṭamityāhuḥ| sūkṣmaṁ nātimahāmukhaśastrakr̥tam| samaṁ tulyarēkham| anavagāḍham adūragatikam| anuttānaṁ [31] kiñcinmāṁsaspr̥gityarthaḥ| āśu avilambitaṁ yathā bhavatyēvaṁ śastraṁ pātayēt||26||

tatra, durdinē durviddhē [32] śītavātayōrasvinnē bhuktamātrē skandatvācchōṇitaṁ na sravatyalpaṁ vā sravati ||27||
madamūrcchāśramārtānāṁ vātaviṇmūtrasaṅginām |
nidrābhibhūtabhītānāṁ nr̥ṇāṁ nāsr̥k pravartatē ||28||

raktasyāyōgaṁ cikitsārthamāha- tatra durdina ityādi| durdina iti nityagakāladōṣaḥ| kēcid ‘durdinē’ iti na paṭhanti| durviddhē iti vaidyakriyādōṣaḥ| śītavātayōriti kālakr̥tō dōṣaḥ| bhuktamātra iti āvasthikakāladōṣaḥ; ‘abhuktavata’ ityanyē paṭhanti| skandatvāt styānatvāt| madō viṣamadyajō vikāraḥ, ārtānāṁ pīḍitānām| vātaviṇmūtrasaṅgināmiti saṅgō’pravartanam||27-28||

tadduṣṭaṁ śōṇitamanirhriyamāṇaṁ śōphadāharāgapākavēdanā janayēt ||29||

duṣṭaraktasyāsrutidōṣamupadiśannāha- tadduṣṭamityādi||29||

atyuṣṇē’tisvinnē’tividdhē’jñairvisrāvitamatipravartatē [33] ; tadatipravr̥ttaṁ śirō’bhitāpamāndhyamadhimanthatimiraprādurbhāvaṁ dhātukṣayamākṣēpakaṁ dāhaṁ pakṣāghātamēkāṅgavikāraṁ hikkāṁ śvāsakāsau pāṇḍurōgaṁ maraṇaṁ cāpādayati ||30||

atiyōgaṁ vyāpadaścōpadiśannāha- atyuṣṇa ityādi| atyuṣṇē atyuṣṇakālē| atisvinnē atisvēditē| atividdhē’jñairiti ājñā adr̥ṣṭakarmāṇaḥ| śirō’bhitāpaṁ śiraḥśūlam| āndhyam andhatām| adhimanthaḥ cakṣūrōgō’bhiṣyandapūrvakaḥ, timiraṁ liṅganāśaḥ, prādurbhāvaśabdō’dhimanthatimirābhyāṁ sambadhyatē| śirōbhitāpādīn śirasyatihr̥taṁ raktaṁ karōti, dhātukṣayaṁ sarvatraivātihr̥tam| ēkāṅgavikāramiti ēkasminnaṅgē ya utpadyatē sa ēkāṅgavikāraḥ, sa cātra vātajanitaḥ||30||

tasmānna śītē nātyuṣṇē nāsvinnē nātitāpitē |
yavāgūṁ prati pītasya śōṇitaṁ mōkṣayēdbhiṣak ||31||

ayōgātiyōgau sahētukau nirdiśya samyagyōgaṁ sahētukaṁ nirdiśannāha- tasmādityādi| na śītē nātyuṣṇē sādhāraṇē kālē| nāsvinnē nātisvēditē| nātitāpitē sūryatāpādibhiḥ| yavāgūratra tilayavāgūḥ, tasyāḥ sadyaḥsnēhanīyatvādraktōtklēśakaratvācca| pratipītasyēti pratiśabdō’tra pānāntaraṁ sūcayati; tēna yavāgvā dvitīyapānānantaraṁ tr̥tīyapānānantaraṁ vētyarthaḥ; anyē tu ‘yavāgūrviraladravā bahusikthā, tāṁ pratipītasya, sā hi prāyaśaḥ praklēdanātmikā svēdalatvāddravōṣṇatvācca śōṇitaṁ vilāyayati; pratiśabdō’tra mātrārthaḥ, tēna yavāgūṁ mātrayā pītavata ityarthaḥ’||31||

samyaggatvā yadā raktaṁ svayamēvāvatiṣṭhatē |
śuddhaṁ tadā vijānīyāt samyagvisrāvitaṁ ca tat ||32||

idānīṁ samyagyōgasya suviśuddhasya caikēnaiva vākyēna lakṣaṇaṁ vaktumāha- samyagityādi| samyaggatvā yadā raktamiti gatvā niḥsr̥tya, yadā samyagraktaṁ raktavarṇaṁ śōṇitaṁ bhavati tadā śuddhaṁ vijānīyāt; samyagvisrāvitapakṣē tvayamarthaḥ- samyaggatvēti samyak pravartanaṁ kr̥tvā, yadā raktaṁ rudhiraṁ, svayamēvāvatiṣṭhatē avasthitiṁ karōti, tadā samyagvisrāvitaṁ ca tadraktaṁ vijānīyāt| cakārēṇaitallakṣaṇadvayaṁ labhyatē| anyē tu samyaggatvētyādiślōkasya vyākhyānamanyathā kr̥tvā sārdhaślōkēna vyākhyānayanti- “na cātivēgaṁ nāvēgaṁ samyagyuktyā viniḥsr̥tam| vihāya duṣṭatāṁ svēna rūpēṇa hyavatiṣṭhatē|| prayatnamanapēkṣyāsr̥k tadā śuddhaṁ vinirdiśēt”- iti||32||

lāghavaṁ vēdanāśāntirvyāghērvēgaparikṣayaḥ |
samyagvisrāvitē liṅgaṁ prasādō manasastathā ||33||

ābhyantaramaparamapi raktaśuddhisrāvaṇasya lakṣaṇaṁ darśayannāha- lāghavamityādi| ētacchārīraṁ samyagvisrāvitē liṅgaṁ; prasādō manasastathēti punarmānasam||33||

tvagdōṣā granthayaḥ śōphā rōgāḥ śōṇitajāśca yē |
raktamōkṣaṇaśīlānāṁ na bhavanti kadācana ||34||

śōṇitasrāvaṇaphalaṁ darśayannāha- tvagdōṣā ityādi| tvagdōṣā aṣṭādaśa kuṣṭhāni nyacchanīlikādayaśca, granthayō vātādinimittā sirāgranthiśca| śōṇitajā rōgā raktagulmavidradhivisarpādayaḥ| raktamōkṣaṇaśīlānāṁ raktasrāvaṇābhyāsakāriṇām||34||

atha khalvapravartamānē raktē ēlāśītaśivakuṣṭhatagarapāṭhābhadradāruviḍaṅgacitrakatrikaṭukāgāradhūmaharidrārkāṅkuranaktamālaphalairyathālābhaṁ tribhiścaturbhiḥ samastairvā cūrṇīkr̥tairlavaṇatailapragāḍhairvraṇamukhamavagharṣayēt, ēvaṁ samyak pravartatē ||35||

idānīmapravr̥ttaraktasya pravartanāyāha- atha khalviyādi| śītāśivaṁ karpūraṁ, naktamālō br̥hatkarañjaḥ| tribhiścaturbhiriti ētēnaikadvidravyaniṣēdhaḥ kr̥taḥ| lavaṇatailapragāḍhairiti saindhavatilatailōtkaṭairityarthaḥ||35||

athātipravr̥ttē rōdhramadhukapriyaṅgupattaṅgupattaṅgagairikasarjarasarasāñjanaśālmalīpuṣpaśaṅkhaśuktimāṣayavagōdhūmacūrṇaiḥ śanaiḥ śanairvraṇamukhamavacūrṇyāṅgulyagrēṇāvapīḍayēt sālasarjārjunārimēdamēṣaśr̥ṅgadhavadhanvanatvagbhi rvā cūrṇitābhiḥ kṣaumēṇa vā dhmāpitēna samudraphēnalākṣācūrṇairvā, yathōktarvraṇabandhanadravyairgāḍhaṁ badhnīyāt, śītācchādanabhōjanāgāraiḥ śītaiḥ pradēhapariṣēkaiścōpacarēt, kṣārēṇāgninā vā dahēdyathōktaṁ, vyadhādanantaraṁ [34] tāmēvātipravr̥ttāṁ sirāṁ vidhyēt; kākōlyādikvāthaṁ vā śarkarāmadhumadhuraṁ pāyayēt, ēṇahariṇōrabhraśaśamahiṣavarāhāṇāṁ vā rudhiraṁ; kṣīrayūṣarasaiḥ susnigdhaiścāśnīyāt; upadravāṁśca yathāsvamupacarēt ||36||
bhavanti cātra-
dhātukṣayāt srutē raktē mandaḥ sañjāyatē’nalaḥ |
pavanaśca paraṁ kōpaṁ yāti tasmāt prayatnataḥ ||37||
taṁ nātiśītairlaghubhiḥ snigdhaiḥ śōṇitavardhanaiḥ |
īṣadamlairanamlairvā bhōjanaiḥ samupācarēt ||38||

atipravr̥ttau raktāsthāpanāya cikitsāṁ darśayannāha- athētyādi| pattaṅgaṁ raktacandanaṁ, sarjarasō rālā, śuktirjalaśuktiḥ| sālaḥ śaṅkuḥ, sarjaḥ śālabhēdaḥ, arjunaḥ kakubhaḥ, arimēdaḥ ‘arimañja’ iti lōkē prasiddhaḥ, mēṣaśr̥ṅgaḥ karkaṭaśr̥ṅgaḥ, dhanvanaḥ ‘dhammaṇa’ iti prasiddhaḥ; sālāditvagbhiścūrṇīkr̥tābhiḥ ‘vraṇamukhamavacūrṇyāṅgulyagrēṇāvapīḍayēt’ ityatrāpi sambadhyatē| kṣaumēṇa vā dhmāpitēna atasīvastrēṇa dagdhēna ‘vraṇamukhamavacūrṇyāṅgulyagrēṇāvapīḍayēt’ ityatrāpi sambadhyatē| yathōktairvā vraṇabandhanadravyairiti kṣaumakārpāsavastrādibhiḥ| ācchādanaṁ vastrādi, pradēhō lēpaḥ, pariṣēkō dhārāsēkaḥ| yathōktaṁ valayabindvādi bhēdēnētyarthaḥ| vyadhādanantaraṁ prākkr̥tavyadhanādadhaḥsthānē [35] , tāmēva pūrvaviddhāṁ sirāṁ vidhyēt, raktagaticchēdanārtham| raktātisrutāvābhyantaraṁ bhēṣajaṁ darśayannāha- kākōlyādītyādi| ēṇaḥ kr̥ṣṇahariṇaḥ, hariṇastāmravarṇaḥ; ēṇādiraktaṁ pāyayēditi sambandhaḥ, raktāpyāyanārthaṁ; taccāduṣṭamasaṁskr̥taṁ ca| raktātipravr̥ttau bhōjanaṁ niyamayannāha- kṣīrētyādi| yūṣō mudgayūṣaḥ, rasō māṁsarasaḥ| susnigdhairiti śōbhanaṁ kr̥tvā ghr̥tēna snigdhīkr̥taiḥ| aśnīyāditi kṣīrādisiktamōdanaṁ bhuñjīta| pittaduṣṭaraktasyaivātipravr̥ttāvatipravr̥ttaraktasya kṣīrabhōjanam, athavā pittaprakr̥tikasyaiva raktātipravr̥ttau kṣīrabhōjanaṁ, kaphaduṣṭaraktasyaivātipravr̥ttāvatipravr̥ttaraktasya yūṣabhōjanaṁ, ślēṣmaprakr̥tikasyaiva vā; vātaduṣṭaraktasyaivātipravr̥ttāvatipravr̥ttaraktasya rasabhōjanaṁ, vātaprakr̥tikasyaiva vā; anyē tu dīptamadhyamandāgnīnāṁ yathāsaṅkhyaṁ kṣīrādisiktamōdanaṁ bhōjanamāhuḥ; sātmyāpēkṣayētyēkē| atisrutaraktasyōpadravān cikitsitumāha- upadravāṁścētyādi| upadravān śirō’bhitāpādīn| yathāsvamiti svakīyēna svakīyēnōpacārēṇētyarthaḥ| dhātukṣayādityādi| tasmādanatiśītādibhōjanaiḥ prayatnatastaṁ puruṣamupācarēditi sambandhaḥ, agnisandhukṣaṇārthaṁ śōṇitāpyāyanārthamupadravaparihārārthaṁ ca| īṣadamlairdāḍimāmalakaiḥ, tēṣāmēvāmlēṣu pradhānatvāt||36-38||

caturvidhaṁ yadētaddhi rudhirasya nivāraṇam |
sandhānaṁ skandanaṁ caiva pācanaṁ dahanaṁ tathā ||39||
vraṇaṁ kaṣāyaḥ sandhattē raktaṁ skandayatē himam |
tathā sampācayēdbhasma dāhaḥ saṅkōcayēt sirāḥ ||40||

caturvidhamityādi| sandhānaṁ śastrapadasya, skandanaṁ śōṇitasya styānīkaraṇaṁ, pācanaṁ dahanaṁ ca śastrapadasya| kaṣāyaḥ kaṣāyarasadravyaṁ, tacca lōdhrādikam; anyē tu harītakyādikaṁ pañcavalkalādikaṁ cāhuḥ| himaṁ śītam| bhasma kṣaumādijanitam| dahanaṁ śalākāprabhr̥tibhiḥ||39-40||

askandamānē rudhirē sandhānāni prayōjayēt |
sandhānē bhraśyamānē tu pācanaiḥ samupācarēt ||41||
kalpairētaistribhirvaidyaḥ prayatēta yathāvidhi |
asiddhimatsu caitēṣu dāhaḥ parama iṣyatē ||42||

idānīṁ pūrvapūrvāsiddhāvuttarōttaraṁ vidhyavasaraṁ pratipādayannāha- askandamānē ityādi| tatra prathamaṁ śītōpacārādi kartavyaṁ, tēna yadā styānībhūya raktaṁ na tiṣṭhati tadā harītakyādi pañcavalkalādi vā prayōjayēt; sandhānēna cēnna tiṣṭhati rasaṁ tadā pācanaṁ bhasma prayōjayēt; ēbhistrībhirvidhānairyadi na tiṣṭhati raktaṁ tadā dahanaṁ śōṇitasthāpanārthaṁ kartavyamityarthaḥ||41-42||

śēṣadōṣē [36] yatō raktē na vyādhirativartatē |
sāvaśēṣē tataḥ sthēyaṁ na tu kuryādatikramam ||43||

idānīṁ raktātisrāvadōṣaṁ darśayannāha- śēṣētyādi| na vyādhirativartatē na vr̥ddhiṁ yāti| sāvaśēṣē tataḥ sthēyamiti sāvaśēṣē dōṣē raktaṁ punaḥ saṁśamanādibhirjayēt||43||

dēhasya rudhiraṁ mūlaṁ rudhirēṇaiva dhāryatē |
tasmādyatnēna saṁrakṣyaṁ raktaṁ jīva iti sthitiḥ ||44||

kutaḥ punaḥ śōṇitasrāvaṇē’tikramō na karaṇīya ityāha- dēhasyētyādi| mūlamiti utpattisthitipralayēṣu śōṇitamēva hētuḥ, anēnaiva dhāryatē sthāpyatē||44||

srutaraktasya sēkādyaiḥ śītaiḥ prakupitē’nilē |
śōphaṁ satōdaṁ kōṣṇēna sarpiṣā pariṣēcat ||45||

śōṇitāvasēkē paścātkarma darśayannāha- srutaraktasyētyādi||45||

iti suśrutasaṁhitāyāṁ sūtrasthānē śōṇitavarṇanīyō nāma caturdaśō’dhyāya ||14||

iti śrīḍalha(hla)ṇaviracitāyāṁ nibandhasaṅgrahākhyāyāṁ suśrutavyākhyāyāṁ sūtrasthānē śōṇitavarṇanīyō nāma caturdaśō’dhyāyaḥ||14||

1. tatra iti tāḍapatrapustakē na paṭhyatē|
2. ṣaḍrasōpētasya iti tāḍapatrapustakē pāṭhaḥ|
3. jīvayati iti pā. |
4. pōṣyasya dhāturasasyaiva hr̥dayaṁ sthānaṁ natu pōṣakasyāhārarasasya, tasya tu dhamanya ēva sthānaṁ, yadāha cakraḥ- tat sthānaṁ tu dhamanya ēva| pōṣakāhārarasasya ca pr̥thagrasādidhātubhyaḥ pradēśāntaragrahaṇaṁ na kriyatē, rasādikāraṇarūpatayā rasādigrahaṇēnaiva tadgrahaṇāt- iti|
5. tanutā iti pā.|
6. pr̥thivyādiguṇāstvētē dr̥śyantē śōṇitē yataḥ iti tāḍapatrapustakē pāṭhaḥ|
7. atra prajāyatē iti praśabdaḥ prakarṣavācī, tēna rasādigatamalāṁśāt kaphaḥ pittaṁ malāḥ khēṣu (sū. a. 46) ityādinā vakṣyamāṇamalōtpattirapyapakr̥ṣṭāṁśajanyā sūcitā bhavati| yaduktaṁ carakē “rasāt stanyaṁ tathā raktamasr̥jaḥ kaṇḍarāḥ sirāḥ| māṁsādvasā tvacaḥ ṣaṭ ca mēdasaḥ snāyusandhayaḥ (ca. ci. a. 15) iti| śukraṁ tu jāyatē ityanēna punarutpādābhidhānēna śukrasya viśiṣṭamalāṁśarahitamutpādaṁ darśayati| yattu śmaśru śukramalatayā kaiściducyatē, tanna, śāstrē’nabhihitatvāt, tathā strīṇāṁ ca saśukratayā śmaśruprasaktēḥ| tasmāt śmaśru lōmaviśēṣatayā’sthimalamēva|” iti bhānumatyāṁ cakraḥ| tatra pākajanyaiḥ prasādāṁśairyēna kramēṇa yē yē janyantē tānāha- rasādityādi| prasādaja ityasya liṅgavipariṇāmēna raktamityādiṣu sarvatra sambandhaḥ| prasādajaśca sārabhāgaḥ| tēna rasādraktaṁ prasādajaṁ, tatō raktānmāṁsaṁ prasādajaṁ, māṁsācca mēdaḥ prasādajamityādi yōjyam| rasādraktaṁ prasādajamiti rasāt pākēna jāyatē yaḥ prasādāṁśastasmādraktaṁ jāyatē| ēvaṁ raktāt pākēna jāyatē yaḥ prasādāṁśastasmācca māṁsaṁ jāyata ityādi vyākhyēyam| janiścāyaṁ pōṣaṇa ēva vartatē nāpūrvōtpādē| yatō raktādayō garbhāt prabhr̥tyēvōtpannā rasādibhiḥ pōṣyantē| anyē tu ‘garbhaprasādajam’ iti paṭhitvā garbhaprasādajamiti samastapadēna ōja ācakṣatē| asmiṁstu pakṣē prasādajaśabdasya na sarvatrānvayaḥ| nanu, ‘puṣyanti tvāhārarasāt’ (ca. sū. a. 28) ityādinā carakē rasēna rasapōṣaṇamuktam, atra tu rasādraktamityādinā rasēna raktapōṣaṇamucyata iti virōdhaḥ| naivam, ēka ēvāyamāhārarasō dviprasthānaḥ pōṣyapōṣakabhēdēna| tatrānnapānādutpannō rasaḥ pōṣakaḥ, raktādivat sthāyī yaḥ sa pōṣyaḥ, tasyaiva hr̥dayaṁ sthānamuktam (pōṣakāhārarasasya tu dhamanya ēva sthānam)| ata ēva pōṣya sthāyirasavyavacchēdārthamāhārēti rasaviśēṣaṇamuktaṁ carakēṇa| yattu ‘rasādraktaṁ’ ityādivacanaṁ tadrasatvēnābhēdavivakṣayā rasaṁ parityajya raktamēva paṭhitaṁ, na tu pōṣyasya rasākhyadhātōrabhāvāditi| na caivamaṣṭadhātukatvaṁ śarīrasyēti vācyaṁ| yataḥ sthāyirasabhāgapōṣakarasabhāgayōḥ sthānabhēdāgnibhēdādyabhāvādēkatvamēvēti saptadhātukamēva śarīramityucyata iti| atra ca rasādraktādyutpādē kēcididaṁ vadanti- yadrasō’gnipacyamānaḥ sarvātmanā raktatāṁ yāti, raktaṁ ca māṁsatāmityādi pūrva pūrvadhātupariṇāmēnōttarōttaradhātūtpādaḥ, yathā- sarvātmanā kṣīrāddadhi bhavati, dadhnō navanītaṁ, navanītāddhr̥taṁ, ghr̥tācca ghr̥tamaṇḍaḥ, ityēkaḥ pakṣaḥ| kiṁvā rasa ēva raktaṁ prathamaṁ plāvayati, tatra raktasthānasambandhādraktasādr̥śyaṁ raktavyapadēśaṁ cānubhavati, raktaṁ ca raktasamānēna stōkēnāṁśēnāsraṁ pōṣayati, tatō raktamāplāvya māṁsamāplāvayati, tatrāpi māṁsasamānēnāṁśēna māṁsapōṣaṇaṁ karōti māṁsasādr̥śyaṁ māṁsaśabdābhidhēyatāṁ cānubhavati, ēvamuttarōttaradhātūn rasa ēva plāvayati, yathā- kēdāraniṣiktaṁ kulyājalaṁ pratyāsannāṁ kēdārīmāplāvayatīti dvitīyaḥ pakṣaḥ| ētadēvōktaṁ hārītē yat, “rasaḥ saptāhādarvāk parivartamānaḥ śvētakapōtaharitahāridrapadmakiṁśukālaktakarasaprakhyaścāyaṁ yathākramaṁ divasaparivartādvarṇaparivartamāpadyamānaḥ pittōṣmōparāgācchōṇitatvamāpadyatē”- iti, tathā suśrutē’pi- ‘tatraiṣāṁ dhātūnām’- ityādinā tathā ‘sa khalu trīṇi trīṇi’- (su. sū. a. 14) ityādinā rasēnaiva raktādidhātupōṣaṇamanēna nyāyēnōktaṁ| kiṁvā, āhārarasa utpannō bhinnairēva mārgaiḥ sthāyirasarudhiramāṁsādīn rasarudhirādisamānāṁśēna tarpayati, tatra yaḥ pratyāsannō dhātustatpōṣakō bhāgastaṁ śīghraṁ puṣṇāti, yastu vidūradhātustasya sūkṣmavidūramārgatayā cirēṇa pōṣaṇaṁ bhavati, ēvaṁ bhinnairēva mārgairdhātupōṣaṇaṁ bhavati| tēna raktapōṣaṇakālāduttarakālaṁ māṁsapōṣakō rasabhāgō māṁsaṁ pōṣayati, tathā māṁsapōṣaṇakālāduttarakālaṁ mēdaḥ pōṣakō rasabhāgō mēdaḥ pōṣayatītyādi| tēna rasādraktamityādivacanasyāyamarthō yat- rasapuṣṭikālāduttarakālaṁ raktaṁ pravartatē, raktapuṣṭikālāduttarakālaṁ māṁsaṁ pravartatē ityādi| asmiṁstu pakṣē- “viṇmūtramāhāramalaḥ sāraḥ prāgīritō rasaḥ| sa tu vyānēna vikṣiptaḥ sarvān dhātūn pratarpayēt” (su. sū. a. 46) ityādivacanaṁ mukhyārthamēva ghaṭatē (tathā ‘tasmin dhātumalāśayānusāriṇi rasē’ iti ca mukhyārthaṁ bhavati, tathā carakē’pi ‘srōtasā ca yathāsvēna dhātuḥ puṣyati dhātunā’ (ca. ci. a. 8) iti ca mukhyārthaṁ bhavati)| tēna yathā khalē upacitānāṁ kapōtānāṁ bhinnadiggāmināṁ svīyasvīyamārgēṇaiva gacchatāṁ gamyadēśasya pratyāsannatvaviprakr̥ṣṭatvādibhēdēna śīghraṁ cirēṇa vā gamanaṁ bhavati tadvat| iti kṣīradadhinyāyakēdārīkulyānyāyakhalēkapōtanyāyāttridhā dhātupōṣaṇakramaḥ| tatra, ētēṣu pakṣēṣu sarvātmapariṇāmē tricaturōpavāsēnaiva dēhasya nīrasatvaṁ syāt, māsōpavāsācca śukrama(kṣa)yaṁ śarīraṁ syādityupēkṣaṇīya ēva prathamaḥ pakṣaḥ| kēdārīkulyānyāyapakṣē tu rasādraktādipōṣaṇaṁ mukhyārthatayā bhavati, yadapi raktādērmāṁsādipōṣaṇaṁ tadapi rasādēva raktādidharmatayā raktādivyapadēśabhājō bhavatīti vyutpāditamēva, yattu rasasya sarvadhātupōṣakatvamuktaṁ (sarvadhātudōṣamalāśayānusāritvamuktaṁ) tadapi raktādipōṣakatayā tathā hr̥dayasthasthāyirasasya kr̥tsnadēhavyāpakatayā cōpapannaṁ| ēvaṁ carakē’pyuktam| – ‘vyānēna rasadhāturhi vikṣēpōcitakarmaṇā| yugapat sarvatō’jasraṁ dēhē vikṣipyatē sadā” – (ca. ci. a. 15) ityādi, tadapyuktanyāyādēvōpapannaṁ| yadapi māṁsādinā samānēna māṁsādērēva pōṣaṇaṁ, tadapi dhātvāplāvananyāyēna gacchatā’pi rasēna taddhātusamānēnāṁśēna taddhātupōṣaṇādupapannam| vr̥ṣyaṁ tu prabhāvādyathā khalēkapōtanyāyē vidūramapi śukraṁ prabhāvācchīghraṁ yāti, tathā’trāpi śīghramēva vr̥ṣyōtpannō rasō raktādidhātūn śīghramāplāvayatīti sughaṭam| ēvamanayā diśā’nyadapyatra dūṣaṇamuddhāryam| tēnāyaṁ pakṣastāvat sādhuḥ| khalēkapōtapakṣē’pi yathā rasādraktamityādi gauṇatayā bhavati taddarśitamēva| yattu carakē “raktaṁ vibaddhamārgatvānmāṁsādīn na prapadyatē” (ca. ci. a. 8)- ityuktaṁ, tat kr̥tsnadēhacāriśōṇitābhiprāyēṇa, na tu pōṣakaraktābhiprāyēṇēti vyavasthāpyatē| yattu “ēkaikasmin dhātau trīṇi trīṇi”- ityādinā dhātāvavasthānakāla uktaḥ, sa pūrvapūrvaraktādidhātulaṅghanakālō vidūragāmirasasyēti vyavasthāpyatē| ēvamanayōḥ pakṣayōrmahājanaparigr̥hītayōrgatirūpadarśitā| svarasastvasmākaṁ kēdārīkulyānyāyē| yattvanyaiḥ khalēkapōtanyāyasvīkārēṇa carakē santatajvarasya dvādaśāśrayatvaṁ yuktamityādyuktaṁ, tanna buddhyāmahē, santatajvarasya dvādaśāśrayatvaṁ dōṣamahimnā kr̥tsnadēhavyāpakatayā “yathā dhātūṁstathā mūtraṁ purīṣaṁ cānilādayaḥ”- (ca. ci. a. 3) ityādinōktam| dōṣāṇāṁ ca kupitānāṁ samprāptiviśēṣāt kimagamyamasti dēhē, yēna tāvadrasamēva paraṁ sarvadhātvādivyāpakaṁ sarvadhātudūṣaṇē’pēkṣanta iti” iti cakradattaviracitadravyaguṇasaṅgrahavyākhyāyāṁ śivadāsasēnaḥ|
8. tēṣāṁ rasādīnāṁ iti hastalikhitapustakē na paṭhyatē|
9. ātmapācakapacyamānāt iti pā.|
10. yadāha carakaḥ- “kiṭṭamannasya viṇmūtraṁ, rasasya tu kaphō’sr̥jaḥ| pittaṁ, māṁsasya khamalā, malaḥ svēdastu mēdasaḥ|| syāt kiṭṭaṁ kēśalōmāsthnō, majjñaḥ snēhō’kṣiviṭ tvacām” (ca. ci. a. 15) iti”|
11. rasāt stanyaṁ tathā raktamasr̥jaḥ kaṇḍarāḥ sirāḥ| māṁsādvasā tvacaḥ ṣaṭ ca mēdasaḥ snāyusandhayaḥ”- iti| samprati prasādajanyatāṁ dhātūnāmabhidhāyōpadhātūnāmapyāha- rasādityādi| atrāpi rasāt stanyaṁ prasādajamityādi yōjyam| raktamiti strīṇāṁ rajaḥ sañjñaṁ raktamapyupadhāturūpaṁ rasādēva prasādabhāgajanyamityarthaḥ| uktaṁ ca suśrutē- “rasādēva striyā raktaṁ rajaḥsañjñaṁ pravartatē” (su. sū. a. 14) iti| ētacca rajōrūpaṁ raktaṁ rasajanyamapi dhātuśōṇitavanna śīghraṁ jāyatē, kintu śukravanmāsēnaiva| taduktaṁ suśrutē- “ēvaṁ māsēna rasaḥ śukrībhavati strīṇāṁ ca cārtavam”- iti| anyē tu- “ghr̥takumbhō yathaivāgnimāśritaḥ pravilīyatē| visarpatyārtavaṁ strīṇāṁ tathā puṁsāṁ samāgamē” (śā. a. 2) ityatra yathā”rtavaśabdēna śukramucyatē tathā strīṇāṁ cārtavamityatrāpyārtavaśabdaḥ śukra ēva vartatē na tu rajasi, rajō hi rasādraktavacchīghramēva jāyatē na tu māsēnētyāhuḥ| tannētyanyē, visarpatyārtavamityādāvapi strīṇāmārtavaṁ puṁsāṁ samāgamē sati visarpatīti yōjanayā”rtavaśabdasya rajōvacanatvēnāpyupapattēḥ| vastutastvārtavasya raktarūpatā yadyapi māsādarvāgbhavati tathā’pi tasyārtavarūpatā garbhāśayaprāptyaiva bhavati, garbhāśayaprāptistu māsēnaiva bhavatīti kr̥tvā māsēnārtavaṁ bhavatīti suśrutēnōktam| uktaṁ hi viśvāmitrēṇa- “sūkṣmāḥ kēśapratīkāśā bījaraktavahāḥ sirāḥ| garbhāśayaṁ pūrayanti māṁsādbījāya kalpatē”- iti| tatra bījabhūtaraktaṁ bījaraktamārtavamityarthaḥ| asr̥jaḥ kaṇḍarā iti sthūlasnāyavaḥ| mēdasaḥ snāyusandhaya ityanēna tu mēdasaḥ sūkṣmasnāyupōṣaṇamiti jñēyam| carakē hi kaṇḍarāśabdaḥ sthūlasnāyuvācī, suśrutē ca sthūlasirāvācīti jñēyam| ētē ca stanyādayaḥ śarīradhārakā apyupadhātuśabdēnaivōcyantē, natu dhātuśabdēna| dhātuśabdapravr̥ttērdhāraṇapōṣaṇanimittatvāt| tēna yē śarīraṁ dhārayanti dhātūṁśca puṣṇanti rasādayasta ēva mukhyatayā dhātuśabdavācyā na stanyādayaḥ, tē hi śarīraṁ dhārayantyēva na tu kiñcit puṣṇanti| uktaṁ hi bhōjē- “sirāsnāyurajaḥ stanyatvacō gativivarjitāḥ| dhātubhyaścōpajāyantē tasmātta upadhātavaḥ”- iti| atra gativivarjitā ityanēna dhātvantarapōṣaṇādyā gatirniṣidhyatē| ata ēva dhātubhyaścōpajāyanta ēva na tu paraṁ janayantītyarthaḥ| yattu “kiñciddōṣapraśamanaṁ kiñciddhātupradūṣaṇam” (ca. sū. a. 1) ityatra dhātuśabdēna dōṣāṇāmapi grahaṇaṁ, tadgauṇadhātuśabdaprayōgājjñēyam| uktaṁ hi- “dōṣā hyapi dhātusañjñāṁ labhantē” – iti| śukrasyāpyōjaḥpōṣakatayā dhāraṇapōṣaṇayōgō’stīti dhātutvamakhaṇḍitamēva| ōjastu yadyapi na dhātuṣu nāpyupadhātuṣu paṭhitaṁ, tathā’pi tat saptadhātusārarūpatayā saptadhātvantargatamēvēti jñēyam| ata ēva tasyāgnirapi pr̥thaṅnōktaḥ” iti cakrapāṇidattakr̥tadravyaguṇasaṅgrahavyākhyāyāṁ śivadāsasēnaḥ|
12. annapānādēkāhēnōtpannō rasō’nnapānarasaḥ| sarvadhātūnāmityatra sarvaśabdēna sthāyirasamapi gr̥hṇāti| yaduktaṁ carakē- “puṣyanti tvāhārarasādrasarudhiramāṁsa … ” (ca. sū. a. 28) ityādi| nanu yadyēvaṁ tat kiṁ rasadvayaṁ? tathā satyaṣṭadhātutvaṁ śarīrasya| maivam, ēka ēvāyamāhārarasō dviprasthānaḥ pōṣyapōṣakabhēdēna| tatra pōṣyō rasāṁśaḥ sarvaśarīracārī pōṣakēṇa rasāṁśēna samānēna nityaṁ pākāntarānapēkṣēṇaivālpīyasā yujyatē, avaśiṣṭastu raktādipōṣakō raktaṁ yāti, tatra raktasthēnāgninā yathāvakṣyamāṇakālajātapākāt kaphaṁ malaṁ tyaktvā raktasamānāṁśēnālpīyasā sarvathā raktībhūtēna raktaṁ pōṣayati, śēṣastu māṁsādisamānarasabhāgō māṁsādīn yāti, tatrāpīdr̥śyēva pākavyavasthā, tēna sthāyirasapōṣakarasayōḥ karmabhēdādbhēdō’bhidhīyatē, pākāntarasthānāntaragatyantarāmāvāccaikatā’pi| tēna kvacidbhēdavivakṣayā puṣyanti tvāhārarasādityādyuktaṁ, abhēdavivakṣayā tu rasādraktamityādyuktamiti yuktam’ iti cakraḥ|
13. rasaḥ śukrībhavati strīṇāṁ cārtavaṁ’ iti pā.| strīṇāṁ cārtavamiti māsēna rasaḥ strīṇāmārtavatāṁ yātītyarthaḥ, yadyapi rasādārtavaṁ māsādarvāgēva bhavati, tathā’pi rajasaḥ sūkṣmaviprakr̥ṣṭamārgatayā māsēna bhavanam| yaduktaṁ viśvāmitrēṇa- “sūkṣmakēśapratīkāśā bījaraktavahāḥ sirāḥ| garbhāśayaṁ pūrayanti māsādbījāya kalpatē- “iti| atra bījabhūtaraktaṁ bījaraktamārtavamityarthaḥ| atra yadi nāmārtavasya raktarūpatā stōkēnāpi kālēna bhavati tathā’pi tasya garbhāśayaprāptirmāsēnaiva bhavati, garbhāśayagataṁ ca tanmukhyārtavaśabdāvācyam, atō māsēna tadbhavanābhidhānaṁ yuktam| anyē māsēnōpacayādāvirbhāvamārtavasya māsēnēti vadanti| yē tu ārtavaśabdaṁ strīśukrē vartayanti tanmatē aśābdīyā vyākhyā| yadapi “ghr̥takumbhō yathaivāgnimāśritaḥ pravilīyatē| visarpatyārtavaṁ strīṇāṁ tathā puṁsāṁ samāgamē” (śā. a. 2) iti kaiścit paṭhyatē, tadyadyārṣaṁ tadā tatrārtavaśabdēna raja ēvōcyatē, taddhi maithunasamayē puruṣabījagrahaṇāya visarpati| strīśukraṁ tu śukraśabdēna puruṣastrīsādhāraṇēna māṁsādivat prāptamēva | yattu strīśukrasya garbhānārambhakatvaṁ tadvacanādēva tathā nārīrajasō garbhārambhakatvādēva labdham| uktaṁ ca tantrāntarē “strīṇāṁ śukraṁ na garbhāya bhavēdgarbhāya cārtavam” iti| strīśukraṁ ca kvacidāśrayībhūtaṁ garbhārambhakaṁ vaktavyam| yathā “muñcataḥ śukramanyōnyamanasthistatra jāyatē” iti bhānumatyāṁ cakraḥ|
14. nanu tantrāntarē aṣṭāhācchukrōtpattiruktā, yaduktaṁ parāśarē- “āhārō’dyatanō yaḥ sa śvō rasatvaṁ niyacchati| śōṇitatvaṁ tr̥tīyē’hni caturthē māṁsatāmapi|| mēdastvaṁ pañcamē ṣaṣṭhē tvasthitvaṁ saptamē tviyāt| majjatvaṁ śukratāṁ yāyānniyamāttvaṣṭamē nr̥ṇām” iti| carakē’pyuktam- “ṣaḍbhiḥ kēcidahōrātraiḥ kēcit saptabhirēva ca| icchanti munayaḥ prāyō rasasya parivartanam” (ca. ci. a. 15) – iti| tadētadāśaṅkyāha- sa śabdārcirjalasantānavadityādi| yadētanmāsēna rasasya śukratvābhidhānaṁ tat parākāṣṭhayā jñēyam, arvāgapi tvagniprakarṣasrōtaḥśuddhiprakarṣādrasasya śukratōtpattirbhavati| yaduktaṁ carakē- ‘santatyā pōṣyadhātūnāṁ parivr̥ttistu cakravat’ (ca. ci. a. 15) iti| atra hi cakrasya vāhyavāhakaprarṣāprakarṣābhyāṁ yathā parivr̥ttiḥ śīghraṁ cirēṇa vā bhavati, tathā rasasyāpīti vākyārthaḥ| tēnēhāpi śabdavadanusaratītyanēna madhyaḥ parāvr̥ttikrama ucyatē| arcirvadityanēna śīghraḥ, arciḥsantānō hi śabdasantānādapi śīghraḥ| jalasantānavadityanēna cātimandaḥ parō māsēna parāvr̥ttirūpaḥ krama ucyatē| tathā’nyatrāpyuktam- “kēcidāhurahōrātrāt ṣaḍahādaparē parē| māsāt prayāti śukratvamannaṁ pākakramāditi”| aṇunā viśēṣēṇēti sūkṣmēṇa sūkṣmabuddhigamyēnēti yāvat| yacchabdasantānavattiryaggamanaṁ rasasya, arciḥsantānavaccōrdhvagamanaṁ, jalasantānavaccādhōgamanamucyatē, tacchabdasya sarvadiggāmitvādanupapannam| ūrdhvādhastiryaggamanaṁ ca rasasya “sa hr̥dayāccaturviṁśatiṁ dhamanīḥ” ityādinōktam iti cakraḥ| arciḥ santānavaddhamanīṣu (ārṭarī), śabdasantānavatsirāsu (vēīna), jalasantānavatsrōtaḥsu (kēpilarī) rasasañcaraṇamiti kēcana navyāḥ| carakē’pyuktaṁ ‘dhmānāddhamanyaḥ srōtāṁsi sravaṇāt saraṇāt sirāḥ’ (ca. sū. a. 30) iti|
15. ‘vājīkāriṇyaḥ’ iti ‘vājīkariṇyaḥ’ iti ca pā.|
16. ‘sāmarthyaṁ prāpnōti’ iti pā.|
17. svabalaṁ dravyasvabhāvaḥ, guṇōtkarṣō guṇasvabhāvaḥ, tasmāt svabalaguṇōtkarṣād vyastāt samastācca| yaduktaṁ carakē- “dravyāṇi hi dravyaprabhāvād guṇaprabhāvāt dravyaguṇaprabhāvācca kārmukāṇi bhavanti” (ca. sū. a. 26) iti| śukramāśu virēcayantīti virēcanamiha virēcanadr̥ṣṭāntānuguṇatayā vr̥ṣyakarmōpalakṣaṇamuktaṁ| tēna śukravr̥ddhiḥ, śukrasrutiḥ, tathā śukrasrutivr̥ddhī ca lakṣayati| yaduktaṁ “śukrasrutikaraṁ kiñcit kiñcicchukravivardhanam| srutivr̥ddhikaraṁ kiñcittrividhaṁ vr̥ṣyamucyatē”- iti|
18. ‘atha cāstīti ‘satāmēvāvirbhāvaḥ’ iti sāṅkhyadarśanēnētyarthaḥ’ iti cakraḥ|
19. ‘kr̥tvā’ iti pā.|
20. ‘yathāhīti dr̥ṣṭāntatāpratipādanārtham’ iti pā.|
21. gandhō’sti na vā’styēvēti ca iti pā.|
22. sambandhanē iti pā.|
23. dhāraṇāditi dhāraṇaprakarṣāt, tēna dōṣāṇāṁ sāmyāvasthitānāṁ dēhadhārakāṇāmapi dhārakatvaprakarṣābhāvānna mukhyaṁ dhātutvaṁ| yattu “kiñciddōṣapraśamanaṁ kiñciddhātupradūṣaṇam” (ca. sū. a. 1) ityatra dhātuśabdēna dōṣāṇāmapi grahaṇaṁ, tadgauṇadhātuśabdaprayōgājjñēyam| uktaṁ hi “dōṣā api dhātuśabdaṁ labhantē” iti| dhāraṇaśabdēna dhāraṇaṁ pōṣaṇaṁ cēha vivakṣitaṁ, tēnōpadhātūnāṁ kiñciddhāraṇatvē’pi pōṣaṇābhāvānna dhātutvaṁ, uktaṁ ca bhōjē “sirāsnāyuvasāstanyatvacō gativivarjitāḥ| dhātubhyaścōpajāyantē tasmāttē hyupadhātavaḥ’ iti| atra gativivarjitā ityanēna dhātvantarapōṣaṇārthā gatirniṣidhyatē, śukraṁ tvōjaḥ pōṣakatayā dhāraṇapōṣaṇayōgāddhāturēva’ iti cakraḥ|
24. ‘…prakāśaṁ’ iti pā.|
25. tadēvātipākāt kr̥ṣṇaṁ iti pā.|
26. pittavadraktēnēti pāṭhapakṣē pradēśāntaraduṣṭēna raktēna yadā pradēśāntarē raktaṁ duṣyati tadā lakṣaṇaṁ jñēyam’ iti cakraḥ|
27. ‘pracchannaṁ’ iti pā.|
28. ‘nōttānaṁ’ iti pā.|
29. ‘pracchannamadhikr̥tyāha’ iti pā.|
30. ‘asaṅkīrṇaṁ nātipratyāsannam’ iti cakraḥ|
31. ‘nōttānaṁ’ iti pā.|
32. ‘durviddhē iti pārśvatō’nyatra vā viddhē’ iti cakraḥ|
33. ‘atyuṣṇātisvinnātividdhēṣu’ iti pā.|
34. ‘yathōktavyadhādanantaraṁ’ iti pā.|
35. ‘prākkr̥tavyadhanādaparasthānē’ iti pā.| ‘tāmēva vā sirāṁ vidhyēd vyadhāttasmādanantaram|’,(vā. sū. a. 27) ityaṣṭāṅgahr̥dayē| ‘vyadhādanantaraṁ vyadhanasya paścimabhāgē’ ityaṣṭāṅgasaṅgrahavyākhyāyaminduḥ|
36. ‘saśēṣadōṣē rudhirē’ iti pā.|